ភ្នំពេញៈសាលារាជធានីភ្នំពេញនឹងផ្អាកចរាចរណ៍ជាបណ្តោះអាសន្នដោយមិនអនុញ្ញាតឱ្យយានជំនិះគ្រប់ប្រភេទឆ្លងកាត់ចាប់ពីមុខព្រះដំណាក់តាមរុក្ខវិថីសម្តេចប៉ាន (ផ្លូវលេខ ២១៤) ឆ្ពោះទៅមហាវិថីព្រះនរោត្តម (ផ្លូវលេខ ៤១) បន្តទៅវិមានឯករាជ្យ មហាវិថីព្រះសីហនុ នាគបាញ់ទឹក មហាវិថីសម្តេចសុធារស ចាប់ពីម៉ោង ៥:០០ នាទីថ្ងៃទី ៨ ខែធ្នូ រហូតដល់ចប់កម្មវិធីដើម្បីរៀបចំពិធីដង្ហែព្រះសពសម្តេចក្រុមព្រះ នរោត្តម រណឫទ្ធិ។
លោក ឃួង ស្រេង អភិបាលរាជធានីភ្នំពេញ បានជូនដំណឹងនារសៀលថ្ងៃទី ៧ ខែធ្នូនេះពីការបញ្ចៀសចរាចរណ៍យានយន្តគ្រប់ប្រភេទជាបណ្តោះអាសន្នក្នុងព្រះរាជពិធីបុណ្យព្រះសពសម្តេចក្រុមព្រះ នរោត្តម រណឫទ្ធិ ប្រធានក្រុមឧត្តមប្រឹក្សាផ្ទាល់ព្រះមហាក្សត្រ។
លោកបានលើកឡើងថា នៅថ្ងៃទី៨ ខែធ្នូ ឆ្នាំ ២០២១ ចាប់ពីម៉ោង ៥:០០ នាទី រដ្ឋបាលរាជធានីភ្នំពេញសហការជាមួយគណៈកម្មាធិការរៀបចំបុណ្យជាតិ-អន្តរជាតិនឹងមានរៀបចំពិធីដង្ហែនិងបូជាព្រះសពសម្តេចក្រុមព្រះនរោត្តម រណឫទ្ធិ ចេញពីព្រះដំណាក់ ឆ្ពោះទៅមុខវត្តបទុមវតី។
ដើម្បីឱ្យកម្មវិធីខាងលើប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀសបាននូវការកកស្ទះចរាចរណ៍ រដ្ឋបាលរាជធានីភ្នំពេញនឹងផ្អាកចរាចរណ៍ជាបណ្តោះអាសន្ន ដោយមិនអនុញ្ញាតឱ្យយានជំនិះគ្រប់ប្រភេទឆ្លងកាត់ចាប់ពីមុខព្រះដំណាក់តាមរុក្ខវិថីសម្តេចប៉ាន (ផ្លូវលេខ ២១៤) ឆ្ពោះទៅមហាវិថីព្រះនរោត្តម (ផ្លូវលេខ ៤១) បន្តទៅវិមានឯករាជ្យ មហាវិថីព្រះសីហនុ នាគបាញ់ទឹក មហាវិថីសម្តេចសុធារស។
លោក ឃួង ស្រេង បានបញ្ជាក់ថា ៖ «សូមបងប្អូនប្រជាពលរដ្ឋដែលជាម្ចាស់យានយន្តគ្រប់ប្រភេទ និងម្ចាស់អាជីវកម្មទាំងអស់ ដែលធ្វើដំណើរឆ្លងកាត់នៅតាមដងផ្លូវទាំងនេះ មេត្តាយោគយល់ អធ្យាស្រ័យ និងបញ្ចៀសការធ្វើដំណើរឆ្លងកាត់តាមទីតាំងនិងកាលបរិច្ឆេទនេះ។ ផុតរយៈពេលហាមឃាត់បណ្តោះអាសន្ននេះ រដ្ឋបាលរាជធានីភ្នំពេញ នឹងបើកឱ្យធ្វើចរាចរណ៍ជាធម្មតាវិញ»។
សម្តេចក្រុមព្រះ នរោត្តម រណឫទ្ធិ បានសោយទិវង្គតដោយព្រះរោគាពាធនាក្រុងប៉ារីស ប្រទេសបារាំង ក្នុងព្រះជន្មាយុ ៧៧ ព្រះវស្សា ហើយព្រះសពរបស់ព្រះអង្គត្រូវបានយាងដង្ហែមកកាន់ប្រទេសកម្ពុជាកាលពីថ្ងៃទី ៥ ខែធ្នូ ឆ្នាំ ២០២១ តាមជើងហោះហើរពិសេសពីសាធារណរដ្ឋបារាំង៕