រថយន្តពន្លត់អគ្គិភ័យដែលជាជំនួយរបស់រាជរដ្ឋាភិបាលជប៉ុន។ រូបថត នគរបាល
ភ្នំពេញៈ ជប៉ុនបានផ្ដល់រថយន្តពន្លត់អគ្គិភ័យចំនួន ៤ គ្រឿងដល់អង្គភាពការិយាល័យនគរបាលបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ ដើម្បីចូលរួមចំណែកធ្វើឱ្យប្រសើឡើងនូវប្រសិទ្ធភាពការងារឆ្លើយតប និងការកាត់បន្ថយនូវហានិភ័យនានា ដែលបង្កឡើងដោយគ្រោះអគ្គិភ័យនៅកម្ពុជា ពិសេសក្នុងរាជធានីភ្នំពេញ។
លោក ព្រំ យ៉ន ប្រធានការិយាល័យនគរបាល បង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានី-ភ្នំពេញបានប្រាប់ភ្នំពេញប៉ុស្តិ៍ថា ពិធីប្រគល់ និងទទួលនូវជំនួយរថយន្តពន្លត់អគ្គិភ័យទាំង ៤ គ្រឿងនោះ ត្រូវបានធ្វើឡើងនៅព្រឹកថ្ងៃទី ២៤ ខែមករា ឆ្នាំ ២០២២ នៅស្នងការដ្ឋាននគរបាលរាជធានីភ្នំពេញក្រោមអធិបតីភាពរបស់លោក MIKAMI MASAHIRO ឯកអគ្គរាជទូតជប៉ុនប្រចាំនៅព្រះរាជាណាចក្រកម្ពុជា និងលោក ឃួង ស្រេង អភិបាលរាជធានីភ្នំពេញ។
លោក ព្រំ យ៉ន បានថ្លែងថា៖ «បច្ចុប្បន្ន រាជធានីភ្នំពេញមានការអភិវឌ្ឍរីកចម្រើនខ្លាំងលើវិស័យសំណង់អគារពាណិជ្ជកម្មធំៗ និងរួមទាំងសណ្ឋាគារ ក្លិបកម្សាន្ត និងរោងចក្រសហគ្រាសយ៉ាងស្គុសស្គាយ។ ស្របពេលនៃដំណើរការអភិវឌ្ឍន៍ជឿនលឿននេះ បញ្ហាគ្រោះអគ្គិភ័យក៏មានការកើតមានឡើងជាញឹកញាប់ផងដែរ ពិសេសក្នុងរដូវក្ដៅនេះ។ ហេតុដូច្នេះជំនួយជារថយន្តពន្លត់អគ្គិភ័យទាំង ៤ គ្រឿងរបស់រាជរដ្ឋាភិបាល និង ប្រជាជនជប៉ុននាពេលនេះ នឹងជួយសម្រួលដល់ប្រសិទ្ធភាពការងាររបស់កងកម្លាំងនគរបាលបង្ការ ពន្លត់អគ្គិភ័យ និងសង្គ្រោះក្នុងរាជធានីភ្នំពេញរបស់យើងបានកាន់តែប្រសើរថែមទៀត»។
.jpg)
លោក ព្រំ យ៉ន ថ្លែងថា ក្នុងចំណោមរថយន្តពន្លត់អគ្គិភ័យទាំង ៤ គ្រឿងនោះ មាន ២ គ្រឿងជារថយន្តខ្នាតធំ ក្នុងនោះ ១ គ្រឿងមានជណ្តើរសម្រាប់ប្រើប្រាស់ជួយសង្គ្រោះប្រជាពលរដ្ឋ ដែលជាប់គាំងនៅលើអគារកម្ពស់ ៤០ ម៉ែត្រ មិនអាចចុះមកខាងក្រោម ចំណែក ១ ទៀតប្រើប្រាស់នូវម្សៅសាប៊ូសម្រាប់បាញ់ទឹកពន្លត់អគ្គិភ័យ រីឯ ២ គ្រឿងទៀតជារថយន្តពន្លត់អគ្គិភ័យខ្នាតតូច ប្រើសម្រាប់ដាក់ទឹកជាជំនួយក្នុងការពន្លត់អគ្គិភ័យ។
