បាត់ដំបងៈ សាច់មងប្រវែង ១ ២០០ ម៉ែត្រ ឡុកចាប់ត្រីចំនួន ៤ គ្រឿង បង្គោលចំនួន ១៩០ ដើម ត្រូវបានកម្លាំងសមត្ថកិច្ចចម្រុះនិងអាជ្ញាធរមូលដ្ឋានក្នុងខេត្តបាត់ដំបង ចុះបង្ក្រាបបាន កាលពីថ្ងៃទី ២៤ វិច្ឆិកា នៅចំណុចកើតអាជ្រឹង ក្នុងភូមិសាស្ត្រ ភូមិកូនខ្លុង ឃុំព្រៃតូច និងចំណុចយាយរ៉ាំម ភូមិសាស្ត្រ ភូមិទួលព្រុំ ២ ឃុំកកោះ ស្រុកមោងឫស្សី ខេត្តបាត់ដំបង។
ប្រតិបត្តិការចុះបង្ក្រាបនេះ ដឹកនាំដោយលោកវរសេនីយ៍ទោ បឿ អាត នាយរងការិយាល័យប្រឆាំងបទល្មើសសេដ្ឋកិច្ច ប្រធានក្រុមប្រតិបត្តិការគោលដៅស្រុកមោងប្ញស្សី លោកវរសេនីយ៍ឯក ស គឹមឡុង អធិការស្រុកមោងឫស្សី លោក តោ ថារី នាយរងផ្នែករដ្ឋបាលជលផលអន្លង់វិល លោកវរសេនីយ៍ទោ អ៊ី សេងហុង ប្រធានស្នាក់ការទិសទន្លេសាបភូមិភាគទី៥។
ការចុះបង្ក្រាបបទល្មើសនេសាទនេះ ក៏មានការចូលរួមពីក្រុមប្រឹក្សាឃុំជ្រៃ និងកម្លាំងសឹករងស្រុកមោងឫស្សី ផងដែរ ដោយប្រើប្រាស់សម្ភាររួមមាន កាណូតស្មាច់ ៤ គ្រឿង កណ្តៀវ ៦ ដើម និងកាំបិតចំនួន ១០ ដើម។
ការចុះបង្ក្រាបនេះ ក្រៅពីរឹបអូសឧបករណ៍នេសាទល្មើសច្បាប់ខាងលើ សមត្ថកិច្ចក៏បានលែងត្រីនិងកូនត្រីចម្រុះ ៥០ គីឡូក្រាម ដែលរឹបអូសបានចូលទៅក្នុងបឹងធម្មជាតិវិញផងដែរ។
ចំណែករាល់វត្ថុតាងដែលបង្ក្រាបបានសមត្ថកិច្ចកាប់បំផ្លាញនិងដុតកម្ទេចចោលនៅនឹងកន្លែង ខណៈដែលជនល្មើសបានរត់គេចខ្លួនមុនពេលសមត្ថកិច្ចចុះអន្តរាគមន៍៕