ភ្នំពេញៈ មូលនិធិជាតិជំនួយសង្គមបានទទួលពានរង្វាន់ឧត្តមានុវត្តន៍នៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ អំឡុងពេលកូវីដ ១៩ ពីក្រុមប្រឹក្សាភិបាលនៃសមាគមសន្តិសុខសង្គមអាស៊ាន (ASEAN Social Security Association (ASSA) លើកទី៣៩ នៅខេត្តហ្លួងព្រះបាង ប្រទេសឡាវ។
លោក ឈួ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមូលនិធិជាតិជំនួយសង្គមបានឱ្យដឹងកាលពីថ្ងៃទី ២៤ ខែវិច្ឆិកាថា ក្នុងកិច្ចប្រជុំសមាគមសន្តិសុខសង្គមអាស៊ានលើកទី ៣៩ មូលនិធិជាតិជំនួយសង្គមដែលតំណាងដោយរូបលោកផ្ទាល់បានទទួលពានរង្វាន់ឧត្តមានុវត្តន៍នៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ អំឡុងពេលកូវីដ ១៩ ពីក្រុមប្រឹក្សាភិបាលនៃសមាគមសន្តិសុខសង្គមអាស៊ាននេះ។
ការផ្តល់ពានរង្វាន់នេះបានធ្វើឡើងនៅខេត្តហ្លួងព្រះបាងនៃសាធារណរដ្ឋប្រជាធិបតេយ្យប្រជាមានិតឡាវ បន្ទាប់ពីលោក ឈួ សុបញ្ញា បានដឹកនាំគណៈប្រតិភូមូលនិធិជាតិជំនួយសង្គមចូលរួមកិច្ចប្រជុំក្រុមប្រឹក្សាភិបាលសមាគមសន្តិសុខសង្គមអាស៊ាន ASSA នេះពីថ្ងៃទី ២៣ ខែវិច្ឆិកា ដោយមានសមាជិកសមាជិកាដែលអញ្ជើញមកពីបណ្តាប្រទេសអាស៊ានសរុបចំនួន ៧០ រូប។
កិច្ចប្រជុំ ASSA បានប្រារព្ធជារៀងរាល់ឆ្នាំនៅតាមបណ្តាប្រទេសដែលជាសមាជិកសមាគមសន្តិសុខសង្គមអាស៊ាន ក្នុងគោលបំណងដើម្បីបង្កើនកិច្ចសហប្រតិបត្តិការ និងចែករំលែកបទពិសោធន៍រវាងសមាជិកអាស៊ានឱ្យបានល្អ ក៏ដូចជា វេទិកាសម្រាប់ពិភាក្សាអំពីបញ្ហាប្រឈម និងទិសដៅបន្តសម្រាប់ការអភិវឌ្ឍលើវិស័យសន្តិសុខសង្គមផងដែរ។
លោក ឈួ សុបញ្ញា បានប្រាប់ថា៖ «ពានរង្វាន់ឧត្តមានុវត្តន៍គឺជាពានរង្វាន់របស់សមាគមសន្តិសុខសង្គមអាស៊ានដែលផ្តល់ជូនដោយប្រធានក្រុមប្រឹក្សាភិបាលជូនចំពោះបណ្តាប្រទេសជាសមាជិកអាស៊ានទាំងអស់ ដែលបានបំពេញការងារប្រកបដោយភាពជោគជ័យលើឧត្តមភាពនៃការផ្តល់សេវាគាំពារសង្គមជូនដល់ប្រជាពលរដ្ឋតាមប្រទេសនីមួយៗ»។
លោកបានបន្ថែមទៀតថា ការទទួលបានពានរបស់មូលនិធិជាតិជំនួយសង្គមពីក្រុមប្រឹក្សាជាតិសន្តិសុខសង្គមនេះគឺជាមោទនភាពមួយរបស់មូលនិធិជាតិជំនួយសង្គម (ម.ជ.ជ.) ដែលបានទទួលពានរង្វាន់ និងការទទួលស្គាល់ជាលើកដំបូង បន្ទាប់ពីស្ថាប័ននេះទើបបានបង្កើតឡើងនៅក្នុងខែមីនា ឆ្នាំ ២០២២ តាមរយ:អនុក្រឹត្យលេខ ៦៨ អនក្រ.បក ចុះថ្ងៃទី ៣១ ខែមីនា ឆ្នាំ ២០២២ ។
គណ:កម្មការបានវាយតម្លៃសម្រាប់ការផ្តល់ពានរង្វាន់បានផ្តោតលើយន្តការអនុវត្ត,ប្រព័ន្ធបើកផ្តល់,លទ្ធផលអនុវត្ត និងការសហការរបស់ស្ថាប័នពាក់ព័ន្ធ៕