កំពង់ធំៈ រដ្ឋមន្ដ្រីក្រសួងយុត្ដិធម៌ លោក កើត រិទ្ធ ណែនាំដល់ចៅក្រមគ្រប់រូប គប្បីសាកល្បងជួយសម្របសម្រួល និងផ្សះផ្សារវាងគូភាគីជម្លោះ ដើម្បីអាចបញ្ចប់វិវាទនៅក្នុងសំណុំរឿងក្តីនានា មុននឹងឈានទៅដល់ការសម្រេចសេចក្តីតាមរយៈការចេញនូវសាលក្រម ឬសាលដីកា ប៉ុន្តែការសម្របសម្រួល និងការផ្សះផ្សានេះមិនត្រូវយកមកអនុវត្តចំពោះរឿងក្តីព្រហ្មទណ្ឌឡើយ។
លោក កើត រិទ្ធ បានថ្លែងបែបនេះ ក្នុងពេលធ្វើជាអធិបតី ពិធីប្រកាសតែងតាំង និងចូលកាន់តំណែងជាផ្លូវការរបស់លោក ផូង វណ្ណ ប្រធានសាលាដំបូងខេត្តកំពង់ធំ ជំនួស លោក លាង សួគ៌ ដែលត្រូវបានតែងតាំងជាសមាជិកឧត្តមក្រុមប្រឹក្សានៃអង្គចៅក្រមកាលពីថ្ងៃទី ២៤ ឧសភា នៅសាលាដំបូងខេត្ដកំពង់ធំ។
លោកបានថ្លែងថា បច្ចុប្បន្នក្រសួងយុត្តិធម៌បាននិងកំពុងយកចិត្តទុកដាក់ខ្ពស់ក្នុងការរៀបចំ ទាំងក្របខ័ណ្ឌគោលនយោបាយ និងក្របខ័ណ្ឌច្បាប់ ដើម្បីលើកកម្ពស់យន្តការដោះស្រាយវិវាទក្រៅប្រព័ន្ធតុលាការ តាមរយៈសន្ធានកម្ម និងការបង្កើតវិជ្ជាជីវៈសន្ធានការី ដើម្បីបំពេញតួនាទី និងភារកិច្ចក្នុងការសម្របសម្រួលដោះស្រាយចំពោះវិវាទមួយចំនួនស្របតាមច្បាប់ និងបទប្បញ្ញត្តិជាធរមានសំដៅកាត់បន្ថយការកកស្ទះសំណុំរឿងនៅតាមសាលាជម្រះក្តី និងការបង្ខិតយន្តការដោះស្រាយវិវាទឱ្យកាន់តែទៅកៀកប្រជាជន ព្រមទាំងពង្រឹងសុខដុមរមនានៅក្នុងសហគមន៍ និងមូលដ្ឋាន។
លោកបញ្ជាក់ថា៖ «ចៅក្រមគ្រប់រូប គប្បីសាកល្បងជួយសម្របសម្រួល និងផ្សះផ្សារវាងគូភាគី ដើម្បីអាចបញ្ចប់វិវាទនៅក្នុងសំណុំរឿងក្តីនានា មុននឹងឈានទៅការសម្រេចសេចក្តីតាមរយៈការចេញនូវសាលក្រម ឬសាលដីកា ប៉ុន្តែការសម្របសម្រួល និងការផ្សះផ្សានេះមិនត្រូវយកមកអនុវត្តចំពោះរឿងក្តីព្រហ្មទណ្ឌឡើយ»។
ដើម្បីពង្រឹងប្រសិទ្ធភាពការងារ និងបង្កើនជំនឿទុកចិត្តពីសាធារណជនលើប្រព័ន្ធតុលាការកម្ពុជា ក៏ដូចជា ការការពារ និងលើកកម្ពស់សេចក្តីថ្លៃថ្នូរ និងកេរ្តិ៍ឈ្មោះរបស់ចៅក្រម ព្រះរាជអាជ្ញា និងមន្ត្រីតុលាការផ្សេងទៀត លោករដ្ឋមន្ត្រីបានបន្តណែនាំ និងផ្តាំផ្ញើដល់លោក ផូង វណ្ណ ដែលត្រូវចូលកាន់មុខតំណែងជាប្រធានសាលាដំបូងខេត្តកំពង់ធំនាពេលនេះ ត្រូវប្រកាន់ខ្ជាប់នូវសេចក្តីប្តេជ្ញាចិត្តរបស់ខ្លួនឱ្យបានម៉ឺងម៉ាត់ប្រកបដោយស្មារតីទទួលខុសត្រូវខ្ពស់ ដូចដែលបានធ្វើការប្តេជ្ញាចិត្តក្នុងពិធីចូលកាន់តំណែងនេះ។
លោក កើត រិទ្ធ សង្ឃឹមថា លោក ផូង វណ្ណ នឹងបន្តខិតខំយកចិត្តទុកដាក់ក្នុងការបំពេញភារកិច្ចរបស់ខ្លួនក្នុងការដឹកនាំសាលាដំបូងខេត្តកំពង់ធំឱ្យមានការរីកចម្រើន ព្រមទាំងការបម្រើសេវាយុត្តិធម៌ឱ្យកាន់តែល្អប្រសើរ ហើយជាពិសេស ការពង្រឹង និងពង្រីកកិច្ចសហប្រតិបត្តិការឱ្យបានកាន់តែល្អប្រសើរ ជាមួយអាជ្ញាធរមានសមត្ថកិច្ច និងមន្ត្រីអនុវត្តច្បាប់ទាំងអស់ក្នុងស្មារតីគោរពគ្នាទៅវិញទៅមក ដោយផ្អែកតាមតួនាទី និងភារកិច្ចដែលច្បាប់ប្រគល់ឱ្យរៀងៗខ្លួន និងដោយប្រកាន់ឱ្យបានហ្មត់ចត់នូវក្រមសីលធម៌វិជ្ជាជីវៈ ឧត្តមគតិជាតិ និងភាពស្មោះត្រង់ ដើម្បីបម្រើឱ្យវិស័យយុត្តិធម៌ និងបម្រើឱ្យប្រជាជនកម្ពុជា។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូបានថ្លែងថា ការណែនាំរបស់លោករដ្ឋមន្ត្រីក្រសួងយុត្តិធម៌នេះ គឺជារឿងល្អចំពោះសំណុំរឿងរដ្ឋប្បវេណីនានា។
លោកបានថ្លែងថា៖ «ព្រោះប្រសិនបើចៅក្រមគ្រប់រូបអាចធ្វើការសាកល្បងសម្របសម្រួល និងផ្សះផ្សារវាងគូភាគីក្នុងសំណុំរឿងរដ្ឋប្បវេណី ដោយតម្លាភាព និងយុត្តិធម៌ ហើយគូភាគីស្រុះស្រួលគ្នា និងទទួលយក គឺអាចកាត់បន្ថយការយកចាញ់យកឈ្នះគ្នា កាត់បន្ថយការចងគំនុំគ្នា រស់នៅជាមួយគ្នាដោយភាពសុខដុមរមនាក្នុងសហគមន៍ ហើយក៏ជាគំរូដើម្បីកាត់បន្ថយសំណុំរឿងនៅតាមតុលាការ ដោយសារពួកគាត់អាចធ្វើការចរចា សម្រុះសម្រួលគ្នា មុននឹងសម្រេចចិត្តប្តឹងទៅតុលាការ»៕