ព្រះសីហនុៈ នគរបាលព្រហ្មទណ្ឌខេត្តព្រះសីហនុ នៅថ្ងៃទី ៧ ធ្នូ កំពុងបន្តធ្វើការស៊ើបអង្កេតជុំវិញអំពើឃាតកម្មបាញ់សម្លាប់បុរសជនជាតិចិនម្នាក់ នៅក្នុងផ្ទះល្វែងមួយនៃបុរី ប៊្លូស្កាយ ស្ថិតក្នុងភូមិ៥ សង្កាត់លេខ៤ កាលពីថ្ងៃទី ៤ ធ្នូ ឆ្នាំ ២០២១។
លោក ណុប បញ្ញា ស្នងការរងទទួលបន្ទុកផ្នែកព្រហ្មទណ្ឌនៃស្នងការដ្ឋាននគរបាលខេត្តព្រះសីហនុបានឱ្យដឹងនៅថ្ងៃទី ៧ ធ្នូ ថា ជនរងគ្រោះដែលស្លាប់ឈ្មោះ JIKE MUNAI ភេទប្រុស អាយុ ២១ ឆ្នាំ។ ជនរងគ្រោះជួលផ្ទះស្នាក់នៅបណ្តោះអាសន្នក្នុងបុរីប៊្លូស្កាយក្នុងភូមិ៥ សង្កាត់លេខ ៤។ លោកថ្លែងថា៖ «ករណីនេះ សមត្ថកិច្ចរបស់យើងកំពុងបើកការស៊ើបអង្កេតយ៉ាងសកម្ម។ ការងារនេះដឹកនាំស្រាវជ្រាវដោយលោកឧត្តមសេនីយ៍ទោស្នងការ ជួន ណារិន្ទ»។
ទោះយ៉ាងណាលោក ណុប បញ្ញា មិនបានផ្តល់ព័ត៌មានលម្អិតជុំវិញដំណើររឿងនៃអំពើឃាតកម្មនេះទេ។ តែបើតាមមន្ត្រីនគរបាលក្រុងព្រះសីហនុ ១ រូប ស្នើមិនឱ្យបញ្ចេញឈ្មោះ ប្រាប់ភ្នំពេញប៉ុស្តិ៍នៅថ្ងៃទី ៧ ធ្នូថា កាលពីវេលាម៉ោងជាង ៣ រសៀល ថ្ងៃទី ៤ ធ្នូ ឆ្នាំ ២០២១ មានប្រជាពលរដ្ឋម្នាក់ បានឃើញទ្វារផ្ទះជនរងគ្រោះចំហ ហើយបានអើតមើលក៏ប្រទះឃើញជនរងគ្រោះដេកស្លាប់ នៅលើឥដ្ឋនៅក្បែរសាឡុងមួយ។ គ្រានោះពលរដ្ឋបានរាយការណ៍ប្រាប់នគរបាលប៉ុស្តិ៍សង្កាត់លេខ ៤។
ក្រោយពីពិនិត្យ និងធ្វើកោសល្យវិច័យលើសាកសព ដោយនគរបាលបច្ចេកទេសវិទ្យាសាស្ត្រនៃស្នងការដ្ឋាននគរបាលខេត្តព្រះសីហនុ និងគ្រូពេទ្យមក បានបង្ហាញលទ្ធផលថា ជនរងគ្រោះត្រូវបានជនដៃដល់ប្រើកាំភ្លើងខ្លីបាញ់ត្រូវក្បាលជង្គង់ទាំងសងខាង និងភ្លៅ ដែលសរុប ៣ គ្រាប់។ ស្របពេលនោះ សមត្ថកិច្ចជំនាញក៏បានរកឃើញសម្បកគ្រាប់បាញ់រួចចំនួន ១ នៅក្បែរសាកសពផងដែរ។
ប្រភពដដែលបន្តថា៖ «ករណីនេះសមត្ថកិច្ចជំនាញ នៅមិនទាន់កំណត់បានថា ជាគំនុំ ឬជារឿងអ្វីមួយឱ្យច្បាស់នៅឡើយទេព្រោះមិនទាន់ចាប់ជនដៃដល់បាន។ តែបើគ្មានទំនាស់ ជនល្មើសក៏មិនសម្លាប់ជនរងគ្រោះដែរ»។ មន្ត្រីនគរបាលបញ្ជាក់ថា បន្ទាប់ពីសមត្ថកិច្ចជំនាញ និងគ្រូពេទ្យពិនិត្យ និងធ្វើកោសល្យវិច័យរួចមក សមត្ថកិច្ចបានយកសាកសពទៅបន្ទប់រក្សាសព នៅមន្ទីរពេទ្យបង្អែកក្រុងព្រះសីហនុ ដើម្បីរង់ចាំគ្រួសារសពមកទទួលយក៕