ភ្នំពេញៈ ដំណើរការកាត់ក្តីលើសំណុំរឿងមេដឹកនាំខ្មែរក្រហម បានឈានមកដល់ទីបញ្ចប់នៅថ្ងៃទី ២២ កញ្ញា ដែលជាសវនាការបិទបញ្ចប់នៃសាលាក្តីក្រហម ទៅលើបណ្តឹងសារទុកប្រឆាំងលោក ខៀវ សំផន អតីតប្រមុខរដ្ឋ និងជាមេដឹកនាំជាន់ខ្ពស់នៃរបបកម្ពុជាប្រជាធិបតេយ្យ ដែលនៅរស់រានមានជីវិត។
អង្គជំនុំជម្រះវិសាមញ្ញក្នុងតុលាការកម្ពុជា បានសម្រេចតម្កល់សាលក្រមសាលាដំបូង ដោយសម្រេចផ្តន្ទាទោសជនជាប់ចោទ ខៀវ សំផន ឱ្យជាប់ពន្ធនាគារអស់១ជីវិត ដោយអនុវត្តទោសត្រួតគ្នាលើសំណុំរឿង ២ គឺ ០០២/០១ និង ០០២/០២។
ការសម្រេចនេះ ជាការឈានទៅបិទបញ្ចប់អង្គជំនុំជម្រះទាំងស្រុងទៅលើអតីតមេដឹកនាំរបបខ្មែរក្រហម ហើយក៏ជាការឈានទៅបញ្ចប់ទាំងស្រុង នៃសកម្មភាពរបស់សាលាក្តីខ្មែរក្រហម ដែលជាសាលាក្តីកូនកាត់។
ទោះជាបិទបញ្ចប់ទៅពិតមែន តែក្តីរំពឹងពីយុត្តិធម៌របស់ប្រជាពលរដ្ឋនៅតែមិនមានភាពពេញលេញនោះទេ។ នេះបើតាមការលើកឡើងរបស់លោក សំបូរ ម៉ាណ្ណារ៉ា សាស្ត្រាចារ្យផ្នែកប្រវត្តិសាស្រ្តខ្មែរ។
លោកនិយាយថា៖ «កាលណាយើងនិយាយអំពីសាលាក្តីខ្មែរក្រហម យើងគួររំលឹកថា ១០ ឆ្នាំជាងហើយ ដែលយើងត្រូវយកចិត្តទុកដាក់គិតពីការប្រើប្រាស់ពេលវេលានិងថវិកា ក៏ប៉ុន្តែទោះបីជាការរួមចំណែកអស់ច្រើន អស់តិច ក៏មិនស្មើនឹងទុក្ខទារុណកម្ម វេទនា ដែលកើតឡើងក្នុងសម័យ ៣ ឆ្នាំ ៨ ខែ ២០ ថ្ងៃនោះដែរ»។
បើតាមលោក សំបូរ ម៉ាណ្ណារ៉ា វាគ្រាន់តែជាការបង្ហាញអំពីច្បាប់នៃសម័យទំនើប អំពីវិបត្តិទាំងឡាយនៃមនុស្សជាតិ តែមិនអាចបំពេញក្តីឈឺចាប់របស់ប្រជាពលរដ្ឋខ្មែរបាននោះទេ។
លោកថា៖ «បើខ្ញុំនិយាយពីយុត្តិធម៌វិញ ខ្ញុំអត់ដឹងថា យុត្តិធម៌យ៉ាងម៉េចទេ អត់ដឹងពីរបៀបយុត្តិធម៌នៅកន្លែងណាទេ កន្លែងហ្នឹងនោះ ពីព្រោះវាគ្មានពាក្យយុត្តិធម៌ សម្រាប់ពួកគាត់កើតទេ ព្រោះការឈឺចាប់វាក្រៃលែងមិនអាចបញ្ជាក់បាន»។
រីឯលោក ឆាំង យុ នាយកមជ្ឈមណ្ឌលឯកសារកម្ពុជា យល់ស្របទៅនឹងការលើកឡើងរបស់លោកសាស្ត្រាចារ្យ សំបូរ ម៉ាណ្ណារ៉ា។
លោក ឆាំង យុ លើកឡើងថា៖ «កុំថាឡើយ ១៦ ឆ្នាំ គឺយើងបានរង់ចាំអស់រយៈពេល ៤០ ឆ្នាំ យើងបានប្រឹងប្រែងអស់រយៈពេល ៤០ ឆ្នាំ នៅក្នុងពេលដែលយើងទន្ទឹងរង់ចាំដំណើរការមួយនេះ ឱ្យមានការទទួលស្គាល់ជាអន្តរជាតិ នូវអំពើប្រល័យពូជសាសន៍ដែលកើតឡើងនៅស្រុកយើង នៅពេលដែលយើងចង់បានតុលាការមួយ នៅក្នុងស្រុករបស់យើង ដើម្បីយើងបានចូលរួម។ ខ្ញុំគិតថា ទាំងអស់នេះជាប្រវត្តិសាស្ត្រ។ ខ្ញុំគិតថា គ្មានតុលាការណាមួយ ដំណើរការណាមួយ អាចប៉ះប៉ូវជីវិតរបស់ក្រុមគ្រួសារសាច់ញាតិយើងបានទេ»។
បើតាមលោក ឆាំង យុ នេះជាមេរៀនមួយ ដែលកម្ពុជាបានរៀនសូត្រ ដើម្បីទុករំឭកខ្លួនជាប្រចាំ កុំឱ្យកើតមានអំពើប្រល័យពូជសាសន៍ខ្លួនឯងសាជាថ្មីបែបនេះទៀត។
លោក ខៀវ សំផន ជាមេដឹកនាំជាន់ខ្ពស់របបខ្មែរក្រហមចុងក្រោយបង្អស់ ដែលនៅមានជីវិត និងបន្តនីតិវិធីជំនុំជម្រះក្នុងសាលាក្តីខ្មែរក្រហម ដែលបានចាប់ដំណើរការតាំងពីឆ្នាំ២០០៦។
ប្រតិបត្តិការមក ១៦ ឆ្នាំ តុលាការកូនកាត់នេះ បានកាត់ទោសមេដឹកនាំរបបខ្មែរក្រហមក្នុងសំណុំរឿង ០០១ និងសំណុំរឿង ០០២ តួយ៉ាងដូចជា កាំង ហ្កិចអ៊ាវ ហៅឌុច អតីតប្រធានមន្ទីរ ស.២១ លោក អៀង សារី អតីតរដ្ឋមន្ត្រីក្រសួងការបរទេស នៃរបបកម្ពុជាប្រជាធិបតេយ្យ និងភរិយា គឺលោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ច លោក នួន ជា អតីតប្រធានរដ្ឋសភានៃរបបកម្ពុជាប្រជាធិបតេយ្យនិងលោក ខៀវ សំផន អតីតប្រមុខរដ្ឋរបបខ្មែរក្រហម ដែលជាមេដឹកនាំចុងក្រោយ មុនដំណើការជម្រះក្តីខ្មែរក្រហមត្រូវបញ្ចប់ជាស្ថាពរ៕