ភ្នំពេញៈ លោកនាយករដ្ឋមន្ត្រី ហ៊ុន សែន នឹងដឹកនាំកិច្ចប្រជុំកំពូលអាស៊ី-អឺរ៉ុបលើកទី១៣ (ASEM13) នៅថ្ងៃទី ២៥-២៦ ខែវិច្ឆិកា ដែលកម្ពុជានឹងធ្វើជាម្ចាស់ផ្ទះ តាមរយៈប្រព័ន្ធវីដេអូពីវិមានសនិ្តភាព ហើយកម្ពុជាប្តេជ្ញាជំរុញពហុភាគីនិយមដើម្បីដោះស្រាយបញ្ហាប្រឈមជាសកល។
សេចក្តីប្រកាសព័ត៌មានរបស់ក្រសួងការបរទេសកាលពីថ្ងៃទី ២៣ ខែវិច្ឆិកា បានឱ្យដឹងថា៖ «ការធ្វើជាម្ចាស់ផ្ទះរៀបចំកិច្ចប្រជុំកំពូល ASEM១៣ ឆ្លុះបញ្ចាំងឱ្យឃើញពីការប្តេជ្ញាចិត្តខ្ពស់បំផុតរបស់កម្ពុជា ក្នុងការជំរុញពហុភាគីនិយមក៏ដូចជាការចូលរួមយ៉ាងសកម្មតាមតែអាចធ្វើទៅបានរបស់ខ្លួននៅក្នុងសហគមន៍អន្តរជាតិ ដើម្បីដោះស្រាយបញ្ហាប្រឈមជាសកលនាពេលបច្ចុប្បន្ន និងកំពុងលេចឡើងថ្មីៗនេះ»។
កិច្ចប្រជុំកំពូល ASEM13 ក្រោមមូលបទ «ការពង្រឹងពហុភាគីនិយមដើម្បីកំណើនរួមគ្នា» នឹងមានការចូលរួមពីប្រមុខរដ្ឋ ប្រមុខរដ្ឋាភិបាល និងអ្នកតំណាងជាន់ខ្ពស់របស់ប្រទេសដៃគូ ASEM ទាំង ៥១ មកពីអាស៊ី និងអឺរ៉ុប ប្រធានក្រុមប្រឹក្សាអឺរ៉ុប ប្រធានគណៈកម្មការអឺរ៉ុប និងអគ្គលេខាធិការអាស៊ាន។ កិច្ចប្រជុំនេះនឹងផ្តល់ឱកាសដ៏ទាន់ពេលវេលាមួយដល់ថ្នាក់ដឹកនាំមកពីតំបន់អាស៊ី និងអឺរ៉ុប ដើម្បីបញ្ជាក់ជាថ្មីអំពីសារៈសំខាន់នៃកិច្ចសហប្រតិបត្តិការអាស៊ី-អឺរ៉ុប ក្នុងការចូលរួមដោះស្រាយបញ្ហាសកល និងតំបន់សម្រាប់ផលប្រយោជន៍ទៅវិញទៅមក។ ក្នុងនោះរួមទាំងបញ្ហាការរីករាលដាលនៃជំងឺកូវីដ ១៩ និងផលប៉ះពាល់ដល់សង្គម-សេដ្ឋកិច្ចបណ្តាលមកពីជំងឺនេះផងដែរ។
ក្នុងអំឡុងពេលកិច្ចប្រជុំរយៈពេល ២ ថ្ងៃនេះ ថ្នាក់ដឹកនាំ ASEM នឹងពិភាក្សាអំពីតួនាទីរបស់ ASEM ក្នុងការលើកកម្ពស់ពហុភាគីនិយម ដោយផ្តោតលើប្រធានបទពាក់ព័ន្ធ រួមមាន ASEM ក្នុងគម្រប់ខួប ២៥ ឆ្នាំ៖ សមិទ្ធផល បញ្ហាប្រឈម និងទិសដៅនាពេលអនាគត ការធ្វើឱ្យប្រសើរឡើងវិញនូវដំណើរការពហុភាគីនិយមដើម្បីសន្តិភាព និងស្ថិរភាពសកល ការពង្រឹងប្រព័ន្ធពាណិជ្ជកម្មផ្អែកលើវិធានច្បាប់ កំណើន និងការអភិវឌ្ឍប្រកបដោយចីរភាព និងបរិយាប័ន្ន, ការតភ្ជាប់ ស្ត្រី សន្តិភាព និងសន្តិសុខ និងការប្រែប្រួលអាកាសធាតុ។
ថ្នាក់ដឹកនាំ ASEM នឹងពិភាក្សាផងដែរអំពីជំងឺកូវីដ- ១៩ និងការស្ដារ និងអភិវឌ្ឍសង្គម-សេដ្ឋកិច្ច ឡើងវិញ ដោយផ្តោតលើការដោះស្រាយបញ្ហាប្រឈមបង្កឡើងដោយជំងឺកូវីដ ១៩ ការពន្លឿន ការស្ដារសង្គម-សេដ្ឋកិច្ចឡើងវិញក្រោយវិបត្តិកូវីដ ១៩ ដើម្បីកំណើនរួមគ្នា និងការកសាងឡើងវិញនូវអនាគតប្រកបដោយភាពធន់។
ASEM ១៣ នឹងអនុម័តឯកសារលទ្ធផលសំខាន់ៗចំនួន ៣ រួមមានសេចក្តីថ្លែងការណ៍ប្រធានអង្គប្រជុំ ASEM១៣ សេចក្តីថ្លែងការណ៍ទីក្រុងភ្នំពេញស្តីពីការស្តារសង្គម-សេដ្ឋកិច្ចឡើងវិញ ក្រោយការរាតត្បាតនៃជំងឺកូវីដ ១៩ និងឯកសារសកម្មភាពអនាគតស្តីពីការតភ្ជាប់ ASEM។
លោក ហេង គីមគង់ អ្នកស្រាវជ្រាវជាន់ខ្ពស់នៃមជ្ឈមណ្ឌលអភិវឌ្ឍន៍កម្ពុជា ប្រាប់ ភ្នំពេញប៉ុស្ត៍ថា កម្ពុជាក៏អាចមានឱកាសពិភាក្សាជាមួយបណ្តាប្រទេសអឺរ៉ុបនូវបញ្ហាសំខាន់ៗមួយចំនួនដែលជះឥទ្ធិពលដល់ប្រទេសកម្ពុជា និងតំបន់ទាំងមូលក៏ដូចជាបញ្ហាសំខាន់របស់ អឺរ៉ុប និងពិភពលោកទាំងមូល។
លោកថ្លែងថា៖ «សង្ឃឹមថាបន្ទាប់ពីកិច្ចប្រជុំនេះ កម្ពុជានឹងអាចទាក់ទាញភ្ញៀវទេសចរកាន់តែច្រើន និងការវិនិយោគផ្ទាល់ពីបរទេស ដើម្បីជំរុញកំណើនសេដ្ឋកិច្ចរបស់ខ្លួនក្រោយវិបត្តិជំងឺរាតត្បាត»។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ី ថ្លែងថាការធ្វើជាម្ចាស់ផ្ទះ គឺជាមោទនភាពរបស់កម្ពុជា ដែលត្រូវបានជ្រើសជាប្រធានដឹកនាំកិច្ចប្រជុំ ASEM នៅឆ្នាំនេះ។ ដំណើរការកិច្ចប្រជុំនឹងជួយពង្រីក និងផ្សព្វផ្សាយបន្ថែមទៀតទៅកាន់សហគមន៍អឺរ៉ុបអំពីកម្ពុជា៕