ជំនួបរវាងមន្ត្រីនៃមន្ទីរពេទ្យបេះដូងជប៉ុននិងលោក ជា សុផារ៉ា កាលពីចុងខែមុន។ រូបថត ហ្វេសប៊ុក
ត្បូងឃ្មុំៈ អង្គការវេជ្ជសាស្ដ្របេះដូងជប៉ុនបានសម្រេចចិត្ដគាំទ្រដល់មន្ទីរពេទ្យតំបន់មួយស្ថិតក្នុងខេត្ដត្បូងឃ្មុំ តាមសំណើសុំជំនួយផ្នែកវេជ្ជសាស្ដ្រពីសំណាក់លោកឧបនាយករដ្ឋមន្ដ្រី ជា សុផារ៉ា រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់។
លោកវេជ្ជបណ្ឌិត ហ៊ីដេតុ យ៉ូស៊ីអូកា (Hideto Yoshioka) ជាស្ថាបនិកនិងជាគ្រូពេទ្យវះកាត់ជំងឺកុមារមកពីមន្ទីរពេទ្យបេះដូងជប៉ុនក៏ដូចជា បុគ្គលិកមន្ទីរពេទ្យបេះដូងជប៉ុននៅកម្ពុជាមួយចំនួន និងក្រុមគ្រូពេទ្យមកពីមន្ទីរពេទ្យបង្អែកស្រុកក្រូចឆ្មារបានជួបជាមួយឧបនាយករដ្ឋមន្ដ្រីនិងកាលពីថ្ងៃសុក្រ ទី ៣០ ខែមិថុនា កន្លងទៅ នៅទីស្តីការក្រសួង។
យោងតាមមន្ទីរពេទ្យបេះដូងជប៉ុនដែលមានទីតាំងក្នុងមន្ទីរពេទ្យបង្អែកស្រុកពញាឮ ខេត្ដកណ្ដាលបានឱ្យដឹងថា ការជួយគាំទ្រនេះត្រូវបានធ្វើឡើងសម្រាប់មន្ទីរពេទ្យទើបកសាងថ្មីដែលត្រូវបានបញ្ចប់ការសាងសង់នៅចុងឆ្នាំ ២០២១ លើផ្ទៃដីជាង ១៣ ០០០ ម៉ែត្រការ៉េ។
.jpg)
សំណង់អគារមន្ទីរពេទ្យបង្អែកស្រុកក្រូចឆ្មារដ៏ធំ ស្ថិតក្នុងភូមិខ្សាច់ឆេះលើ ឃុំក្រូចឆ្មារ ស្រុកក្រូចឆ្មារ ខេត្ដត្បូងឃ្មុំនេះ ត្រូវបានដឹងថា វាជាអំណោយរបស់លោកនាយករដ្ឋមន្ដ្រីហ៊ុន សែន និងភរិយាតាមរយៈលោកឧបនាយករដ្ឋមន្ដ្រីនិងជារដ្ឋមន្ដ្រីក្រសួងរៀបចំដែនដី នគរូបនីយកម្មនិងសំណង់។
នៅក្នុងជំនួបនោះលោក ជា សុផារ៉ា បានសម្ដែងការកោតសរសើរចំពោះការជួយគាំទ្រពីសំណាក់មន្ទីរពេទ្យបេះដូងជប៉ុន និងការផ្ដល់ជំនួយដល់អ្នកមានលទ្ធផលទទួលបានសេវាកម្មវេជ្ជសាស្ដ្រតិចតួច ព្រមទាំងស្នើសុំការគាំទ្រពីសំណាក់ផ្នែកសម្ភពដែលពិបាកក្នុងការដោះស្រាយបញ្ហាបន្ទាន់ដោយត្រូវដឹកជញ្ជូនទៅកាន់តំបន់ទីក្រុង អំឡុងពេលសម្រាលកូនជួបអាសន្ន។
លោក ជា សុផារ៉ា បានថ្លែងថា៖ «ខ្ញុំក៏ជាអ្នកមកពីខេត្ដត្បូងឃ្មុំម្នាក់ ហើយខេត្ដនេះជួបបញ្ហាចំពោះមជ្ឈមណ្ឌលសុខភាពនេះ។ វាពិបាកកសាងមន្ទីរពេទ្យ ពីព្រោះយើងមិនអាចដំណើរការមន្ទីរពេទ្យដោយមានមនុស្សតែម្នាក់ ហើយយើងត្រូវការដំណើរការរយៈពេលយូរអង្វែង»។
