មន្ត្រីរដ្ឋបាលរាជធានីភ្នំពេញ (PPCA) និងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ការិយាល័យកម្ពុជា ចុះពិនិត្យមន្ទីរពេទ្យបង្អែកដង្កោ នាពេលកន្លងមក។ KOICA
ភ្នំពេញ៖ រដ្ឋបាលរាជធានីភ្នំពេញ (PPCA) និងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ការិយាល័យកម្ពុជា បានបង្ហាញគម្រោងសំខាន់មួយក្នុងគោលបំណងលើកកម្ពស់សេវាថែទាំសុខភាពក្នុងតំបន់។
គំនិតផ្តួចផ្តើមក្នុងតម្លៃ ១១លានដុល្លារអាមេរិកនេះ គ្រោងនឹងអភិវឌ្ឍមន្ទីរពេទ្យបង្អែកដង្កោ ទៅជាមន្ទីរពេទ្យកម្រិត CPA-2 ដំបូងគេរបស់រាជធានីភ្នំពេញ។
មន្ទីរពេទ្យកម្រិត CPA-2 សំដៅទៅលើមន្ទីរពេទ្យដែលត្រូវបានចាត់ថ្នាក់ក្រោមប្រព័ន្ធ «កញ្ចប់សកម្មភាពបំពេញបន្ថែម (CPA)» ដែលត្រូវបានប្រើនៅក្នុងប្រទេសមួយចំនួន ដូចជា ប្រទេសកម្ពុជា ដើម្បីចាត់ថ្នាក់កន្លែងថែទាំសុខភាពដោយផ្អែកលើលំដាប់លេខរៀង និងភាពស្មុគស្មាញនៃសេវាកម្ម។
យោងតាម KOICA បានឱ្យដឹងថា៖ «ជាមួយនឹងចំនួនប្រជាជន១៥៩៧៧២ នាក់ក្នុងខណ្ឌ កំណើនឧស្សាហកម្មយ៉ាងឆាប់រហ័ស និងនៅជិតអាកាសយានដ្ឋានអន្តរជាតិក្រុងតាខ្មៅថ្មីបានជំរុញឱ្យមានការកើនឡើងចំនួនប្រជាជន ដែលបង្ហាញពីតម្រូវការកែលម្អសេវាសាធារណៈជាបន្ទាន់ ជាពិសេសផ្នែកថែទាំសុខភាព»។
នៅថ្ងៃទី១១ ខែមិថុនា ឆ្នាំ២០២៤ អភិបាលរាជធានីភ្នំពេញ លោក ឃួង ស្រេង និងលោកស្រី MoonJung CHOI នាយកតំណាងប្រចាំប្រទេសនៃការិយាល័យ KOICA កម្ពុជា បានចុះហត្ថលេខាលើកំណត់ហេតុនៃកិច្ចពិភាក្សាស្តីពី «គម្រោងលើកកម្ពស់សេវាសុខាភិបាលសាធារណៈនៅមន្ទីរពេទ្យបង្អែកដង្កោរាជធានីភ្នំពេញ»។
យោងតាម KOICA បានបង្ហាញថា៖ «ឯកសារកំណត់ហេតុនៃកិច្ចពិភាក្សានេះបានបញ្ជាក់ពីគោលបំណងរបស់គម្រោង ព័ត៌មានលម្អិតសំខាន់ៗ និងការទទួលខុសត្រូវរបស់ភាគីទាំងពីរ»។
គម្រោងនេះមានថវិកាសរុបចំនួន ១១លានដុល្លារ ដែលត្រូវបានកំណត់សម្រាប់សាងសងអគារមន្ទីរពេទ្យថ្មីមួយ និងឧបករណ៍វេជ្ជសាស្ត្រទំនើបៗទាន់សម័យ។
ជំនួយដ៏សំខាន់នេះ នឹងជួយអភិវឌ្ឍមន្ទីរពេទ្យបង្អែកដង្កោឱ្យឈានមុខគេក្នុងវិស័យសុខាភិបាល លើកកម្ពស់គុណភាពសេវា និងពង្រឹងផ្នែកសង្គ្រោះបន្ទាន់លើករណីរបួសបាក់បែកឆ្អឹង ក៏ដូចជាកម្មវិធីបណ្តុះបណ្តាលពង្រឹងសមត្ថភាពបុគ្គលិកមន្ទីពេទ្យ ដើម្បីធានាថា ពួកគេអាចផ្តល់សេវាសុខាភិបាលល្អបំផុតដល់សហគមន៍។
KOICA បានបន្ដថា៖ «គម្រោងមន្ទីរពេទ្យបង្អែកដង្កោ នឹងក្លាយជាគំរូសម្រាប់គ្រឹះស្ថានសុខាភិបាលផ្សេងទៀតក្នុងរាជធានីភ្នំពេញទាក់ទងនឹងគុណភាពសេវា ប្រព័ន្ធបញ្ជូន និងផែនការគ្រប់គ្រងដែលស្របតាមយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាល និងគោលនយោបាយរបស់ក្រសួងសុខាភិបាល»។
