ភ្នំពេញៈ មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន (គបម) ចំនួន ២ រូប បានសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា (ស៊ីភីភី) ដែលការណ៍នេះ អ្នកវិភាគនយោបាយមើលឃើញថា ការចេញចូលពីគណបក្ស ១ ទៅគណបក្ស ១ គឺដើម្បីសម្រេចគោលដៅរបស់ខ្លួន ឬទទួលបាននូវលាភសក្ការៈអ្វីមួយ។
តាមរយៈលិខិតធ្វើនៅថ្ងៃទី ២៣ ខែវិច្ឆិកា ប៉ុន្តែត្រូវបានផ្សព្វផ្សាយជាសាធារណៈ នៅថ្ងៃទី ២៧ វិច្ឆិកា លោក យ៉ង សាំងកុមារ ប្រធានគណៈកម្មាធិការនាយក គបម និងលោក ឡឹក សុធារ អគ្គលេខាធិការរង និងជាអ្នកនាំពាក្យ គបម បានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។
ក្នុងលិខិតបញ្ជាក់ថា ការចូលរួមជាមួយ ស៊ីភីភី ដោយឃើញនូវគោលនយោបាយលោកនាយករដ្ឋមន្ត្រីហ៊ុន សែន លើវិស័យកសិកម្ម ដែលបានប្រកាសថ្មីៗ ក្នុងនោះមានគោលនយោបាយលើកកម្ពស់ជីវភាពកសិករប្រកបដោយវិធានការជាក់ស្តែង ដូចជាគោលនយោបាយផលិតពូជសម្រាប់លក់ចែកជូនប្រជាពលរដ្ឋក្នុងតម្លៃសមរម្យ គោលនយោបាយកាត់បន្ថយថ្លៃដើមផលិត គោលនយោបាយបង្កើនទុនដល់ធនាគារអភិវឌ្ឍន៍កសិកម្ម និងជនបទ និងគោលនយោបាយដោះស្រាយទីផ្សារកសិផលជាដើម។
លោកថា៖« ខ្ញុំបាទមានទំនុកចិត្តថា ការដាក់ចេញនូវគោលនយោបាយប្រាកដនិយមថ្មីនេះ នឹងអាចនាំមកនូវផ្លែផ្កា និងប្រយោជន៍យ៉ាងពិតប្រាកដដល់ប្រជាពលរដ្ឋទាំងមូល។ គោលនយោបាយទាំងនេះ គឺដូចគ្នាទៅនឹងចំណេះដឹង និងជំនាញ ឆន្ទៈ និង បទពិសោធន៍ការងារលើវិស័យកសិកម្មរបស់ខ្ញុំកន្លងមក»។
ក្នុងន័យនេះ លោកបានសុំចូលរួមជីវភាពនយោបាយជាមួយស៊ីភីភី ដើម្បីចូលរួមអនុវត្តគោលនយោបាយទាំងនេះឱ្យជោគជ័យ និងមានផ្លែផ្កា ដើម្បីលើកស្ទួយជីវភាពកសិករ សន្តិសុខស្បៀង បរិស្ថាន និងសេដ្ឋកិច្ចជាតិ។
ក្រៅពីស្នើសុំចូលជាមួយគណបក្សប្រជាជនកម្ពុជា លោក យ៉ង សាំងកុមារ និងលោក ឡឹក សុធារ ក៏បានធ្វើលិខិតដាច់ដោយឡែក គោរពជូនលោកនាយករដ្ឋមន្ត្រី ហ៊ុន សែន សុំចូលបម្រើការជាមួយ រដ្ឋាភិបាល ក្នុងវិស័យកសិកម្ម ជាពិសេសវិស័យស្រូវអង្ករ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ប្រាប់ ភ្នំពេញ ប៉ុស្តិ៍ នៅថ្ងៃទី ២៧ វិច្ឆិកាថា គណបក្សប្រជាជនមិនដែលមានគោលការណ៍រារាំងការអនុវត្តសិទ្ធិនយោបាយរបស់ពលរដ្ឋទូទៅទេ គឺបើកទ្វារចំហជានិច្ច ដើម្បីទទួលស្វាគមន៍ចំពោះអ្នកដែលមើលឃើញកម្មវិធីនយោបាយរបស់គណបក្សល្អ ត្រឹមត្រូវ ហើយមានប្រយោជន៍សម្រាប់ជាតិ និងប្រជាជន ដែលមានឧត្តមគតិដូចគ្នា។