លោកបានបន្ដថា៖ «ទោះបីជាប្រជាជនរំពឹងលើមន្ទីរពេទ្យនៅខេត្ដផ្សេង វាពិតជាមានចម្ងាយឆ្ងាយ និងចំណាយពេលយូរធ្វើដំណើរ។ ដូច្នេះពួកគេជួបបញ្ហាចំពោះសេវាកម្មថែទាំសុខភាពនេះ។ យើងចង់ឱ្យលោកបន្ដកិច្ចសហប្រតិបត្ដិការផ្ដល់សេវាកម្មដល់អ្នកដែលពិបាកក្នុងការទទួលបាននូវសេវាវេជ្ជសាស្ដ្រនៅកម្ពុជា»។
ជាការឆ្លើយតបលោកវេជ្ជបណ្ឌិត យ៉ូស៊ីអូកា ដែលទើបត្រឡប់ពីប្រទេសជប៉ុនធ្វើការវះកាត់កុមារមហារីកកម្ពុជាចំនួន ១០ នាក់ នាពេលថ្មីៗនេះបានឱ្យដឹងថា មន្ទីរពេទ្យបង្អែកស្រុកក្រូចឆ្មារ ត្រូវការពេលវេលាបន្ថែមក្នុងការដំណើរការរលូនទៅមុខ។
លោកបានឱ្យដឹងថា៖ «យើងត្រូវការជួយមន្ទីរពេទ្យបង្អែកក្រូចឆ្មារក្នុងរយៈពេលជាច្រើនឆ្នាំ។បុគ្គលិកកម្ពុជាពិតជាមានទេពកោសល្យណាស់ ហើយយើងនឹងធ្វើការបណ្ដុះបណ្ដាលលើធនធានមនុស្ស ដោយសារពួកគេនឹងទទួលរ៉ាប់រងផ្នែកវេជ្ជសាស្ដ្រនៅកម្ពុជានាពេលអនាគត»។
ស្ថាបនិកមន្ទីរពេទ្យបេះដូងជប៉ុនលោក យ៉ូស៊ីអូកា បានបន្ដថា ជំងឺមហារីកកុមារនៅតែជាអាទិភាពចម្បងចំពោះយុទ្ធនាការក្រៅមន្ទីរពេទ្យបេះដូងជប៉ុន ដោយសារអត្រាមរណៈរបស់ជំងឺកាចសាហាវនេះនៅតែខ្ពស់។
លោកបានបញ្ជាក់ថា៖ «ជំងឺដែលត្រូវយកចិត្ដទុកដាក់ចម្បងមានដូចជាមហារីកកុមារដែលនៅតែមានអត្រារស់រានទាបជាងនៅប្រទេសជប៉ុន។ ដូច្នេះយើងនឹងទាញគម្លាតនេះឱ្យស្ថិតនៅប្រហាក់ប្រហែលគ្នា»។
មន្ទីរពេទ្យបេះដូងជប៉ុនមានផែនការផ្ដល់ការគាំទ្រដល់មន្ទីរពេទ្យបង្អែកស្រុកក្រូចឆ្មារ រយៈពេល ២-៣ ឆ្នាំទៅមុខ រួមទាំងការបញ្ជូនបុគ្គលផ្នែកវេជ្ជសាស្ដ្រថែមទៀត។
បរិក្ខារវេជ្ជសាស្ដ្រចំនួន ១៧ មុខតម្លៃជាង ២៦ ម៉ឺនដុល្លារ ត្រូវបានផ្ដល់ដល់មន្ទីរពេទ្យបង្អែកស្រុកក្រូចឆ្មារ ដើម្បីបង្កើនសមត្ថភាពចំពោះសេវាកម្មព្យាបាលកាន់តែប្រសើរ។
គួរបញ្ជាក់ថា មន្ទីរពេទ្យបង្អែកស្រុកក្រូចឆ្មារ ត្រូវបានកសាងឡើងដំបូងក្នុងឆ្នាំ ១៩៦៦ រីឯសំណង់អគារថ្មីទី១ ត្រូវបានបញ្ចប់នៅចុងឆ្នាំ ២០២១ ក្នុងទំហំទឹកប្រាក់ ១,៤ លានដុល្លារ ខណៈអគារទី២ មានទំហំប៉ុនគ្នាជាមួយប្រវែង ៦២ ម៉ែត្រទទឹង ១៨ ម៉ែត្រ និងកម្ពស់ ៤ ជាន់៕
