លោក អ៊ិត សំហេង ក្នុងកិច្ចប្រជុំមួយកាលពីខែមិថុនា ឆ្នាំ២០២២ ។ រូបថត ក្រសួងការងារ
ភ្នំពេញៈ ក្រសួងការងារនិងបណ្តុះបណ្តាលវិជ្ជាជីវៈកំណត់កាលបរិច្ឆេទសម្រាប់ការទូទាត់ប្រាក់សោធននិវត្តន៍ជាផ្លូវការ ដែលនឹងត្រូវកាត់ភាគទានចំនួន៤ភាគរយចាប់ពីថ្ងៃទី ១ ខែតុលាតទៅ ហើយបានណែនាំពីបែបបទនិងនីតិវិធីនៃការចុះបញ្ជីសហគ្រាស គ្រឹះស្ថាន ក្នុងការបង់ភាគទាន និងការផ្តល់វិភាជន៍បូជាសពនៃរបបសន្តិសុខសង្គម ផ្នែកប្រាក់សោធន សម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ។
ការប្រកាសយ៉ាងដូច្នេះ បានធ្វើឡើងនៅក្នុងប្រកាសចំនួន ៣ ច្បាប់ផ្សេងគ្នា ចុះថ្ងៃទី ៥ កក្កដា ឆ្នាំ ២០២២ របស់ក្រសួងការងារ និងបណ្តុះបណ្តាលវិជ្ជាជីវៈ ដែលប្រកាសនេះ មានគោលបំណងបញ្ជាក់បន្ថែមជុំវិញការអនុវត្តរបបសន្តិសុខសង្គមផ្នែកប្រាក់សោធននិវត្តន៍សម្រាប់បុគ្គលដែលស្ថិតនៅក្រោមបទប្បញ្ញត្តិច្បាប់ស្ដីពីការងារ ក្រោយប្រកាសឲ្យប្រើកាលពីឆ្នាំ ២០២១ កន្លងទៅ។
ប្រកាសដែលចុះហត្ថលេខារបស់លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា កាលបរិច្ឆេទនៃការចាប់ផ្តើមបង់ភាគទាននៃរបបសន្តិសុខសង្គមផ្នែកប្រាក់សោធនតាមរបបភាគទាន ជាកាតព្វកិច្ច និងរបបភាគទានដោយស្ម័គ្រចិត្ត ត្រូវដាក់ឲ្យអនុវត្តចាប់ពីថ្ងៃទី ១ ខែ តុលា ឆ្នាំ ២០២២ តទៅ។
.jpg)
ប្រកាសទាំងនោះ ក៏បានកំណត់បែបបទ និងនីតិវិធីនៃការផ្តល់វិភាជន៍បូជាសពនៃរបបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដើម្បីធានាបាននូវប្រសិទ្ធភាព និងប្រសិទ្ធផលនៃការអនុវត្តរបបសន្តិសុខសង្គម។
ប្រកាសបានបញ្ជាក់ថា«ប្រាក់វិភាជន៍បូជាសពផ្នែកប្រាក់សោធននេះ នឹងត្រូវប្រគល់ដល់សិទ្ធិវន្តនៃវិភាជន៍បូជាសព ឬអ្នកចាត់ចែងបូជាសព ក្រោយជូនដំណឹងមក ប.ស.ស. ក្នុងរយៈពេលយ៉ាងយូរ ២(ពីរ)សប្ដាហ៍ គិតចាប់ពីកាលបរិច្ឆេទនៃសោធនិកជរាភាព ឬសោធនិកទុព្វលភាពទទួលមរណភាព»។
ប្រកាសបានបញ្ជាក់ទៀតថា៖ «វិភាជន៍បូជាសពផ្នែកប្រាក់សោធន ត្រូវកំណត់ស្មើនឹង ៥ (ប្រាំ) ខែ នៃប្រាក់សោធនចុងក្រោយរបស់សាមីខ្លួន។ វិភាជន៍បូជាសពនៃសោធនិកជរាភាពឬសោធនិកទុព្វលភាពត្រូវកំណត់អប្បបរមាស្មើនឹង ២ ០០០ ០០០ (ពីរលាន)រៀល»។
ក្រៅពីនេះ ប្រកាសមួយក្នុងចំណោមប្រកាសទាំង ៣ ក៏បានបង្ហាញពីបែបបទ និងនីតិវិធីនៃការចុះបញ្ជីសហគ្រាស គ្រឹះស្ថាន កម្មករនិយោជិត និងការបង់ភាគទាន សម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ក្នុងបេឡាជាតិសន្តិសុខសង្គមផងដែរ។
