លោកនាយករដ្ឋមន្ត្រី ហ៊ុន សែន សំណេះសំណាលជាមួយពលរដ្ឋខ្មែរ-អាមេរិក។ រូប SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា កម្ពុជាអាចនឹងឈានទៅដល់គ្រោះមហន្តរាយដោយសារកូវីដ ១៩ បើមិនមានវិធានការទប់ស្កាត់ត្រឹមត្រូវ ខណៈដែលលោកបានសាទរជាថ្មីចំពោះភាពល្អប្រសើរចំពោះស្ថានភាពនៃការឆ្លងមេរោគកូវីដ-១៩ដែលក្នុងរយៈពេល ៥ ថ្ងៃជាប់គ្នា កម្ពុជាមិនមានតួលេខអ្នកឆ្លងកូវីដ ១៩ ឡើយ។
លោកបានថ្លែងដូចនេះនាឱកាសអញ្ជើញជួបសំណេះសំណាលជាមួយប្រជាពលរដ្ឋខ្មែររស់នៅសហរដ្ឋអាមេរិក និងកាណាដាប្រមាណជា ២ ពាន់នាក់ នៅរដ្ឋធានីវ៉ាស៊ីនតោន នាថ្ងៃទី ១១ ខែឧសភា។
លោកមានប្រសាសន៍ថា៖ «ការប្រយុទ្ធជាមួយនឹងមេរោគកូវីដ ១៩ មិនមែនជាការប្រយុទ្ធមួយធម្មតាទេ តែជាការប្រយុទ្ធមួយដ៏តានតឹង។ កម្ពុជានឹងធ្លាក់ទៅក្នុងមហន្តរាយប្រសិនបើយើងមិនមានវិធានការត្រឹមត្រូវ ហើយប្រជាពលរដ្ឋចូលរួម។ បើយើងមានវិធានការត្រឹមត្រូវហើយ តែប្រជាជនមិនចូលរួម នោះក៏មិនជោគជ័យដែរ»។
.jpg)
ការចូលរួមអនុវត្តនូវវិធានការរបស់រាជរដ្ឋាភិបាលតាមរយៈវិធានការសុខាភិបាល ៣ កុំ ៣ ការពារ ជាពិសេសការទទួលយកវ៉ាក់សាំងដែលជាយុទ្ធសាស្ត្ររបស់រាជរដ្ឋាភិបាលក្នុងការផ្គត់ផ្គង់វ៉ាក់សាំងជូនប្រជាពលរដ្ឋ គឺជាជោគជ័យដែលកម្ពុជាទទួលបានពីការប្រយុទ្ធនឹងជំងឺកូវីដ ១៩។
លោកថ្លែងថា ពេលចាប់ផ្តើមដំបូងនៃការឆ្លងមេរោគកូវីដ ១៩ មានការមើលស្រាលពីបរទេសខ្លះ ឬអ្នកយកព័ត៌មានខ្លះអំពីភាពទន់ខ្សោយរបស់កម្ពុជាទៅលើការគ្រប់គ្រងកូវីដ ឬសមត្ថភាពឆ្លើយតបរបស់កម្ពុជាដែលគេនិយាយថាប្រព័ន្ធសុខាភិបាលរបស់កម្ពុជាទន់ខ្សោយ។
លោក ហ៊ុន សែន ថា៖ «មកដល់ពេលនេះយើងអាចធ្វើការសន្និដ្ឋានបានហើយថា ប្រព័ន្ធសុខាភិបាលជឿនលឿនមិនប្រាកដថាឈ្នះកូវីដទេ ប្រព័ន្ធសុខាភិបាលទន់ខ្សោយមិនប្រាកដថាចាញ់កូវីដដែរ។ យើងឃើញហើយ នៅសហរដ្ឋអាមេរិក គឺគេចាត់ទុកថាជាមហាអំណាចបច្ចេកវិទ្យាក៏ដូចគ្នានៅបារាំង អាល្លឺម៉ង់ និងប្រទេសដទៃទៀត តែមានមនុស្សស្លាប់ច្រើនណាស់»។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានថ្លែងឱ្យដឹងកាលពីថ្ងៃទី ១១ ខែឧសភាថា ថ្វីដ្បិតតែស្ថានភាពនៃការរាតត្បាតជំងឺកូវីដ ១៩ នៅកម្ពុជាមានភាពល្អប្រសើរ ដែលជាមោទនភាពរបស់កម្ពុជា និងប្រជាជនកម្ពុជា តែក៏មិនត្រូវភ្លេចខ្លួនដែរ។
