ពិធីប្រគល់បណ្ណសរសើរមេត្រីភាពបរិស្ថានដល់ប្រតិបត្តិករ កាលពីថ្ងៃទី២៤ វិច្ឆិកា ។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថានមានបេសកកម្មជាច្រើនក្នុងវិស័យនេះក្នុងនោះការលើកកម្ពស់ប្រតិបត្តិមេត្រីភាពបរិស្ថានគឺជាកិច្ចការមួយដ៏សំខាន់ធ្វើយ៉ាងណាឱ្យកម្ពុជាមានបរិស្ថានស្អាត មានភាពបៃតង និងមានភាពស៊ីវិល័យ។ នេះជាការថ្លែងរបស់លោក សាយ សំអាល់ រដ្ឋមន្ត្រីក្រសួងបរិស្ថានក្នុងពេលប្រគល់នូវបណ្ណសរសើរមេត្រីភាពបរិស្ថានទៅដល់ប្រតិបត្តិករ ជានីតិបុគ្គល និងរូបវន្តបុគ្គលឆ្នើម សរុបចំនួន ២៣០ នាក់។
លោក សាយ សំអាល់ បានលើកឡើងក្នុងពិធីលើកទឹកចិត្តមេត្រីភាពបរិស្ថាន ក្រោមប្រធានបទ «រួមគ្នាដើម្បីមេត្រីភាពបរិស្ថាន»កាលពីរសៀលថ្ងៃទី២៤ ខែវិច្ឆិកា ឆ្នាំ២០២១ថា ការងារនេះ អាចសម្រេចបាន ដរាបណាមានការចូលរួមពីគ្រប់តួអង្គពាក់ព័ន្ធនិងប្រជាពលរដ្ឋគ្រប់រូប។ ជាប្រវត្តិសាស្ត្រថ្មីរបស់កម្ពុជា ប្រជាពលរដ្ឋចាប់ផ្តើមស្គាល់អំពីសក្ដានុពលនិងសម្រស់ប្រទេសកម្ពុជាដែលមានតំបន់ទេសចរណ៍សម្បូរបែបជាពិសេសទេសភាពបែបធម្មជាតិ។
លោកបានបញ្ជាក់ថា៖ «ផ្តើមចេញពីកត្តានេះបង្កើតនូវមនសិការស្រឡាញ់ទឹកដីនិងធម្មជាតិក្នុងប្រទេស ដែលជាមូលដ្ឋានគ្រឹះជំរុញឱ្យកិច្ចគាំពារបរិស្ថាន និងការអភិរក្សធនធានធម្មជាតិ ទទួលបានជោគជ័យ»។
.jpg)
លោករដ្ឋមន្ត្រីក៏បានថ្លែងអំណរគុណចំពោះការចូលរួមប្រតិបត្តិមេត្រីភាពបរិស្ថានរបស់ប្រតិបត្តិករទាំអស់ដែលបានចូលរួមជាមួយក្រសួងបរិស្ថាន ហើយលោក សាយ សំអាល់ ក៏បានស្នើឱ្យប្រតិបត្តិករទាំងអស់បន្តសកម្មភាពនេះជាមួយក្រសួងបរិស្ថានទៀតដើម្បីរួមគ្នាលើកម្ពស់កិច្ចគាំពារបរិស្ថាន ការអភិរក្សជីវចម្រុះ ការប្រើប្រាស់ធនធានធម្មជាតិឱ្យមាននិរន្តរភាព និងការរស់នៅដោយចីរភាព នៅកម្ពុជា។
នាឱកាសនោះដែរ លោក ជួប ប៉ារីស៍ អគ្គនាយកនៃអគ្គនាយកដ្ឋានចំណេះដឹងនិងព័ត៌មានបរិស្ថាន ក្រសួងបរិស្ថាន ក៏បានសម្ដែងនូវការដឹងគុណដល់អ្នកគាំទ្រ អ្នកឧបត្ថម្ភ និងប្រតិបត្តិករមេត្រីភាពបរិស្ថានទាំងអស់ ក្នុងបុព្វហេតុលើកម្ពស់បរិស្ថាន និងធនធានធម្មជាតិ។
លោកបានថ្លែងថា ៖ «កម្មវិធីនេះ ជាការផ្ដល់នូវការអបអរសាទរ ផ្សព្វផ្សាយ និងបំផុសឱ្យមានការចូលរួមកាន់តែច្រើន ដើម្បីប្រែក្លាយកម្ពុជាពោរពេញដោយពលរដ្ឋល្អ និងបរិស្ថានល្អ»។
គួរបញ្ជាក់ផងដែរថា ក្រសួងបរិស្ថានដែលមាននាយកដ្ឋានរង្វាន់និងលើកទឹកចិត្តនៃអគ្គនាយកដ្ឋានចំណេះដឹង និងព័ត៌មានបរិស្ថានជាសេនាធិការបានរៀបចំកម្មវិធីលើកទឹកចិត្តមេត្រីភាពបរិស្ថានប្រចាំឆ្នាំដើម្បីផ្តល់បណ្ណសរសើរមេត្រីភាពបរិស្ថានជូនដល់ប្រតិបត្តិករដែលបានចូលរួមប្រតិបត្តិមេត្រីភាពបរិស្ថានបានល្អប្រសើរ។
