គ្រូពេទ្យចាក់វ៉ាក់សាំង AstraZeneca ដូសទី៣ ដល់ពលរដ្ឋកាលពីខែសីហា នៅខណ្ឌទួលគោក។ ហុង មិនា
ភ្នំពេញៈ ក្រសួងសុខាភិបាលកំពុងពិភាក្សា និងរង់ចាំមើលលទ្ធផលនៃការសិក្សាស្រាវជ្រាវរបស់អ្នកវិទ្យាសាស្ត្រ ដើម្បីពិនិត្យមើលលើការចាក់វ៉ាក់សាំងកូវីដ-១៩ ថា តើចាប់ពីឆ្នាំ ២០២២ ខាងមុខនេះ ការចាក់វ៉ាក់សាំងកូវីដអាចនឹងត្រូវចាក់ជាប្រចាំឆ្នាំ ឬត្រូវចាក់ក្នុងរយៈពេល ៦ ខែម្តង នេះបើយោងតាមមន្ត្រីក្រសួងសុខាភិបាល។
អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) លោកស្រី ឱ វណ្ណឌីន បានថ្លែងកាលពីថ្ងៃទី ២៣ ខែវិច្ឆិកា ថាទោះបីជាយុទ្ធនាការចាក់វ៉ាក់សាំងកូវីដ ១៩ ជុំទី១ នៅទូទាំងប្រទេសត្រូវបានបិទបញ្ចប់ក៏ដោយ ប៉ុន្តែការចាក់វ៉ាក់សាំងនេះនៅតែបន្តនៅឡើយទេ។ ព្រោះក្រុមការងារនៅតែបន្តការងារចាក់នេះទៅដល់ក្រុមអាយុផ្សេងៗផង និងសម្រាប់ប្រជាពលរដ្ឋដែលនៅសេសសល់មិនទាន់បានចាក់ផង។ ដំណើរការចាក់វ៉ាក់សាំងនៅតែបន្តជារៀងរហូត។
លោកស្រីថ្លែងថា៖ «យើងកំពុងតែធ្វើការសិក្សា ក៏ដូចជាពិនិត្យមើល និងពិភាក្សាគ្នា ក្នុងកម្រិតបច្ចេកទេស ជាមួយនឹងអង្គការសុខភាពពិភពលោកផងដែរ។ ប៉ុន្តែមិនទាន់មានការបញ្ជាក់ ឬក៏ការណែនាំណាមួយច្បាស់លាស់ នៅឡើយទេថា តើនៅក្នុងឆ្នាំ ២០២២ ខាងមុខនេះយើងត្រូវអនុវត្តការចាក់វ៉ាក់សាំងជាប្រចាំ (Routine) ដោយលែងធ្វើយុទ្ធនាការហើយ សម្រាប់ការចាក់ដូសរំឭក»។
.jpg)
មន្ត្រីនាំពាក្យរូបនេះបញ្ជាក់ថា៖ «ដូចនេះតើការចាក់ដូសរំឭកនេះ គួរត្រូវធ្វើដូចការចាក់វ៉ាក់សាំងផ្តាសាយធម្មតាដូចដែលបងប្អូនយើងមួយចំនួនធ្លាប់បានចាក់វ៉ាក់សាំងនេះជាប្រចាំឆ្នាំ។ អ៊ីចឹង យើងសួរថា តើវ៉ាក់សាំងកូវីដ ១៩ នេះគួរត្រូវបានចាក់រំឭកជារៀងរាល់ឆ្នាំដែរ ឬក៏ត្រូវចាក់ក្នុងរយៈពេល ៦ ខែម្តងឬយ៉ាងណា?»។
ទាក់ទងនឹងចំណុចនេះ ខាងក្រសួងសុខាភិបាលកម្ពុជាកំពុងតែរង់ចាំការសិក្សាស្រាវជ្រាវឱ្យបានច្បាស់លាស់ពីអ្នកវិទ្យាសាស្ត្រ។ នៅពេលទទួលបាននូវលទ្ធផលច្បាស់លាស់ ហើយមានការសម្រេចពីលោកនាយករដ្ឋមន្ត្រី ហ៊ុន សែន ពេលនោះ គ.វ.ក-១៩ នឹងអនុវត្តទៅតាមការណែនាំនេះ។ នេះបើតាមការបញ្ជាក់ពីលោកស្រី ឱ វណ្ណឌីន។
ជាមួយគ្នានេះ លោកស្រីក៏បានអំពាវនាវទៅដល់អ្នកដែលមិនទាន់បានចាក់វ៉ាក់សាំងកូវីដ ១៩ ត្រូវទៅទទួលការចាក់វ៉ាក់សាំងនេះឱ្យបានគ្រប់ៗគ្នា។ ពិសេសអ្នកដែលមានផ្ទៃពោះ អ្នកដែលបំបៅកូនដោយទឹកដោះ អ្នកដែលជាពីជំងឺកូវីដ ១៩ បាន ៤ ខែឡើងទៅត្រូវទៅចាក់វ៉ាក់សាំង។
លោកស្រី ឱ វណ្ណឌីន ថ្លែងថា៖ «យើងត្រូវរួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩ នៅក្នុងបរិបទដែលយើងកំពុងតែបោះជំហានទៅរកការរស់នៅក្នុងប្រក្រតីភាពថ្មី។ ដូចនេះយើងត្រូវរួមគ្នាថែរក្សាឱ្យបាននូវនិរន្តរភាព ដោយសារយើងមិនចង់ឃើញមានការបិទខ្ទប់ មិនហ៊ានដើរចេញទៅណានោះឡើយ»។
មន្ត្រីដដែលបន្តថា ការផ្ទុះចេញនូវការចម្លងវីរុសកូវីដ ១៩ ក្នុងទ្រង់ទ្រាយធំ កើតចេញ ឬមិនចេញ គឺអាស្រ័យលើការប្រតិបត្តិរបស់ប្រជាពលរដ្ឋ ដោយទាមទារឱ្យមានការផ្លាស់ប្តូរឥរិយាបថ និងទម្លាប់របស់ប្រជាពលរដ្ឋ ចំពោះការរស់នៅរបស់ខ្លួនឱ្យស្របទៅនឹងពាក្យថា «ប្រក្រតីភាពថ្មី» ដែលគ្រប់គ្នាត្រូវរៀនរស់ជាមួយនឹងវត្តមានរបស់វីរុសកូវីដ ១៩ និងប្រកាន់ឱ្យបាននូវវិធានការការពារខ្លួនឱ្យបានត្រឹមត្រូវ។
របាយការណ៍របស់ក្រសួងសុខាភិបាលបានឱ្យដឹងថា អត្រាចាក់វ៉ាក់សាំងកូវីដ ១៩ នៅកម្ពុជា គិតត្រឹមថ្ងៃទី ២៣ ខែវិច្ឆិកា ឆ្នាំ ២០២១ ប្រជាជនអាយុពី ១៨ ឆ្នាំឡើងមាន ១០០,៧៥% ធៀបនឹងចំនួនប្រជាជនគោលដៅ ១០ លាននាក់។ សម្រាប់លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់បានចំនួន ៨៨,១៧%៕
វីដេអូ៖
