លោក ប្រាក់ សុខុន និងលោក វ៉ាង យី នៅក្នុងជំនួបទ្វេភាគីនៅទីក្រុងបាហ្កាន ប្រទេសមីយ៉ាន់ម៉ា កាលពីថ្ងៃទី ៣ កក្កដា។ រូបថត ក្រសួងការបរទេស
ភ្នំពេញៈ លោក ប្រាក់ សុខុន រដ្ឋមន្ត្រីការបរទេសកម្ពុជា និងលោក វ៉ាង យី រដ្ឋមន្ត្រីការបរទេសចិនបានជួបប្រជុំទ្វេភាគីកាលពីថ្ងៃទី ៣ ខែកក្កដា នៅទីក្រុងបាកាន ប្រទេសមីយ៉ាន់ម៉ា ដោយភាគីទាំង ២ បានប្រកាសបន្តប្តេជ្ញាចិត្តក្នុងការធ្វើឱ្យទំនាក់ទំនង កម្ពុជា-ចិន ឱ្យកាន់តែស៊ីជម្រៅថែមទៀត ខណៈដែលទំនាក់ទំនងបច្ចុប្បន្នកំពុងស្ថិតនៅចំណុចខ្ពស់បំផុត។ នេះបើយោងតាមប្រព័ន្ធតេឡេក្រាមរបស់ក្រសួងការបរទេស។
ការប្រកាសប្តេជ្ញាចិត្តរបស់រដ្ឋមន្ត្រីទាំង ២ បានធ្វើឡើងក្នុងជំនួបទ្វេភាគីនៅមុន ១ ថ្ងៃ មុនពេលចូលរួមកិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការមេគង្គឡានឆាង លើកទី ៧ នៅទីក្រុងបាហ្កាន ប្រទេសមីយ៉ាន់ម៉ា។
ក្រសួងការបរទេសកម្ពុជាបានឱ្យក្រុមអ្នកសារព័ត៌មានដឹងតាមប្រព័ន្ធតេឡេក្រាមនៅថ្ងៃទី ៣ ខែកក្កដា ថា៖ «ឯកឧត្តមទាំង ២ បានជួបពិភាក្សាប្រកបដោយផ្លែផ្កាលើប្រធានបទផ្សេងៗ និងបានបន្តប្តេជ្ញាចិត្តក្នុងការធ្វើឱ្យទំនាក់ទំនងទ្វេភាគីរបស់ប្រទេសទាំង ២ កាន់តែស៊ីជម្រៅថែមទៀត ខណៈដែលទំនាក់ទំនងនាពេលបច្ចុប្បន្ននេះកំពុងស្ថិតនៅចំណុចខ្ពស់បំផុត»។
.jpg)
រដ្ឋមន្ត្រីទាំង ២ ក៏បានផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិមួយចំនួនផងដែរ។
លោក ប្រាក់ សុខុន បានចូលរួមកិច្ចប្រជុំ MLC លើកទី ៧ នេះ បន្ទាប់ពីបញ្ចប់ទស្សនកិច្ចនៅប្រទេសមីយ៉ាន់ម៉ាក្នុងនាមជាប្រេសិតពិសេសរបស់ប្រធានអាស៊ានរយៈពេល ៥ ថ្ងៃ ចាប់ពីថ្ងៃទី ២៩ ខែមិថុនា ដល់ថ្ងៃទី ៣ ខែកក្កដា ដើម្បីតាមដានវឌ្ឍនភាពនៃការអនុវត្តកិច្ចព្រមព្រៀងជាឯកច្ឆន្ទ (កុងសង់ស៊ីស) ៥ ចំណុចរបស់អាស៊ាន និងតាមដានលទ្ធផលនៃកិច្ចប្រជុំពិគ្រោះយោបល់ស្តីពីជំនួយមនុស្សធម៌របស់អាស៊ានសម្រាប់មីយ៉ាន់ម៉ា។
កិច្ចប្រជុំ MLC នេះធ្វើឡើងក្រោមមូលបទ «សាមគ្គីភាពដើម្បីសន្តិភាព និងវិបុលភាព» ដែលជាវេទិកាមួយសម្រាប់រដ្ឋមន្ត្រីការបរទេស MLC ធ្វើការវាយតម្លៃទៅលើវឌ្ឍនភាពនៃការអនុវត្តផែនការសកម្មភាព ៥ ឆ្នាំនៃកិច្ចសហប្រតិបត្តិការមេគង្គ-ឡានឆាង ឆ្នាំ ២០១៨-២០២២។
កិច្ចប្រជុំទ្វេភាគីរដ្ឋមន្ត្រីការបរទេសកម្ពុជា-ចិន។ រូប ក្រសួងការបរទេស