បើតាមក្រសួងបរិស្ថាន ការបង្កើតកម្មវិធីនេះឡើងដើម្បីជំរុញការចូលរួមពីប្រតិបត្តិករ ជានីតិបុគ្គល និងរូបវន្តបុគ្គល មកពីគ្រប់វិស័យមិនថាវិស័យសាធារណៈ វិស័យឯកជន ឬគ្រឹះស្ថាននានា ក្នុងកិច្ចគាំពារបរិស្ថាន ការអភិរក្សជីវចម្រុះ ការប្រើប្រាស់ធនធានធម្មជាតិឱ្យមាននិរន្តរភាព និងការរស់នៅដោយចីរភាព។
ព្រះចៅអធិការវត្តសិរិសាគរដូនស្តើង ដែលស្ថិតក្នុងខេត្តព្រៃវែង ព្រះអង្គ អ៊ឹម ទៀង ដែលទទួលបានបណ្ណសរសើរមេត្រីភាពបរិស្ថានពីក្រសួងបរិស្ថាន មានសង្ឃដីកាប្រាប់កាសែតភ្នំពេញប៉ុស្តិ៍នៅថ្ងៃទី២៥ ខែវិច្ឆិកា ថា ព្រះអង្គមានព្រះទ័យត្រេកអរជាខ្លាំង ហើយព្រះអង្គយល់ថាប្រទេសកម្ពុជាពិតជាត្រូវការអ្នកដែលស្រឡាញ់ចូលចិត្ត និងចូលរួមអភិរក្សការពារបរិស្ថានយ៉ាងក្រៃលែងបំផុត។
ព្រះអង្គ អ៊ឹម ទៀង មានថេរដីកាថា៖«ការផ្តល់នូវបណ្ណសរសើរនេះគឺជាការលើកទឹកចិត្តដល់អាត្មាក៏ដូចជាដល់ពុទ្ធបរិស័ទផ្សេងៗទៀតដែលស្រឡាញ់និងអភិរក្សបរិស្ថានរបស់យើង។នេះជាលើកទី១ដែលយើងទទួលបានបណ្ណសរសើរថ្នាក់ជាតិ ហើយកន្លងមកយើងធ្លាប់បានទទួលបណ្ណសរសើរពីមន្ទីរនិងថ្នាក់ដឹកនាំតាមខេត្ត»។
ព្រះអង្គបានបន្ថែមថាព្រះអង្គនឹងបន្តជួយធ្វើការងារនេះដល់ប្រជាពលរដ្ឋនៅជុំវិញវត្តអារាមរបស់ព្រះអង្គ តាមរយៈនិមន្តទេសនា និងការបរិច្ចាគជាដើម។
ចំណែកលោក យូសុះ អាប់ឌុលរ៉ាស់ហ៊ីម អាយុ ២៨ ឆ្នាំ ដែលជាអ្នកថតរូប និងវីដេអូនៃកាសែត ភ្នំពេញ ប៉ុស្តិ៍ ដែលទទួលបានបណ្ណសរសើរមេត្រីភាពបរិស្ថាននេះដែរក៏បានឱ្យដឹងផងដែរថា កម្មវិធីនេះពិតជាកម្មវិធីមួយដ៏ល្អដោយសារជាការលើកទឹកចិត្តដល់អ្នកថតរូប ដូចជា រូបលោក និងអ្នកថតរូបជាច្រើនទៀតឱ្យមានការខិតខំប្រឹងប្រែងផ្ដិតរូបភាពស្អាតៗក៏ដូចជា ផ្សព្វផ្សាយពីបរិស្ថាន តំបន់ទេសចរណ៍នានា រូបសត្វព្រៃផ្សេងៗជាច្រើនឱ្យប្រជាពលរដ្ឋក្នុងស្រុកនិងអន្តរជាតិបានស្គាល់ពីកម្ពុជា។
លោកបានប្រាប់ថា៖«នេះជាលើកទី១ដែលខ្ញុំបានចូលរួមក្នុងនាមជាអ្នកថតរូបម្នាក់ប៉ុណ្ណោះ តែលើកនេះខ្ញុំមានកិត្ដិយសណាស់ដែលទទួលលិខិតប័ណ្ណសរសើរពីក្រសួងបរិស្ថានហើយខ្ញុំចង់ឱ្យក្រសួងរៀបចំកម្មវិធីនេះជារៀងរាល់ឆ្នាំតែម្តង»។
នៅឆ្នាំ ២០២១ នេះ ប្រតិបត្តិករមេត្រីភាពបរិស្ថានឆ្នើមសរុបជាង ២០០ នេះ ដែលទទួលបានបណ្ណសរសើរមេត្រីភាពបរិស្ថានមកពីចម្រុះវិស័យ រួមមាន ជាអាទិ៍ នីតិបុគ្គល ដូចជា ក្រុមហ៊ុនផលិតភេសជ្ជៈ ក្រុមហ៊ុនទូរស័ព្ទចល័ត ក្រុមហ៊ុនអចលនទ្រព្យ ធនាគារ ផលិតកម្ម រមណីយដ្ឋាន ភោជនីយដ្ឋាន ឬគ្រឹះស្ថានសាធារណៈផ្សេងៗជាដើម និងរូបវន្តបុគ្គលមានដូចជា អ្នកថតរូប សិល្បករ តន្ត្រីករ ផលិតករ ឬបុគ្គលសាធារណៈផ្សេងៗទៀត៕
វីដេអូ៖
