ភ្នំពេញៈ ក្រសួងវប្បធម៌ និងវិចិត្រសិល្បៈសម្រេចបើកដំណើរការឡើងវិញ ការចូលទស្សនាសារមន្ទីរ រោងភាពយន្តនិងរោងសម្តែងសិល្បៈ នៅក្នុងរាជធានីភ្នំពេញ ចាប់ពីថ្ងៃទី ៣០ខែតុលាតទៅ ប៉ុន្តែត្រូវអនុវត្តឱ្យបានហ្មត់ចត់បំផុតនូវវិធានការគោលការណ៍ស្តង់ដាប្រតិបត្តិ (SOP) ដែលរៀបចំឡើងរវាងក្រសួងវប្បធម៌ និងក្រសួងសុខាភិបាល។ នេះបើតាមសេចក្តីប្រកាសរបស់ក្រសួងវប្បធម៌ នៅថ្ងៃទី២៨ ខែតុលា។
គោលការណ៍ស្តង់ដាប្រតិបត្តិ(SOP) ដែលចុះហត្ថលេខាដោយ លោកស្រី ភឿង សកុណា រដ្ឋមន្ត្រីក្រសួងវប្បធម៌ នៅថ្ងៃទី២៧ ខែតុលា មានខ្លឹមសារណែនាំឱ្យមានការបង្ហាញបណ្ណចាក់វ៉ាក់សាំងឬស្គេន QR Code របស់ក្រសួងសុខាភិបាលចំពោះទស្សនិកជនគ្រប់រូប ដែលមករោងភាពយន្ត ឬរោងសម្តែងសិល្បៈ។ ប៉ុន្តែករណីនេះត្រូវបានលើកលែងចំពោះទស្សនិកជនដែលមានអាយុក្រោម៦ឆ្នាំ។
លោកស្រីរដ្ឋមន្ត្រីក៏បានណែនាំឱ្យមានការវាស់ស្ទង់កម្តៅ ចំពោះទស្សនិកជនគ្រប់រូប ដែលចេញចូលក្នុងបរិវេណរោងភាពយន្ត ឬរោងសម្តែងសិល្បៈ និងតម្រូវឱ្យទស្សនិកជនគ្រប់រូប ពាក់ម៉ាស់ការពារជានិច្ចផងដែរ។
បើពិនិត្យឃើញករណីសង្ស័យណាមួយ ត្រូវរក្សាទុកទស្សនិកជន ដែលជាអ្នកសង្ស័យនោះ ក្នុងបន្ទប់រង់ចាំដាច់ដោយឡែក និងត្រូវរាយការណ៍ជាបន្ទាន់មកមន្ត្រីជំនាញសុខាភិបាល។
លោកស្រីថ្លែងថា៖«ត្រូវយកចិត្តទុកដាក់ពិសេសស្ត្រីមានផ្ទៃពោះ ជនចាស់ជរា និងកុមារតូចៗ ដែលជាជនងាយរងគ្រោះដោយកាត់បន្ថយឱ្យបានជាអតិបរមា នូវការជួបជុំគ្នាដែលអាចជាកក្តាហានិភ័យខ្ពស់ក្នុងការចម្លងវីរុសកូវីដ១៩»។
ចំណែកការទិញសំបុត្រ ម្ចាស់រោងភាពយន្ត ឬរោងសម្តែងសិល្បៈ ត្រូវរិះរកវិធានការ លើកទឹកចិត្តឱ្យទស្សនិកជនទិញសំបុត្រតាមអនឡាញ ឬតាមអែបរបស់ខ្លួន ដើម្បីកាត់បន្ថយការលក់សំបុត្រដោយផ្ទាល់នៅហ្នឹងកន្លែង តាមដែលអាចធ្វើទៅបាន។
ត្រូវរៀបចំដាក់សញ្ញាសម្គាល់ ដើម្បីឱ្យទស្សនិកជន ឈររង់ចាំដោយរក្សាគម្លាតឱ្យបានយ៉ាងតិច ១ម៉ែត្រកន្លះ ក្នុងករណីទស្សនិកជនទិញសំបុត្រផ្ទាល់នៅបញ្ជរលក់សំបុត្រ។