ប្រកាសនោះបានបញ្ជាក់ថា៖ «និយោជក ឬម្ចាស់សហគ្រាស គ្រឹះស្ថាន ដែលស្ថិតនៅក្នុងវិសាលភាពអនុវត្តនៃច្បាប់ស្ដីពីរបបសន្តិសុខសង្គម ត្រូវមានកាតព្វកិច្ចមកចុះបញ្ជីសហគ្រាស គ្រឹះស្ថានរបស់ខ្លួននៅ ប.ស.ស.។ ចំពោះនិយោជកឬម្ចាស់សហគ្រាស គ្រឹះស្ថាន ដែលកំពុងដំណើរការនិងមិនទាន់បានចុះបញ្ជីនៅ ប.ស.ស. ត្រូវមានកាតព្វកិច្ចមកចុះបញ្ជីរយៈពេលយ៉ាងយូរ ៣០ (សាមសិប) ថ្ងៃ បន្ទាប់ពីប្រកាសនេះ ចូលជាធរមាន»។
ចំពោះនិយោជកឬម្ចាស់សហគ្រាស គ្រឹះស្ថាន ដែលបើកដំណើរការថ្មី ក្រោយពីប្រកាសនេះចូលជាធរមានត្រូវមានកាតព្វកិច្ចមកចុះបញ្ជីនៅ ប.ស.ស រយៈពេលយ៉ាងយូរ ៣០ (សាមសិប) ថ្ងៃ បន្ទាប់ពីកាលបរិច្ឆេទនៃការចាប់ផ្ដើមបើកសហគ្រាស គ្រឹះស្ថាន។ នេះបើតាមប្រកាស ខណៈនិយោជកឬម្ចាស់សហគ្រាស គ្រឹះស្ថាន ដែលបានចុះបញ្ជីនៅ ប.ស.ស.ផ្នែកហានិភ័យការងារ និងផ្នែកថែទាំសុខភាពរួច មិនតម្រូវឱ្យចុះបញ្ជីសហគ្រាស គ្រឹះស្ថានឡើងវិញទេ។
លោក ហេង សុផាន់ណារិទ្ធ អគ្គនាយករង ប.ស.ស. បាននិយាយថា ការផ្សព្វផ្សាយរបបសន្ដិសុខសង្គមផ្នែកប្រាក់សោធន គឺជាការងារដ៏សំខាន់ចំពោះមុខដែលត្រូវបញ្ជ្រាបការយល់ដឹងដល់សាធារណជន ជាពិសេសសមាជិក ប.ស.ស.។ លោកបានបន្តថា មន្ត្រីក៏ដើរតួយ៉ាងសំខាន់ក្នុងការផ្ដល់ព័ត៌មានទៅកាន់សមាជិក ប.ស.ស. តាមរយៈការចុះផ្សព្វផ្សាយ ការធ្វើបទយកការណ៍ ការផលិតវីដេអូ និងការរចនាខិត្តប័ណ្ណផ្សេងៗជាច្រើនសម្រាប់ផ្សព្វផ្សាយនូវរបបសន្តិសុខសង្គមផ្នែកប្រាក់សោធននេះ ទៅកាន់សាធារណជន ពិសេសសមាជិក ប.ស.ស. ដើម្បីបញ្ជ្រាបចំណេះដឹងអំពីលក្ខខណ្ឌនៅពេលពួកគាត់ដល់អាយុចូលនិវត្តន៍(ប្រាក់រ៉ឺត្រែត)។
លោកបានបញ្ជាក់ថា៖ «របបសន្ដិសុខសង្គមផ្នែកប្រាក់សោធន បានលេចឡើងជាផ្លូវការលើព្រះរាជាណាចក្រកម្ពុជា ជាមួយគ្នានេះគ្រប់អង្គភាពក្នុងស្ថាប័ន ប.ស.ស. បាននិងកំពុងត្រៀមខ្លួនក្នុងការផ្សព្វផ្សាយនូវរបបសន្ដិសុខសង្គមដ៏ល្អប្រសើរមួយនេះ»។
យោងតាមច្បាប់ស្តីពីរបបសន្តិសុខសង្គម ចំពោះនិយោជកនៃសហគ្រាស គ្រឹះស្ថានដែលមិនអនុវត្តកាតព្វកិច្ចនៃការបង់ភាគទានតាមការកំណត់ឬមិនអនុវត្តកាតព្វកិច្ចរាយការណ៍ពីសកម្មភាពនិយោជិតឲ្យបានត្រឹមត្រូវនឹងត្រូវបង់ប្រាក់ពិន័យអន្តរការណ៍ពី ១០ ទៅ ៣០ ដង នៃប្រាក់ឈ្នូលយោងប្រចាំថ្ងៃ ហើយការពិន័យនេះត្រូវអនុវត្តស្មើនឹងចំនួនមនុស្សដែលនិយោជកបានប្រើប្រាស់ក្នុងលក្ខខណ្ឌផ្ទុយ។
របបសន្តិសុខសង្គមផ្នែកប្រាក់សោធននិវត្តន៍សម្រាប់បុគ្គលដែលស្ថិតនៅក្រោមបទប្បញ្ញត្តិច្បាប់ស្ដីពីការងារ គឺជាច្បាប់មួយដែលកំណត់ឲ្យសមាជិក ប.ស.ស. ជាកម្មករនិយោជិតមានសិទ្ធិទទួលបានសោធនជរាភាព ប្រសិនបើសាមីជន បានបំពេញលក្ខខណ្ឌចំនួន ៣ ដោយបានចុះបញ្ជីក្នុងផ្នែកសោធនមានអាយុយ៉ាងតិច ៦០ ឆ្នាំ និងបានបង់ភាគទានផ្នែកប្រាក់សោធនយ៉ាងតិច ១២ ខែ៕