លោកបានបន្តថា តាមរយៈជំនួយរថយន្តពន្លត់អគ្គិភ័យ ៤ គ្រឿងពីប្រទេសជប៉ុននេះ បានធ្វើឱ្យចំនួនរថយន្តពន្លត់អគ្គិភ័យនៃអង្គភាពការិយាល័យនគរបាលបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញកើនដល់ ៩៣ គ្រឿងក្នុងនោះរថយន្តខ្នាតធំមានចំនួន ៤គ្រឿង និងកំពុងត្រូវបានដាក់ពង្រាយនៅតាមស្ថានីយរថយន្តប្រចាំការនៅទូទាំងរាជធានីភ្នំពេញចំនួន ៧ កន្លែង មានគោលដៅបូមទឹក ចំនួន ១១០ ទីតាំង។
បច្ចុប្បន្ន អង្គភាពការិយាល័យនគរបាលបង្ការ ពន្លត់អគ្គិភ័យ និងសង្គ្រោះរាជធានីភ្នំពេញ មានកម្លាំងសរុប ១០៤ នាក់ក្នុងនោះមានបុគ្គលិកកិច្ចសន្យា ចំនួន ៣៧ នាក់សម្រាប់អន្តរាគមន៍ឆ្លើយតបក្នុងមូលដ្ឋានប្រជាពលរដ្ឋក្នុងករណីមានគ្រោះអគ្គិភ័យកើតឡើង។
នៅក្នុងឱកាសនៃពិធីប្រគល់ និងទទួលរថយន្តពន្លត់អគ្គិភ័យទាំង ៤ គ្រឿងនោះ លោក MIKAMI MASAHIRO ឯកអគ្គរាជទូតជប៉ុនប្រចាំកម្ពុជាបានថ្លែងថា រថយន្តពន្លត់អគ្គិភ័យទាំង ៤ គ្រឿងនេះនឹងជួយសម្រួលការងាររបស់មន្ត្រីនគរបាលកងពន្លត់អគ្គិភ័យក្នុងប្រតិបត្តិការពន្លត់អគ្គិភ័យនៅក្នុងរាជធានីភ្នំពេញ ប្រកបដោយប្រសិទ្ធភាពខ្ពស់។
ទន្ទឹមនឹងនេះ លោក MIKAMI MASAHIRO បានសម្ដែងនូវភាពជឿជាក់យ៉ាងមុតមាំថា៖ «រថយន្តពន្លត់អគ្គិភ័យទាំង ៤ គ្រឿងនេះនឹងត្រូវបានប្រើប្រាស់បានយូរអង្វែង និងប្រកបដោយប្រសិទ្ធភាពក្នុងការកាត់បន្ថយនូវហានិភ័យនានា ដែលបង្កឡើងដោយគ្រោះអគ្គិភ័យ ក្នុងរាជធានីភ្នំពេញហើយវាគឺជានិមិត្តរូបនៃមិត្តភាពរវាងប្រជាជនជប៉ុន និងប្រជាជនកម្ពុជា»។
នៅក្នុងឱកាសនោះផងដែរ លោក ឃួង ស្រេង អភិបាលរាជធានីភ្នំពេញបានណែនាំ និងជំរុញឱ្យអង្គភាពការិយាល័យនគរបាលបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញត្រូវពង្រឹងប្រសិទ្ធភាពការងារ របស់មន្ត្រីនគរបាលជំនាញដោយត្រូវមានការចាត់តាំងបញ្ជាកម្លាំងប្រចាំការនៅតាមគោលដៅដែលនៅជិតទីតាំងឆេះបំផុត ដើម្បីងាយស្រួលធ្វើអន្តរាគមន៍សង្គ្រោះប្រជាពលរដ្ឋបានឆាប់រហ័សដោយត្រូវធ្វើការបែងចែកភារកិច្ច និងការទទួលខុសត្រូវទៅតាមមុខព្រួញពាក់ព័ន្ធកន្លែងកើតហេតុចៀសវាងការរីករាលដាលធំ និងកំណត់យុទ្ធសាស្ត្រដើម្បីធ្វើការពន្លត់ឱ្យបានឆាប់រហ័ស និងដើម្បីផ្តល់ការសង្គ្រោះដល់ប្រជាពលរដ្ឋក្នុងតំបន់ឆាបឆេះឱ្យបានទាន់ពេលវេលា៕
វីដេអូ៖
