ផ្លូវល្បឿនលឿនដែលគ្រោងដាក់ឱ្យដំណើរការបណ្តោះអាសន្ននៅខែកញ្ញា។ រូបថត ក្រសួងសាធារណការ
ភ្នំពេញៈ ផ្លូវល្បឿនលឿនភ្នំពេញ-ក្រុងព្រះសីហនុ ដែលគ្រោងដាក់ឱ្យដំណើរការបណ្តោះអាសន្ន នៅក្នុងខែកក្កដានេះ ត្រូវបានពន្យារពេលទៅខែកញ្ញា ឆ្នាំ ២០២២ វិញ ដោយសារមានបញ្ហាមួយចំនួន ខណៈការសាងសង់សម្រេចបាន ៩៤ ភាគរយ។
លោក គង់ វិមាន រដ្ឋលេខាធិការ ក្រសួងសាធារណការ និងដឹកជញ្ជូន មានប្រសាសន៍ថា ដោយសារ មានចម្ងល់ច្រើនពីសំណាក់ប្រជាពលរដ្ឋដែលមានបំណងចង់បើកបរ លើផ្លូវល្បឿនលឿន នៅក្នុងខែកក្កដានេះ ប៉ុន្តែនៅមិនទាន់អាចអនុញ្ញាតឱ្យបើកបរបាននោះទេ ដោយសារផ្លូវនេះ នៅមិនទាន់បញ្ចប់ការសាងសង់រួចរាល់ទាំងស្រុងនៅឡើយ។
លោកបានជម្រាបជូនពីវឌ្ឍនភាពផ្លូវនេះថា គិតត្រឹមខែកក្កដានេះ លទ្ធផលសាងសង់ទាំងស្រុងសម្រេចបាន ៩៤ ភាគរយ ក្នុងនោះ របងការពារសុវត្ថិភាពផ្លូវទើបបានជាង ៧០% រនាំងទ្រូងផ្លូវនិង សួនច្បារ ទើបបានប្រហែល ៨០% និងបញ្ហាស្លាកសញ្ញាចរាចរណ៍មិនទាន់បានបំពាក់ឱ្យបានគ្រប់គ្រាន់នៅឡើយទេ។
.jpg)
ចំណែកស្ពានអាកាសឆ្លងផ្លូវមួយចំនួនពុំទាន់បានរួចរាល់ ទីតាំងចំណតទាំង ៤ កន្លែង នៅពុំទាន់រួចរាល់ ១០០% បរិក្ខារមួយចំនួនទៀត ពុំទាន់បានបំពាក់រួចរាល់ ហើយចំណុចចាប់ផ្តើមដើមទី និងចុងទីពុំទាន់បានបញ្ចប់ការសាងសង់ជាស្ថាពរនៅឡើយ និងនៅមានបញ្ហាផ្សេងៗមួយចំនួនទៀត។
យ៉ាងណាមិញលោកគូសបញ្ជាក់ថា ក្រុមការងារជំនាញកំពុងពន្លឿនបញ្ចប់ការដ្ឋានឱ្យបានឆាប់រហ័ស ដើម្បីដាក់ឱ្យប្រើប្រាស់នៅខែកញ្ញា ខាងមុខ។
លោកថា៖ «ក្រសួង និងក្រុមហ៊ុនបានពិភាក្សាគ្នា និងបានកំណត់ថា នឹងដាក់ឱ្យដំណើរការបណ្តោះអាសន្ន នៅដើមខែកញ្ញា ឆ្នាំ ២០២២ ខាងមុខនេះ»។
បើតាមលោក គង់ វិមាន ការយឺតយ៉ាវនៃការសាងសង់នេះ ក៏ដោយសារកត្តាភ្លៀងច្រើនផងដែរ។
រដ្ឋមន្រ្តីក្រសួងសាធារណការ និងដឹកជញ្ជូន លោក ស៊ុន ចាន់ថុល ដែលបានចុះពិនិត្យវឌ្ឍភាពផ្លូវនេះ កាលពីខែមេសា ឆ្នាំ ២០២២ បានបញ្ជាក់ថា ផ្លូវនេះសាងសង់ឡើងដោយមានបច្ចេកវិទ្យាខ្ពស់ និងមានស្តង់ដា។ ផ្លូវនេះនឹងចូលរួមចំណែកក្នុងការជំរុញឱ្យប៉ូលសេដ្ឋកិច្ចភ្នំពេញ និងប៉ូលសេដ្ឋកិច្ចក្រុងព្រះសីហនុមានការរីកចម្រើនលឿនជាងធម្មតាដោយសារការធ្វើដំណើរបានឆាប់រហ័ស កាត់បន្ថយចំណាយ កាត់បន្ថយពេលវេលា និងកាត់បន្ថយគ្រោះថ្នាក់ចរាចរណ៍នៅលើផ្លូវជាតិលេខ៤។
គម្រោងសាងសង់ផ្លូវល្បឿនលឿនពីភ្នំពេញឆ្ពោះទៅកាន់ក្រុងព្រះសីហនុ វិនិយោគដោយក្រុមហ៊ុនរបស់ចិន Cambodia PPSHV Expressway Co.,Ltd ក្នុងតម្លៃប្រមាណ ១,៩ ពាន់លានដុល្លារ ត្រូវបានបើកការដ្ឋានសាងសង់ជាផ្លូវការនៅខែមីនា ឆ្នាំ ២០១៩។
ផ្លូវនេះមានចម្ងាយសរុបប្រមាណ ១៩០ គីឡូម៉ែត្រ និងទទឹងផ្លូវ ២៤,៥ ម៉ែត្រ (២ គន្លងទៅ និង ២ គន្លងមក) ដោយមានសួនច្បារនៅកណ្ដាលទ្រូងផ្លូវ ព្រមទាំងមានរបាំងអមសងខាងផ្លូវដើម្បីការពារសត្វពាហនៈ ឬមនុស្សឆ្លងកាត់ព្រមទាំងមានកន្លែងឈប់សម្រាក និងមិនបង្កការកកស្ទះចរាចរណ៍ឡើយ។
តាមគម្រោង ផ្លូវនេះ នឹងគ្រោងដាក់ឱ្យដំណើរការសាកល្បងនៅក្នុងខែកក្កដា ឆ្នាំ ២០២២ និងបញ្ចប់ការសាងសង់ជាស្ថាពរនៅនៅថ្ងៃទី ៣១ ខែ ឧសភា ឆ្នាំ ២០២៣៕
