ភ្នំពេញៈ ឯកអគ្គរាជទូតម៉ាឡេស៊ីប្រចាំកម្ពុជាបានថ្លែងអំណរគុណចំពោះរាជរដ្ឋាភិបាលកម្ពុជា ជាពិសេសលោកនាយករដ្ឋមន្ត្រី ហ៊ុន សែន ចំពោះការចាត់ចែងក្រុមសមត្ថកិច្ច ក្នុងការលុបបំបាត់រាល់បញ្ហាជុំវិញការឆបោកការងារ និងករណីជនជាតិម៉ាឡេស៊ី ដែលត្រូវបានឆបោកឱ្យធ្វើការតាមប្រព័ន្ធអនឡាញ។
លោកDatuk Eldeen Husaini Mohd Hashim ឯកអគ្គរាជទូតម៉ាឡេស៊ីប្រចាំកម្ពុជា ថ្លែងក្នុងសន្និសីទសារព័ត៌មាន នៅថ្ងៃទី ២២ កញ្ញាថា ប្រតិបត្តិការនេះបានធ្វើឱ្យប្រជាជនម៉ាឡេស៊ីជាច្រើននាក់ត្រូវបានជួយសង្គ្រោះដោយអាជ្ញាធរកម្ពុជា និងត្រូវបានបញ្ជូនឱ្យត្រឡប់ទៅផ្ទះដើម្បីបានជួបជុំក្រុមគ្រួសារ និងមនុស្សជាទីស្រឡាញ់។
ជាមួយគ្នានេះ លោកក៏បានថ្លែងអំណរគុណចំពោះលោកប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលបានពង្រឹងទំនាក់ទំនងមិត្តភាពទ្វេភាគីដ៏រឹងមាំ រវាងប្រទេសម៉ាឡេស៊ី និងកម្ពុជា។
លោកថ្លែងថា៖ «ថ្មីៗនេះអំឡុងពេលទស្សនកិច្ចរបស់រដ្ឋមន្ត្រីការបរទេសម៉ាឡេស៊ីមកកាន់ប្រទេសកម្ពុជា លោកទាំង ២ បានពិភាក្សាគ្នាតាមរយៈទូរស័ព្ទអំពីកិច្ចសហការ រវាងរាជរដ្ឋាភិបាលទាំង ២ ក្នុងប្រតិបត្តិការជួយសង្គ្រោះដល់ប្រជាជនម៉ាឡេស៊ីជាច្រើនត្រឹមរយៈពេល ១ ខែ»។
លោកឯកអគ្គរាជទូត ក៏បានថ្លែងអំណរគុណចំពោះ លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នៃប្រទេសកម្ពុជា ដែលលោកពិតជាមានការគាំទ្រយ៉ាងខ្លាំងជាមួយអាជ្ញាធរក្នុងការធានាសង្គ្រោះប្រជាជនម៉ាឡេស៊ីជាច្រើន។
បើតាម លោក Datuk Eldeen Husaini Mohd Hashim តាមរយៈការជួយពីរដ្ឋាភិបាលកម្ពុជា ស្ថានទូតម៉ាឡេស៊ីបានចាត់ចែងជួយជនជាតិ ម៉ាឡេស៊ីចំនួន ១៥៣ នាក់ ដែលក្នុងនោះ ១៣៧ នាក់ ត្រូវបានបញ្ជួនត្រឡប់ទៅកាន់ប្រទេសកំណើតវិញ និងនៅសល់ ១៦ នាក់ទៀតកំពុងស្នាក់នៅក្នុងមជ្ឈមណ្ឌលឃុំឃាំងអន្តោប្រវេសន៍។ តួលេខនេះអាចនិយាយបានថា ជាកម្រិតនៃកិច្ចសហប្រតិបតិ្តការ ដែលបានកើតឡើង រវាងស្ថានទូត និងរដ្ឋាភិបាលកម្ពុជា។
លោកថ្លែងថា៖ «យើងនឹងបន្តការធ្វើការជាមួយពួកគេ ដើម្បីធានាដោះស្រាយបញ្ហានៅក្នុងដៃឱ្យរួចរាល់ទាំងអស់តែម្តង»។
លោក ស ខេង រដ្ឋមន្ត្រីក្រសួងមហាផ្ទៃ ថ្លែងក្នុងពិធីដឹកនាំកិច្ចប្រជុំណែនាំកិច្ចការប្រឆាំងអំពើជួញដូរមនុស្ស ថ្ងៃទី ១៩ កញ្ញាថា រាជរដ្ឋាភិបាលកម្ពុជាបានខិតខំប្រឹងប្រែងប្រកបដោយឆន្ទៈក្នុងការប្រយុទ្ធប្រឆាំងអំពើជួញដូរមនុស្ស។ ក្នុងនោះ គិតចាប់ពីថ្ងៃទី ១៨ ខែសីហា ដល់ថ្ងៃទី ១៨ ខែកញ្ញា ឆ្នាំ ២០២២ ក្រសួងបានទទួលបណ្ដឹងសរុបចំនួន ២៨៩ ករណី ពីសាមីជន សាច់ញាតិ ស្ថានទូត និងអង្គការអន្តរជាតិមួយចំនួន។
លោក ស ខេង ថ្លែងថា៖ «ពាក្យបណ្ដឹងទាំងឡាយនេះ ដំបូងឡើយ យើងក៏មិនជឿទុកចិត្តទាំងស្រុងនោះដែរ ប៉ុន្តែឆ្លងកាត់ការអនុវត្តជាក់ស្ដែងបន្តបន្ទាប់ គឺប្រមាណ ៩៥ ភាគរយ ជាការពិត»។
បើតាម លោក ស ខេង ក្រុមប្រតិបត្តិការ ក៏បានស្រាវជ្រាវ និងស៊ើបអង្កេតបានករណីមួយចំនួនដែរ ដោយគិតចាប់ពីថ្ងៃទី ១០ ខែសីហា ដល់ថ្ងៃទី ១០ ខែកញ្ញា បានស្រាវជ្រាវ និងស៊ើបអង្កេតចំនួន ៨៥ ករណី រកឃើញមនុស្ស ១៧៦ នាក់ មានសញ្ជាតិម៉ាឡេស៊ី ក្នុងចំណោម ៨ សញ្ជាតិផ្សេងទៀត ក្នុងនោះខេត្តព្រះសីហនុច្រើនជាងគេ និងកត់សម្គាល់ថា ភាគច្រើននៃជនរងគ្រោះ ធ្វើការនៅកន្លែងអាជីវកម្មល្បែងភ្នាល់អនឡាញខុសច្បាប់៕