កិច្ចប្រជុំនេះកំណត់ទិសដៅអនាគត សម្រាប់កិច្ចសហប្រតិបត្តិការឱ្យកាន់តែទូលំទូលាយ ពង្រឹងបន្ថែមទៀតនូវចំណងមិត្តភាព និងគាំទ្រគ្នាទៅវិញទៅមករវាងបណ្ដាប្រទេសមេគង្គ និងប្រទេសចិនក្នុងការលើកកម្ពស់ការអភិវឌ្ឍសេដ្ឋកិច្ច-សង្គម ជាពិសេសនៅក្នុងកាលៈទេសៈនៃការគំរាមកំហែងពិភពលោកដែលមិនធ្លាប់មានពីមុនមក។ តាមរយៈកិច្ចប្រជុំនេះក៏មានការសម្ពោធអគារអង្គភាពសម្របសម្រួលជាតិនៃ MLC របស់ប្រទេសមីយ៉ាន់ម៉ាផងដែរ។ នេះបើយោងតាមសេចក្តីប្រកាសព័ត៌មានក្រសួងការបរទេសកម្ពុជាកាលពីថ្ងៃទី ១ ខែកក្កដា។
នៅមុនជំនួបជាមួយលោក វ៉ាង យី ១ ថ្ងៃ លោក ប្រាក់ សុខុន បានជួបជាមួយឯកអគ្គរដ្ឋទូតបារាំង សហរដ្ឋអាមេរិក សហភាពអឺរ៉ុប ព្រមទាំងភារធារីស្តីទីស្ថានទូតអូស្ត្រាលី ប្រចាំមីយ៉ាន់ម៉ា ដោយមានការពិភាក្សាអំពីវឌ្ឍនភាពនៃកុងសង់ស៊ីស ៥ ចំណុចរបស់អាស៊ាន ដោយរួមទាំងការផ្តល់ជំនួយមនុស្សធម៌ដល់ប្រជាជនមីយ៉ាន់ម៉ា។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពថ្លែងថា ចំពោះកិច្ចសហការទ្វេភាគីរវាងកម្ពុជា និងចិន អ្នកណាក៏អាចមើលឃើញពីភាពស្អិតល្មួត និងកិច្ចសហប្រតិបត្តិដែលមានកម្រិតខ្ពស់នេះផងដែរ។
លោកបន្តថា កម្ពុជាក៏ត្រូវតែប្រឹងប្រែងធ្វើយ៉ាងម៉េចឱ្យកិច្ចសហប្រតិបត្តិការជាមួយបណ្តាប្រទេសមហាអំណាចផ្សេងៗទៀត ដូចជាអាមេរិក ឬក៏អឺរ៉ុប ដែលជាមូលដ្ឋានសំខាន់នៃការធ្វើឱ្យរីកចម្រើនសេដ្ឋកិច្ចកម្ពុជាឱ្យបានល្អ និងបានដល់ជាកម្រិតខ្ពស់ដូចកិច្ចសហប្រតិបត្តិការជាមួយប្រទេសចិនជាដើម។
លោក យង់ គិមអេង ថ្លែងថា៖ «ជាមួយគ្នានោះ វានឹងជួយឱ្យកម្ពុជាយើងកាន់តែមានភាពរឹងមាំទាំងនៅក្នុងទំនាក់ទំនងអន្តរជាតិទូទៅនៅលើសកលលោកដែរ ប្រសិនជាយើងអាចធ្វើបាន។ បើសិនជាកិច្ចសហប្រតិបត្តិការរវាងតែកម្ពុជា និងចិនដែលមានចំណុចខ្ពស់ ប៉ុន្តែសម្រាប់ប្រទេសដទៃទៀតយើងមានឧបសគ្គ អាហ្នឹងក៏មិនកើតដែរ ព្រោះអីអាចនឹងធ្វើឱ្យគេមើលឃើញនៅក្នុងរូបភាពមួយផ្សេងថា យើងមិនអាចរក្សាបាននូវពហុប៉ូល»។
លោក យង់ គិមអេង ថ្លែងបន្តថា ទោះបីកម្ពុជាមានកិច្ចសហប្រតិបត្តិការជាពហុប៉ូលក៏ដោយ ក៏ប៉ុន្តែកម្ពុជាមិនទាន់បានពង្រឹងវាឱ្យបានខ្លាំងស្មើៗគ្នានៅឡើយទេ។ កម្ពុជាបានពង្រឹងកិច្ចសហប្រតិបត្តិការជាមួយប្រទេសចិនបានខ្លាំង ប៉ុន្តែជាមួយបណ្តាប្រទេសអឺរ៉ុប និងអាមេរិក ជាពិសេសជាមួយបណ្តាប្រទេសសេរីនៅមានឧបសគ្គច្រើន ជាពិសេសនៅក្នុងរឿងប្រជាធិបតេយ្យ និងសិទ្ធិមនុស្សដែលប្រទេសសេរីទាំងនោះតម្រូវឱ្យកម្ពុជាមានការកែលម្អ៕
