កម្មកររោងចក្រចេញមកទិញអាហារសម្រាប់ពេលថ្ងៃត្រង់ នៅសង្កាត់ទួលសង្កែ ខណ្ឌឫស្សីកែវ។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន សម្រេចបន្ថែមទឹកប្រាក់ ២ ដុល្លារ ពីលើតួលេខដែលក្រុមប្រឹក្សាជាតិប្រាក់ឈ្នួលអប្បបរមា បានស្នើឡើងចំនួន ១៩៨ ដុល្លារ បន្ទាប់ពីតួលេខស្នើនេះទទួលបានសំឡេងគាំទ្រច្រើនជាងគេ ក្នុងការបោះឆ្នោត ដែលនាំឱ្យប្រាក់ឈ្នួលអប្បបរមារបស់កម្មករសម្រាប់អនុវត្តឆ្នាំ ២០២៣ ខាងមុខ ឡើងដល់ ២០០ ដុល្លារ។
នៅថ្ងៃទី ២១ កញ្ញាក្រុមប្រឹក្សាជាតិប្រាក់ឈ្នួលអប្បបរមា បានសម្រេចបោះឆ្នោតលើតួលេខចំនួន ៤ បន្ទាប់ពីការចរចា របស់សមាជិកទាំង ៥១ រូបមិនមានចំណុចរួម។ ការបោះឆ្នោតទទួលបានលទ្ធផលលើតួលេខ ១៩៨ មានសំឡេងគាំទ្រ ៤៦ សំឡេង និងតួលេខ ២១៣ មានសំឡេងគាំទ្រ ៥ សំឡេង ខណៈតួលេខ ២១០ និងតួលេខ ២០៦ មានសំឡេងគាំទ្រ ០ សំឡេង។ នេះបើតាមសេចក្តីថ្លែងការណ៍របស់ក្រុមប្រឹក្សាជាតិប្រាក់ឈ្នួលអប្បបរមាចុះថ្ងៃទី២១ កញ្ញា។
ក្រុមប្រឹក្សាជាតិប្រាក់ឈ្នួលអប្បបរមាបានស្នើតួលេខចំនួន ១៩៨ ដុល្លារ ជូនរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីធ្វើការពិនិត្យសម្រេចលើប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផល ធ្វើដំណើរ និងកាបូប សម្រាប់ឆ្នាំ ២០២៣ ។
.jpg)
សេចក្តីថ្លែងការណ៍ បានបន្ថែមថា ដោយយោងរបាយការណ៍ និងស្ថិតនៅក្នុងស្ថានភាពដែលកម្ពុជាបានបង្កើតនូវភាពស៊ាំសហគមន៍ ដែលអនុញ្ញាតឱ្យដំណើរការសកម្មភាពសង្គមសេដ្ឋកិច្ចឡើងវិញ និងត្រឡប់ទៅរកនិន្នាការធម្មតាក្នុងគន្លងប្រក្រតីភាពថ្មី ព្រមទាំងសំដៅសម្រាលបន្ទុករបស់ប្រជាពលរដ្ឋដែលទទួលរងផលប៉ះពាល់ពីការកើនឡើងថ្លៃទំនិញ ដែលបង្កដោយសារសង្គ្រាមរវាងប្រទេសរុស្ស៊ី និងអ៊ុយក្រែន លោកនាយករដ្ឋមន្ត្រី ហ៊ុន សែន បានសម្រេចបន្ថែមទឹកប្រាក់ចំនួន ២ ដុល្លារ លើទឹកប្រាក់ចំនួន ១៩៨ ដុល្លារ។
សេចក្តីថ្លែងការណ៍បញ្ជាក់ថា៖ «ចាប់ពីថ្ងៃទី១ ខែមករា ឆ្នាំ២០២៣ បងប្អូនកម្មករនិយោជិត ផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប នឹងមានប្រាក់ឈ្នួល អប្បបរមា ២០០ ដុល្លារក្នុង ១ ខែចំពោះកម្មករនិយោជិតពេញសិទ្ធិ និង ១៩៨ ដុល្លារក្នុង ១ ខែចំពោះកម្មករនិយោជិតសាកល្បង» ។