គម្រោងនេះនឹងផ្តល់អត្ថប្រយោជន៍មិនត្រឹមតែប្រជាជនក្នុងខណ្ឌដង្កោប៉ុណ្ណោះទេ ប៉ុន្តែក៏មានអ្នកជំងឺមកពីទូទាំងប្រទេសដែលស្វែងរកការថែទាំនៅមន្ទីរពេទ្យជាតិផងដែរ។
លោកវេជ្ជបណ្ឌិត ផេង ប៉ូលីន ប្រធានមន្ទីរពេទ្យបង្អែកខណ្ឌដង្កោ បានឱ្យដឹងថា៖ «បច្ចុប្បន្នមន្ទីរពេទ្យបង្អែកខណ្ឌដង្កោ ទទួលពិនិត្យព្យាបាលអ្នកជំងឺ ជាមធ្យម ចំនួន ១៥០នាក់ ក្នុងមួយថ្ងៃ ហើយមានគ្រូពេទ្យ ឱសថ និងបរិក្ខាពេទ្យគ្រប់គ្រាន់ក្នុងការផ្ដល់សេវា»។
លោកបានបន្ដថា ប៉ុន្ដែចំពោះអគារនាពេលសព្វថ្ងៃនេះ នៅពុំទាន់សមល្មមក្នុងការទទួលអ្នកជំងឺកំពុងតែមានកំណើនច្រើននោះទេ។
លោកបានប្រាប់ភ្នំពេញប៉ុស្ដិ៍ថា៖ «គម្រោងធ្វើឱ្យប្រសើរឡើងនូវមន្ទីរពេទ្យបង្អែកនេះពិតជាមានសារៈសំខាន់ខ្លាំងណាស់ ពេល KOICA ជួយអគារ និងបរិក្ខាមន្ទីរពេទ្យ។ ប្រជាជនដែលនឹងមកទទួលសេវានៅមន្ទីរពេទ្យដង្កោ ក្រៅពីរស់នៅខណ្ឌដង្កោ មានប្រជាជនរស់នៅខណ្ឌកំបូល សង្កាត់ខ្លះពីខណ្ឌមានជ័យ ឃុំខ្លះពីស្រុកកណ្តាលស្ទឹង សរុបប្រហែល ជាង៣០ម៉ឺននាក់»។
KOICA គឺជាទីភ្នាក់ងារផ្តល់ជំនួយទ្វេភាគីរបស់រដ្ឋាភិបាលនៃសាធារណរដ្ឋកូរ៉េ។ ចាប់តាំងពីការបើកការិយាល័យនៅទីក្រុងភ្នំពេញក្នុងឆ្នាំ២០០៣ ការិយាល័យ KOICA កម្ពុជាបានធ្វើកិច្ចសហប្រតិបត្តិការអភិវឌ្ឍន៍ផ្សេងៗក្នុងវិស័យអប់រំ វិស័យសុខាភិបាល និងវិស័យអភិវឌ្ឍន៍ជនបទ។
សុខភាពសាធារណៈ គឺជាវិស័យដ៏ចាំបាច់ និងសំខាន់បំផុតសម្រាប់លើកកម្ពស់គុណភាពជីវិតរបស់ប្រជាជនកម្ពុជា។
KOICA បានផ្តល់ជំនួយឧបត្ថម្ភថវិកាចំនួន ៨៩ លានដុល្លារក្នុងវិស័យសុខាភិបាលដែលស្មើនឹង ២៣ ភាគរយ នៃជំនួយសរុបរបស់ខ្លួន។ នេះរួមបញ្ចូលទាំងការបង្កើតមន្ទីរពេទ្យភ្នែក និង ត្រចៀក ច្រមុះ បំពង់ក នៅមន្ទីរពេទ្យព្រះអង្គឌួងក្នុងរាជធានីភ្នំពេញ និងការពង្រឹងហេដ្ឋារចនាសម្ព័ន្ធ និងសមត្ថភាពគ្រូពេទ្យឯកទេសនៅមន្ទីរពេទ្យកុមារជាតិ តាមរយៈគម្រោងចំនួនបីរួមទាំងគម្រោងដែលកំពុងដំណើរការដែលមានតម្លៃ ១៦ លានដុល្លារ។
កិច្ចខិតខំប្រឹងប្រែងទាំងនេះបានអភិវឌ្ឍសមត្ថភាពព្យាបាលរោគកុមារក្នុងផ្នែក ភ្នែក ត្រចៀក ច្រមុះ បំពង់ក បន្ថែមពីលើវិសាលភាពនៃការព្យាបាលទូទៅ ឬការវះកាត់ដែលមានស្រាប់។
KOICA ក៏បានអនុវត្តគម្រោងលើកកម្ពស់សេវាសុខភាពមាតា និងទារកនៅភាគឦសាន ប្រទេសគឺខេត្តរតនគិរី និងមណ្ឌលគិរី ដែលមានសេវាសុខាភិបាលនៅមានកម្រិត ហើយជាលទ្ធផលនៃគម្រោងនេះ អគារសុខភាពមាតា និងទារកចំនួនប្រាំត្រូវបានបង្កើតឡើង ដែលមាននៅមន្ទីរពេទ្យខេត្តរតនគិរី និងមន្ទីរពេទ្យបង្អែកស្រុកកោះញ៉ែក ខេត្តមណ្ឌលគិរី៕
