អ្នកជំនាញកំពុងវាស់ភ្នែកសិស្សសាលា ដើម្បីកាត់វ៉ែនតាផ្តល់ឱ្យ។ រូបថត ក្រសួងអប់រំ
ភ្នំពេញៈ ខេត្តគោលដៅចំនួន ១៦ នឹងត្រូវអនុវត្តនូវគម្រោង ១ ដែលបង្កើតឡើងដោយក្រសួងអប់រំ យុវជន និងកីឡាសហការជាមួយនឹងស្ថាប័នពាក់ព័ន្ធ រួមនឹងមូលនិធិហ្វ្រេតហូឡូប្រចាំកម្ពុជា ដែលធ្វើការផ្តោតសំខាន់ទៅលើការពង្រឹង និងបង្កើនការផ្ដល់វ៉ែនតា ដល់អ្នកសិក្សានៅតាមគ្រឹះស្ថានសិក្សា ដែលក្រសួងរំពឹងថា សិស្សជាង ១៣ ម៉ឺននាក់ នឹងទទួលបានផលប្រយោជន៍ពីគម្រោងនេះ។
លោកស្រី គឹម សេដ្ឋានី រដ្ឋលេខាធិការក្រសួងអប់រំ បានថ្លែងនៅក្នុងកិច្ចសម្ភាសន៍មួយ ស្ដីពីការថែទាំសុខភាពភ្នែកតាមសាលារៀន កាលពីថ្ងៃទី ២៤ ខែមិថុនាថា ខេត្តគោលដៅទាំង ១៦ នេះនឹងត្រូវអនុវត្តគម្រោងថ្មី១ គឺគម្រោង «បង្កើនវិសាលភាពសេវាកំហុសកំណុំរូបភាពនិងធ្វើ ឱ្យកាន់តែប្រសើរឡើង នូវគំរូហិរញ្ញប្បទានជាតិសម្រាប់ផ្ដល់វ៉ែនតានៅកម្ពុជា»។
គម្រោងនេះត្រូវបានក្រសួងអប់រំ ធ្វើការសហការជាមួយនឹងមូលនិធីហ្វ្រេតហូឡូប្រចាំកម្ពុជា ក្រោមកិច្ចសហការជាមួយនឹងកម្មវិធីជាតិសុខភាពភ្នែកនៃក្រសួងសុខាភិបាល ដើម្បីអនុវត្តនូវគម្រោងថ្មី ១ ទៀត។
.jpg)
លោកស្រី គឹម សេដ្ឋានី បានបញ្ជាក់ថា ៖ «ខេត្តគោលដៅដែលនឹងត្រូវអនុវត្តគម្រោងថ្មីនេះ គឺមាន ១៦ ខេត្តគោលដៅដែលនៅក្នុងនោះ យើងឃើញថា គ្រូបង្គោលថ្នាក់ជាតិប្រមាណ ២០ នាក់ និងគ្រូបង្គោលសុខភាព សិក្សានៅតាមសាលារៀនប្រមាណជា ១ ៣០០ នាក់ នឹងទទួលបានការបណ្តុះបណ្តាលស្តីពីការប្រើប្រាស់សៀវភៅសិក្សា គោលមុខវិជ្ជាអប់រំសុខភាព និងការពិនិត្យគំហើញ នៅតាមសាលារៀនផងដែរ»។
លោកស្រី បានបន្តថា តាមរយៈគម្រោងនេះ សិស្សានុសិស្សប្រមាណជា ១៣ ម៉ឺននាក់ នឹងទទួលបានផលប្រយោជន៍ពីការពិនិត្យគំហើញនិងការផ្តល់វែនតា។
នៅក្នុងគម្រោងថ្មីនេះផងដែរ ក្រសួងនឹងមានការបោះពុម្ពសៀវភៅសិក្សាគោល មុខវិជ្ជាគម្រោងសុខភាពពីថ្នាក់ទី ១ ដល់ថ្នាក់ទី ១២ ការរៀបចំកែសម្រួលកម្មវិធីសិក្សាមុខវិជ្ជាអប់រំសុខភាព ពីថ្នាក់ទី ១ ដល់ថ្នាក់ទី ១២ ព្រមទាំងមានផលិតមេរៀន ជាវីដេអូ សម្រាប់ការអប់រំសុខភាព ស្តីពីសុខភាពភ្នែក និងការវាស់គំហើញផងដែរ។ នេះបើតាម លោកស្រី គឹម សេដ្ឋានី។
ទាក់ទងនឹងការអនុវត្តគម្រោងនេះឱ្យមានប្រសិទ្ធភាព កម្មវិធីជាតិសុខភាពភ្នែក ក៏បានត្រៀមរួចរាល់ក្នុងការសហការជាមួយក្រសួងអប់រំ ។