លោកស្រីភឿង សកុណា បន្ថែមថា ចំពោះការចល័តក្នុងរោងភាពយន្ត ឬរោងសម្តែងសិល្បៈ ត្រូវគោរពតាមស្លាកសញ្ញាចេញចូលនៃលំហូរ មនុស្សដែលបានដាក់បង្ហាញ។
ដើម្បីកាត់បន្ថយការចល័តចុះឡើង នៅក្នុងរោង ទស្សនិកជន ដែលមានបំណងទិញអាហារសម្រន់ ឬចូលបន្ទប់ទឹក ត្រូវធ្វើឱ្យបានមុនពេលចូលក្នុងរោងបញ្ចាំង ឬសម្តែង។
លោកស្រីថ្លែងថា៖«ត្រូវកាត់បន្ថយចំនួនទស្សនិកជនដែលមកមុនម៉ោងយូរពេក ដើម្បីចៀសវាងការប្រមូលផ្តុំ និងការចល័តក្នុងបរិវេណរោងភាពយន្ត ឬរោងសម្តែងសិល្បៈច្រើនពេក ឬស្នើសុំឱ្យទស្សនិកជន ចាំនៅខាងក្រៅបរិវេណរោង ក្នុងករណីមកមុនម៉ោង» ។
រីឯការសម្អាតអនាម័យ លោកស្រីប្រាប់ថា ត្រូវដាក់ទឹកអាល់កុលលាងដៃ សម្រាប់ទស្សនិកជន នៅតាមកន្លែងសំខាន់ៗ ក្នុងបរិវេនរោងភាពយន្ត ឬរោងសម្តែងសិល្បៈ។ ត្រូវលាងសម្អាតមេរោគឱ្យបានញឹកញាប់ នៅបញ្ជរនិងកន្លែងបិទបើកទ្វារ នៅពេលបញ្ចាំង ឬសម្តែងចប់ម្តងៗ។
ដោយឡែក ចំពោះការទិញអាហារសម្រន់ ត្រូវសម្អាតកន្លែងលក់អាហារសម្រន់ និងរក្សាឱ្យមានអនាម័យជាប្រចាំ។
អ្នកលក់ត្រូវពាក់ម៉ាស់ និងពាក់ស្រោមដៃ។ រោងភាពយន្ត ឬរោងសម្តែង សិល្បៈ ត្រូវរកវិធានការបង់ប្រាក់ ដែលចៀសវាងការបង់ប្រាក់ដោយផ្ទាល់តាមដែលអាចធ្វើទៅបាន។
ត្រូវអនុញ្ញាតឱ្យទស្សនិកជនចូលបានតែ ៥០ ភាគរយ នៃចំនួនកៅអីសរុបតែប៉ុណ្ណោះ នៅក្នុងរោងបញ្ចាំងឬរោងសម្តែងសិល្បៈនីមួយៗ និងត្រូវរក្សាគម្លាត រវាងទស្សនិកជនពីម្នាក់ទៅម្នាក់ទៀត យ៉ាងតិច ចន្លោះមួយម៉ែត្រ
កន្លះ។
ប៉ុន្តែក្នុងករណីទស្សនិកជនចូលទស្សនាជាលក្ខណៈគ្រួសារ ដែលមានសមាជិក មិនលើសពី៥ នាក់ អាចអនុញ្ញាតឱ្យអង្គុយក្បែរគ្នាបាន។
ជាមួយគ្នានោះ ទ្វារនៃរោងបញ្ចាំង រោងសម្តែងសិល្បៈ ត្រូវទុកឱ្យចំហមុននឹងចាប់បញ្ចាំងភាពយន្ត ឬសម្តែង សិល្បៈម្តង និង ត្រូវរក្សាសីតុណ្ហភាពក្នុងរោងបញ្ចាំងឬរោងសម្តែងសិល្បៈ ជាមធ្យមចន្លោះពី ២៤ទៅ ៣០អង្សារ ។ ត្រូវកាត់បន្ថយម៉ោងបញ្ចាំង ឬម៉ោងសម្តែង ដើម្បីទុកចន្លោះពេល យ៉ាងតិច ៣០ នាទី សម្រាប់ការសម្អាត រោងបញ្ចាំង ឬរោងសម្តែង មុននឹងបន្តចាក់បញ្ចាំង ភាពយន្ត ឬសម្តែងសិល្បៈជាថ្មី៕
វីដេអូ៖