លោកស្រីថា៖ «សម្តេចនាយករដ្ឋមន្ត្រីតែងតែធ្វើការក្រើនរំឭកជារឿយៗទៅដល់ប្រជាពលរដ្ឋយើងដើម្បីឱ្យរៀនរស់ជាមួយនឹងវត្តមានមេរោគកូវីដ ១៩ ដែលបច្ចុប្បន្ននេះនៅលើសកលលោកនៅមានស្ថានភាពឆ្លងនៅឡើយទេ» សូមបងប្អូនប្រជាពលរដ្ឋបន្តយកចិត្តទុកដាក់ និងបន្តអនុវត្តនូវការណែនាំដ៏ខ្ពស់ខ្ពង់របស់ប្រមុខរាជរដ្ឋាភិបាល ដោយសារមេរោគនេះនៅតែមានចរាចរណ៍នៅឡើយ»។
លោកស្រីថា ការឆ្លងរាតត្បាតជំងឺកូវីដ ១៩ នៅលើពិភពលោក បើទោះបីជានៅតាមប្រទេសខ្លះមានការថមថយក៏ដោយតែមេរោគនេះនៅ នៅឡើយទេ ដែលជាចំណុចមួយដែលគ្រប់គ្នាត្រូវតែបន្តការពារខ្លួន ហើយមិនត្រូវភ្លេចខ្លួនពីមេរោគនេះឱ្យសោះ។ ការប្រកាន់ខ្ជាប់នូវការប្រុងប្រយ័ត្ននេះដែរ ទិសដៅតែមួយរបស់កម្ពុជាគឺចង់រក្សា ដោយធ្វើយ៉ាងណាត្រូវរួមគ្នាដើម្បីរក្សានិរន្តរភាពនៃការរស់នៅធម្មតាក្នុងប្រក្រតីភាពថ្មីឱ្យបានយូរអង្វែង។
លោកស្រីថា៖ «យើងមិនចង់វិលទៅរកភាពសោកសៅ ការបិទខ្ទប់ ហើយក៏មិនចង់វិលទៅរកការឆ្លងរាតត្បាតពីសហគមន៍មួយទៅសហគមន៍មួយទៀតដែរ។ ដូចនេះអ្វីដែលសំខាន់គឺការរួមគ្នាជាកម្លាំងដោយមានការទទួលខុសត្រូវរបស់បុគ្គល គ្រួសារ និងសហគមន៍នៅក្នុងការចេះរក្សាបាន ឬការពារខ្លួនពីការចម្លងជំងឺតម្កាត់ ពិសេសជំងឺកូវីដ ១៩»។
ចាប់ពីថ្ងៃទី ៧ ដល់ថ្ងៃទី ១១ ខែឧសភា កម្ពុជាមិនមានករណីឆ្លងថ្មីនៃមេរោគកូវីដ ១៩ ឡើយដែលប្រមុខរាជរដ្ឋាភិបាលកម្ពុជាមានមោទនភាពពីលទ្ធផលដ៏ល្អប្រសើរនៃមេរោគកូវីដ ១៩ នេះ ហើយអ្នកជំងឺដែលកំពុងសម្រាកព្យាបាលជំងឺកូវីដ ១៩ នៅក្នុងមន្ទីរពេទ្យនៅទូទាំងប្រទេស មានជាង ២០ នាក់ប៉ុណ្ណោះ។ យោងតាមរបាយការណ៍របស់ក្រសួងសុខាភិបាលគិតត្រឹមព្រឹកថ្ងៃទី ១២ ខែឧសភា ឆ្នាំ ២០២២ កម្ពុជាមានអ្នកឆ្លងវីរុសកូវីដ ១៩ សរុបទូទាំងប្រទេសចំនួន ១៣៦ ២៦២ នាក់ អ្នកជាសះស្បើយសរុបចំនួន ១៣៣ ១៨៦ នាក់ និងអ្នកស្លាប់មានចំនួន ៣ ០៥៦ នាក់៕