អនុប្រធានកម្មវិធីជាតិសុខភាពភ្នែកនៃក្រសួងសុខាភិបាល លោកវេជ្ជបណ្ឌិត ដោរ សីហា បានថ្លែងថា កម្មវិធីជាតិសុខភាពភ្នែក នឹងបន្តរួមសហការជួយដល់ផ្នែកបច្ចេកទេសក្នុងការកែសម្រួលក៏ដូចជាការបណ្តុះបណ្តាលធនធានមនុស្សផងដែរ។
ជាមួយគ្នានេះ លោក បាក់ តូត្យូ ប្រធានមូលនិធិហ្វ្រេតហូឡូប្រចាំប្រទេសកម្ពុជា បានបង្ហាញនូវសេចក្តីរីករាយ និងពេញចិត្តក្នុងការសហការជាមួយនឹងក្រសួងអប់រំ ក៏ដូចជារាជរដ្ឋាភិបាលកម្ពុជាផងដែរ ក្នុងការជួយពង្រឹងនូវសុខភាពភ្នែកដល់កុមារ និងប្រជាពលរដ្ឋជំនាន់ក្រោយ។
លោកបានឱ្យដឹងថា ៖ «យើងនឹងបន្តខិតខំប្រឹងប្រែង គាំទ្ររាជរដ្ឋាភិបាល និងគោលនយោបាយរបស់រាជរដ្ឋាភិបាលបន្តទៀត ក្នងការពង្រឹងនូវសុខភាពភ្នែកទាំងនៅតាមមន្ទីរពេទ្យ ក៏ដូចជានៅតាមគ្រឹះស្ថានសិក្សានានាផងដែរ ក្នុងគោលដៅធ្វើយ៉ាងណាឱ្យកុមារ និងប្រជាពលរដ្ឋជំនាន់ក្រោយទទួលបាននូវសេវាអប់រំសុខភាពភ្នែកដែលមានគុណភាពល្អ»។
គម្រោង «បង្កើនវិសាលភាពសេវាកំហុសកំណុំរូបភាពនិងធ្វើឱ្យកាន់តែប្រសើរឡើង នូវគំរូហិរញ្ញប្បទានជាតិសម្រាប់ផ្ដល់វ៉ែនតានៅកម្ពុជា» នេះនឹងអនុវត្តនៅតាមគ្រឹះស្ថានសិក្សាគោលដៅរាជធានី ខេត្តចំនួន១៦ ក្នុងនោះរួមមាន រាជធានីភ្នំពេញ ខេត្តកំពង់ចាម កំពង់ឆ្នាំង កំពត កំពង់ស្ពឺ កំពង់ធំ កណ្ដាល ក្រចេះ ឧត្ដរមានជ័យ ព្រះសីហនុ ព្រះវិហារ ព្រៃវែង រតនគិរី សៀមរាប ស្វាយរៀង និងខេត្តត្បូងឃ្មុំ។
លោក ចេង លឹមហ៊ន់ ប្រធានមន្ទីរអប់រំ យុវជន និងកីឡា ខេត្តព្រះវិហារបានប្រាប់ឱ្យដឹងថា មន្ទីររបស់លោកមិនទាន់បានធ្វើការស្រាវជ្រាវរកទិន្នន័យទាក់ទងនឹងកំសោយមើលរបស់សិស្សានុសិស្សក្នុងខេត្តនេះឡើយ ប៉ុន្តែរយៈពេលប៉ុន្មានឆ្នាំកន្លងមកមានករណីសិស្សកំសោយមើល កំសោយស្តាប់ តែមិនមានច្រើននោះទេ។
លោកបានបន្តថា ករណីកំសោយមើលនេះ គឺគ្មានមូលហេតុអ្វីផ្សេងក្រៅពីការប្រើប្រាស់ឬមើលទូរស័ព្ទច្រើននោះទេ ដោយសិស្សមួយចំនួនមានប្រើប្រាស់ស្មាតហ្វូន លេងហ្វេសប៊ុក តេឡេក្រាម ឬមានលេងហ្គេមជាដើម។
លោក ចេង លឹមហ៊ន់ បានបញ្ជាក់ថា ៖ «ខ្ញុំគាំទ្រនូវគម្រោងដែលក្រសួងបានបង្កើតឡើងនេះ ដោយសារវាជាគម្រោងល្អដែលអាចធ្វើឱ្យសិស្សានុសិស្សដឹងពីសុខភាពភ្នែករបស់ពួកគេជាមុន ដែលធ្វើឱ្យពួកគេធ្វើការកាត់បន្ថយការប្រើប្រាស់ភ្នែកដែលអាចនាំឱ្យប៉ះពាល់ធ្ងន់ធ្ងរផងដែរ»៕