លោកថ្លែងថា៖ «ខ្ញុំយល់ថា តាមរយៈលិខិតនេះហាក់ដូចជាចូលដោយស្វ័យប្រវត្តិហើយ ព្រោះនីតិវិធីទទួលសមាជិកថ្មី ទោះមកពីប្រភពណាក៏ដោយមិនមានការស្មុគស្មាញនោះទេ»។
ពាក់ព័ន្ធការស្នើសុំធ្វើការងារទៅតាមមុខជំនាញ លោកបញ្ជាក់ថា គណបក្សប្រជាជនកម្ពុជា ប្រើមនុស្សទៅតាមមុខជំនាញទើបមានផលប្រយោជន៍ ហើយមិនចង្អៀតចង្អល់ទេ ពោលគឺ ប្រសិនបើគាត់មានជំនាញកសិកម្ម គាត់នឹងទៅជួយជំនាញកសិកម្ម។
លោកថ្លែងថា៖ «ក៏ប៉ុន្តែសុំបញ្ជាក់ថា អត់មានដាក់លក្ខខណ្ឌជាមួយ គណបក្សយើងទេ ស្នើសុំមកចូលហើយ អត់មានសុំតួនាទីនេះ តួនាទីនោះទេ គឺសូមឱ្យអស់លោក ដែលស្នើសុំចូលជីវភាពនយោបាយមេត្តាអធ្យាស្រ័យ ព្រោះគណបក្សប្រជាជនមិនទទួលយក ការបង្ខិតបង្ខំណាមួយ ឬលក្ខខណ្ឌ ណាមួយពីអ្នកសុំចូលនោះទេ»។
លោក សុខ ឥសាន បន្ថែមថា មូលហេតុសមាជិកបក្សផ្សេងៗបន្តសុំចូលជាមួយស៊ីភីភី ជាបន្តបន្ទាប់ ដោយសាររាជរដ្ឋាភិបាលកម្ពុជាកំពុងដឹកនាំដោយស៊ីភីភី បានគិតពីផលប្រយោជន៍ប្រជាជន និងផលប្រយោជន៍ជាតិជាធំ។
លោកថា៖ «មានតែចំណុច ២ នោះទេ ចំណុចទី១ ពាក្យចាស់បុរាណ ទឹកត្រជាក់ត្រីកុំ មានន័យថា មកប្រមូលផ្តុំគ្នាកើនឡើងៗ ទី២ គណបក្សប្រជាជនកម្ពុជាមានរូបសញ្ញាជាទេវតា។ អ៊ីចឹងទេ វាមិនមានខ្មាំងសត្រូវមកពីណាទេ គឺគ្រប់ទិសទីទាំងអស់ជាមិត្តភក្តិរបស់ទេវតាទាំងអស់»។
អ្នកវិភាគ និងជាសាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណារ៉ា សង្កេតឃើញថា ការដើរចេញពីបក្ស ១ ទៅបក្ស ១ ដោយសារបុគ្គលនោះមើលឃើញ ពីឱកាសនិងលទ្ធភាព ដែលអាចទទួលបានឋានៈ តំណែង ឬលាភសក្ការៈនៅពេលចូលរួមជីវភាពជាមួយបក្សនោះ ដើម្បីអាចសម្រេច និងបំពេញនូវឆន្ទៈរបស់ខ្លួន។
លោកថ្លែងថា៖ «ហើយគណបក្សកាន់អំណាច គឺជាគណបក្សដែលមានឥទ្ធិពល និងទាក់ទាញ ដូច្នេះគេអាចផ្តល់អត្ថប្រយោជន៍ច្រើន។ អ៊ីចឹង គាត់អាចងាកមករក អត្ថប្រយោជន៍ច្រើនជាង ដើម្បីជួយ បំពេញការងារខ្លួនឯងផង»។
លោកថា៖ «ដូចជាករណីមន្ត្រីគណបក្សឆន្ទៈខ្មែរមកចូលរួមជាមួយគណបក្សភ្លើងទៀនជាដើម បើសិនជាគាត់នៅគណបក្សឆន្ទៈខ្មែរ គាត់អត់មានតំណែងទេ។ ប៉ុន្តែបើគាត់មកចូលរួមជាមួយគណបក្សភ្លើងទៀនគាត់អាចមានឱកាស បានឈរធ្វើជាតំណាងរាស្ត្រ»៕
វីដេអូ៖