វាគ្មិនដែលនឹងចូលរួមផ្តល់យោបល់នៅក្នុងកម្មវិធី ពិព័រណ៍ជំនាញ និងសាកលវិទ្យាល័យ។ រូបថត ក្រសួងអប់រំ
ភ្នំពេញៈ សាកលវិទ្យាល័យ និងគ្រឹះស្ថានអប់រំ កម្រិតឧត្ដមសិក្សាសាធារណៈ និងឯកជនប្រមាណ ២០ នៅថ្ងៃទី ២៩ ខែមករា ខាងមុខនេះនឹងរៀបចំ «ពិព័រណ៍ជំនាញ និងសាកលវិទ្យាល័យ» តាមអនឡាញដើម្បីឱ្យវាគ្មិនជំនាញចែករំលែកចំណេះដឹង បទពិសោធ ដល់និស្សិតលើការជ្រើសរើសមុខជំនាញសិក្សា និងសាកលវិទ្យាល័យសិក្សានៅក្នុងប្រទេសកម្ពុជា។
លោក សុខ លាភ អគ្គនាយក ក្រុមហ៊ុន Sala ដែលជាអ្នករៀបចំពិព័រណ៍ជំនាញ និងសាកលវិទ្យាល័យ (Major and University Virtual Fair) នេះឡើង បានឱ្យដឹងថា ពិព័រណ៍នេះធ្វើឡើងដោយទទួលបានការគាំទ្រពីក្រសួងអប់រំ យុវជន និងកីឡា និងសហការជាមួយសាកលវិទ្យាល័យ និងគ្រឹះស្ថានឧត្ដមសិក្សាចំនួន ២០ នៅរាជធានីភ្នំពេញ ដើម្បីឱ្យសិស្ស និងនិស្សិតអាចស្វែងយល់ពីជំនាញសិក្សា និងសាកលវិទ្យាល័យដែលមាននៅក្នុងប្រទេសកម្ពុជា។
លោកបានឱ្យដឹងថា ពិព័រណ៍នេះ ជាវេទិកាចែករំលែកចំណេះដឹងក្នុងគោលបំណងនាំយកនូវព័ត៌មានអំពីមុខជំនាញសិក្សា ចែករំលែកបទពិសោធនៃការជ្រើសរើសជំនាញ និងអនុញ្ញាតឱ្យសិស្ស-និស្សិត សាកសួរដោយផ្ទាល់ទៅកាន់វាគ្មិនជំនាញដែលមកពីសាកលវិទ្យាល័យ និងគ្រឹះស្ថានឧត្ដមសិក្សាទាំង ២០។
.jpg)
លោកថ្លែងថា៖ «គោលដៅចម្បងរបស់យើង គឺចង់ជំរុញការយល់ដឹងដល់សិស្ស-និស្សិត អំពីមុខជំនាញ និងសាកលវិទ្យាល័យដែលពួកគេចង់ចាប់យកទៅបន្តការសិក្សាហើយអ្វីដែលសំខាន់គឺយើងចង់ឱ្យសិស្ស ពួកគាត់ត្រូវយល់លើមុខវិជ្ជាដែលពួកគាត់ចង់បន្តការសិក្សានៅមហាវិទ្យាល័យនេះឱ្យបានច្បាស់ត្រូវនឹងជំនាញរបស់ខ្លួនឯង»។
នៅពេលដែលសិស្ស-និស្សិតជ្រើសរើសមុខជំនាញសិក្សាខុសពីចំណង់ចំណូលចិត្ដ និងទេពកោសល្យរបស់ខ្លួន ក្រោយពីសិក្សាដល់ឆ្នាំទី ២-៣ ពួកគេមានអារម្មណ៍ថាសិក្សាខុសជំនាញ ការសិក្សាក៏មិនបានល្អ ខាតពេលវេលា និងថវិកាថែមទៀត។ ដូច្នេះពិព័រណ៍នេះ គឺផ្ដោតសំខាន់លើចំណុចទាំងនេះ ដើម្បីឱ្យពួកគេបានយល់ច្បាស់។
លោកបញ្ជាក់ថា៖ «នៅពេលដែលសិស្ស-និស្សិតបានយល់ពីមុខជំនាញ ឬមុខវិជ្ជាសិក្សានីមួយៗបានច្បាស់លាស់ស្របពេលដែលបច្ចុប្បន្នមានសាកលវិទ្យាល័យ និងគ្រឹះស្ថានឧត្ដមសិក្សាជាង ៤០ នៅរាជធានីភ្នំពេញ ពួកគេនឹងអាចសម្រេចចិត្ដជ្រើសរើសមុខជំនាញសិក្សាបានត្រឹមត្រូវ»។
បើតាមលោក សុខ លាភ សិស្ស-និស្សិតដែលចូលរួមក្នុងពិព័រណ៍នេះទាំងអស់គ្នា ក្រៅពីទទួលបានបទពិសោធ ចំណេះដឹងថ្មីៗពួកគេក៏មានឱកាសទទួលបានអាហារូបករណ៍ និងការបញ្ចុះតម្លៃពី ៥ ទៅ ៣០% ពីសាកលវិទ្យាល័យដៃគូដែលចូលរួមក្នុងពិព័រណ៍នេះផងដែរ។
លោក រស់ សុវាចា អ្នកនាំពាក្យក្រសួងអប់រំ ថ្លែងថា ពិព័រណ៍ជំនាញ និងសាកលវិទ្យាល័យជាវេទិកាចែករំលែកព័ត៌មានអំពីចំណេះដឹង និងបទពិសោធអំពីមុខជំនាញសិក្សាជូនអ្នកចូលរួម ដើម្បីជាយោបល់សម្រាប់ជ្រើសរើសជំនាញសិក្សាបន្ត។ លោកថ្លែងថា៖ «អ្នកចូលរួមអាចសាកសួរបន្ថែមទៅកាន់អ្នកជំនាញ និងគណៈគ្រប់គ្រងសាកលវិទ្យាល័យដៃគូ»។
បើតាមសេចក្ដីប្រកាសព័ត៌មាន ពិព័រណ៍អនឡាញនេះនឹងធ្វើឡើងនៅថ្ងៃទី ២៩ មករា ២០២២។ ពិព័រណ៍នេះធ្វើឡើងរយៈពេល ៤ ម៉ោង ចាប់ពីម៉ោង ៧:៣០ ព្រឹក ដល់ ១១:៣០ ព្រឹក តាមប្រព័ន្ធវីដេអូហ្ស៊ូម។ និស្សិតអាចស្វែងយល់ពីសាកលវិទ្យាល័យដែលមាននៅក្នុងប្រទេសកម្ពុជា តាមរយៈការចែករំលែកពីវាគ្មិនជំនាញ និងអ្នកជំនាញក្នុងវិស័យនេះព្រមទាំងនិស្សិតអំពីបទពិសោធរបស់ពួកគេ នៅក្នុងមុខជំនាញជាក់លាក់ពីសាកលវិទ្យាល័យនានា។ សិស្សានុសិស្សក៏ទទួលបានឱកាសដើម្បីស្វែងរកជម្រើសជាច្រើនទៀត ដូចជាការបណ្តុះបណ្តាលវិជ្ជាជីវៈ អាហារូបករណ៍ និងឱកាសកម្មសិក្សាមួយចំនួនបន្ទាប់ពីបានចូលរួមក្នុងពិព័រណ៍នេះ៕