ទន្ទឹមនឹងការសម្រេចតួលេខថ្មីនេះ លោក អ៊ិត សំហេង លើកឡើងថា ចំពោះប្រាក់អត្ថប្រយោជន៍ផ្សេងទៀតដែលកម្មករនិយោជិតធ្លាប់ទទួលបានកន្លងមក ត្រូវបានរក្សាទុកនៅដដែល។ លោកបញ្ជាក់ថា អត្ថប្រយោជន៍ទាំងនោះមានដូចជាប្រាក់សោហ៊ុយធ្វើដំណើរ និងស្នាក់នៅចំនួន ៧ ដុល្លារក្នុង ១ ខែ ប្រាក់រង្វាន់ធ្វើការទៀងទាត់ចំនួន ១០ ដុល្លារក្នុង ១ ខែ ប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន ២ ០០០ រៀលក្នុង ១ ថ្ងៃ ឬការទទួលបានបាយ ១ ពេលដោយឥតគិតថ្លៃ និងប្រាក់រង្វាន់អតីតភាពការងារចំនួនពី ២ ដុល្លារដល់ ១១ ដុល្លារក្នុង ១ ខែសម្រាប់កម្មករនិយោជិតដែលបានធ្វើការចាប់ពីឆ្នាំទី២ ដល់ឆ្នាំទី១១។
លោកបញ្ជាក់ថា ដូចនេះ ជាមធ្យមកម្មករនិយោជិតម្នាក់ៗ នឹងទទួលបានប្រាក់បៀវត្សរ៍យ៉ាងតិចចំនួនពី ២១៧ ដុល្លារដល់ ២២៨ ដុល្លារក្នុង ១ ខែ។ «ក្រសួងក៏សូមថ្លែងអំណរគុណដ៏ជ្រាលជ្រៅចំពោះសម្តេចតេជោនាយករដ្ឋមន្ត្រី ដែលបានសម្រេចផ្ដល់ប្រាក់បន្ថែមចំនួន ២ ដុល្លារ លើតួលេខដើមរបស់ក្រុមប្រឹក្សាជាតិប្រាក់ឈ្នួលអប្បបរមា ដែលការបន្ថែមនេះ នឹងរួមចំណែកធ្វើឱ្យជីវភាពរស់នៅរបស់បងប្អូនកម្មករនិយោជិតផ្នែកវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប និងក្រុមគ្រួសារកាន់តែមានភាពល្អប្រសើរឡើងជាងមុន» ។
យោងតាមប្រកាសរបស់ក្រសួងការងារចុះថ្ងៃទី២១ កញ្ញា បានឱ្យដឹងថា ក្រៅតែពីការកំណត់នេះ ចំពោះកម្មករនិយោជិតដែលទទួលបានប្រាក់ឈ្នួលគិតតាមបរិមាណផលិតផល (ដេរស៊ីបុង) ត្រូវទទួលបានប្រាក់ឈ្នួលតាមទិន្នផលជាក់ស្ដែងដែលធ្វើបាន។ បើទិន្នផលការងារទទួលបាននោះលើសពីចំនួនប្រាក់ឈ្នួលដែលកំណត់ដោយក្រសួង គឺត្រូវទទួលបានតាមចំនួនលើសនោះ ហើយប្រសិនបើទាបជាងប្រាក់ឈ្នួលដែលបានកំណត់ នោះនិយោជកត្រូវបន្ថែមឱ្យគ្រប់ចំនួន ១៩៨ ដុល្លារក្នុង ១ ខែ សម្រាប់កម្មករនិយោជិតសាកល្បង និង ២០០ ដុល្លារក្នុង ១ ខែ សម្រាប់កម្មករនិយោជិតពេញសិទ្ធិ។
អ្នកស្រី សុខ ខុម កម្មកររោងចក្រម្នាក់ក្នុងខណ្ឌពោធិ៍សែនជ័យ ថ្លែងនៅថ្ងៃទី២១ កញ្ញាថា ការដំឡើងប្រាក់ឈ្នួលថ្មីនេះ សម្រាប់អ្នកស្រីគ្មានអ្វីជាទីសប្បាយចិត្តនោះទេ ខណៈទំនិញលើទីផ្សារគ្រប់ប្រភេទហក់ឡើងថ្លៃរហូត។ «អីវ៉ាន់ ១ ខែៗឡើងរហូត។ បងឯងគិតទៅ ពីមុនមាន ១ ម៉ឺនរៀលទិញម្ហូបបានហូប តែឥឡូវ ២ ម៉ឺនរៀលអីក្នុង ១ គ្រួសារ ទិញអត់បានហូបទេ (ក្នុង ១ ថ្ងៃ)។ អ្វីៗក៏ថ្លៃ សូម្បីតែប្រេងឆា ធ្លាប់តែ ១ ដប ៧ ០០០ រៀល ឥឡូវ ១ ដបឡើងដល់ ១២ ០០០ រៀល ហើយពងទាឡើង ១០ គ្រាប់ ដល់ ៧០០០ រៀលហើយ។ មានរឿងអីត្រូវសប្បាយចិត្ត»។ «មានតែអំពាវនាវឱ្យរដ្ឋាភិបាលឡើងប្រាក់ខែឱ្យបានខ្ពស់ជាងនេះ ឱ្យកម្មករបានរស់ស្រួលខ្លះទៅ ហើយបើមិនបានទេ ជួយឱ្យបញ្ចុះតម្លៃទំនិញចុះថោកទៅ។ បើផ្ទះជួលវិញទប់ស្កាត់បានក្នុងអំឡុងពេលកូវីដ តែទើបថ្មីៗនេះ ឡើង ៥ ដុល្លារទៀត ពី ៣៥ ដុល្លារ ទៅ ៤០ដុល្លារ» ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា បាននិយាយថា បើទោះជាការសម្រេចនេះ មិនទាន់ឆ្លើយតបនឹងការចង់បានរបស់កម្មករនិយោជិតក៏ដោយ ប៉ុន្តែទាំងនេះ គឺជាការសម្រេចចិត្តរបស់សំឡេងភាគច្រើននៃអង្គបោះឆ្នោតដែលជាតំណាងនៃភាគីចរចា។ ដូច្នេះលោក ត្រូវតែទទួលយកនូវអ្វីដែលជាការសម្រេចចិត្តរួម និងមានសំឡេងគាំទ្រច្រើន។ «យើងឃើញថា ស្ថានភាព ២ ឆ្នាំមកនេះ គឺស្ថានភាពកម្មកររបស់យើង គឺពិតជាជួបការលំបាកខ្លាំងមែនទែនផ្នែកហិរញ្ញវត្ថុរបស់ពួកគាត់ ដោយសារតែពាក់ព័ន្ធនឹងបញ្ហាកូវីដ ១៩ ហើយអ្វីដែលសំខាន់ ដូចជាឆ្នាំ ២០១៩ និងឆ្នាំ ២០២២ គឺកម្មករបានបាត់បង់ផលប្រយោជន៍ជាច្រើន ដូចជាការកាត់ថ្ងៃឈប់សម្រាក និងការលុបថ្ងៃឈប់សងជាដើម» ។
ចំណែកលោកកាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) ប្រាប់ ភ្នំពេញ ប៉ុស្តិ៍ ថា ការដំឡើងប្រាក់ឈ្នួលថ្មី រួមនឹងការបង់ភាគទានផ្នែកសោធន នឹងនាំឱ្យការចំណាយលើកម្លាំងពលកម្មមានការកើនឡើងខ្ពស់ចន្លោះពី ១០ ទៅ ១២ ដុល្លារបន្ថែមទៀតក្នុងកម្មករនិយោជិតម្នាក់។ បញ្ហានេះ ប្រាកដណាស់នឹងធ្វើឱ្យប៉ះពាល់ដល់កម្រិតប្រាក់ចំណេញរបស់ក្រុមហ៊ុន ខណៈដែលនិយោជកមិនអាចដំឡើងថ្លៃផលិតទៅអ្នកបញ្ជាទិញបាន ដោយសារការប្រកួតប្រជែងជាមួយប្រទេសដទៃ។
លោកបញ្ជាក់ថា៖ «កុំភ្លេចថា យើងនៅមានប្រាក់ឧបត្ថម្ភផ្សេងៗទៀត។ រោងចក្រត្រូវប្រឹងប្រែងបន្តទៀតលើការលើកកម្ពស់ផលិតភាពការងារ កាត់បន្ថយការខ្ជះខ្ជាយក្នុងផលិតកម្ម និងកាត់បន្ថយការចំណាយមិនចាំបាច់ផ្សេងៗ» ។ លោកអំពាវនាវដល់អ្នកបញ្ជាទិញអន្តរជាតិបន្តការគាំទ្រដល់កម្ពុជាដោយបន្តផ្តល់នូវការបញ្ជាទិញក្នុងតម្លៃមួយសមស្របទៅនឹងកម្រិតប្រាក់ឈ្នួលថ្មីរបស់កម្មករសម្រាប់ឆ្នាំ ២០២៣។
កាលពីឆ្នាំ ២០២១ ក្រោយក្រុមប្រឹក្សាជាតិប្រាក់ឈ្នួលអប្បបរមាសម្រេចស្នើតួលេខ ១៩២ ដុល្លារ យកមកអនុវត្តក្នុងឆ្នាំ ២០២២ លោក ហ៊ុន សែន ប្រកាសបន្ថែមទឹកប្រាក់ ២ ដុល្លារទៀតពីលើការស្នើនេះនាំឱ្យប្រាក់ឈ្នួលសម្រាប់អនុវត្តក្នុងឆ្នាំ ២០២២ ឡើងដល់ ១៩៤ ដុល្លារ ក្នុង ១ ខែ៕
