ស្ពានឆ្លងកាត់ទន្លេមេគង្គក្នុងខេត្តក្រចេះ ដែលសាងសង់ក្នុងទឹកប្រាក់១១៤លានដុល្លារ ជាហិរញ្ញប្បទានពីប្រទេសចិន សម្រេចបានជាង ៤៤ភាគរយ និងគ្រោងបញ្ចប់នៅខែកញ្ញា ២០២៦។ STPM
មន្ត្រីជាន់ខ្ពស់នៅក្រសួងការបរទេស និងសហប្រតិបត្តិការអន្តរជាតិ បង្ហាញពីទិដ្ឋភាពវិជ្ជមាននៃបំណុលកម្ពុជាដែលស្ថិតកម្រិតមួយអាចគ្រប់គ្រងបាន ហើយថា វាជាការយល់ខុសដែលថាចិនមានបំណងបង្កើតអន្ទាក់បំណុល។
ថ្លែងក្នុងវេទិកាទំនាក់ទំនងអន្តជាតិលើកទី៣ ស្ដីពី សណ្ដាប់ធ្នាប់ពិភពលោកប្រកបដោយការផ្លាស់ប្ដូរនិងតួនាទីរបស់មហាអំណាចសម្រាប់សន្តិភាព ស្ថិរភាព និងវិបុលភាពសាកល រៀបចំដោយរាជបណ្ឌិត្យសភាកម្ពុជា នៅថ្ងៃទី៤ ខែកញ្ញានេះ លោក អ៊ុន ឃាង រដ្ឋលេខាធិការក្រសួងការបរទេស បានលើកឡើងពីទិដ្ឋភាពវិជ្ជមាននៃបំណុលដែលកម្ពុជា ដែលលោកថាស្ថិតក្នុងកម្រិតមួយគ្រប់គ្រងបាន។
លោកថា ចំពោះករណីបំណុលនៅប្រទេស ស្រីលង្កា វាមិនមែនចាប់ផ្ដើមពីចិននោះទេ គឺវាចាប់ផ្ដើមពីកម្ចីផ្សេងៗ ដូចជាកម្ចីពីធនាគារពិភពលោក និងដៃគូរអភិវឌ្ឍន៍ផ្សេងទៀត ទាំងកម្រិតទ្វេភាគី និងពហុភាគី ដូចដែលរដ្ឋមន្ត្រីការបរទេសសិង្ហបុរី Vivian Balakrishnan បានលើកឡើងថា «គោលនយោបាយការបរទេសចាប់ផ្ដើមពីក្នុងផ្ទះ»។
លោកថ្លែងដូច្នេះថា៖ «ប្រទេសស្រីលង្កា ព្យាយាមសងបំណុលដែលខ្លួនជំពាក់ទៅធនាគារពិភពលោក និងម្ចាស់បំណុលផ្សេងទៀត។ នៅពេលដែលបំណុលនោះឈានដល់កម្រិតកំពូល រដ្ឋាភិបាលស្រីលង្កា មិនអាចសងបាន ហើយក៏បានទៅខ្ចីបំណុលពីចិនដើម្បីយកមកសងបំណុលចាស់។ ដូច្នេះ គោលនយោបាយការបរទេសចាប់ផ្ដើមពីក្នុងផ្ទះ គឺខ្ញុំចង់សំដៅទៅ លើថាតើ ប្រទេសមួយប្រើប្រាស់បំណុលដើម្បីគោលបំណងអ្វី?»។
យោងតាមក្រសួងហិរញ្ញវត្ថុប្រទេស ស្រីលង្កា ប្រទេសនេះមានបំណុលក្រៅប្រទេសសរុបជាង ៣៧ពាន់លានដុលល្លារ ប៉ុន្តែ បើគិតទាំងបំណុលក្នុងស្រុកនិងបំណុលគ្រប់ប្រភេទ ប្រទេសនេះមានបំណុលជាង ១០០ពាន់លានដុល្លារ គិតត្រឹមត្រីមាសទី១ ឆ្នាំ២០២៤នេះ។
សម្រាប់កម្ពុជា គិតត្រឹមត្រីមាសទី១ ឆ្នាំ២០២៤នេះ បំណុលសរុបមានជាង ១១ពាន់លានដុល្លារ ដែលជាង ៩៩ភាគរយជាបំណុលក្រៅប្រទេស។ ក្នុងចំណោមបំណុលក្រៅប្រទេស ៣៦ភាគរយខ្ចីពីចិន ២១ភាគរយពីធនាគារអភិវឌ្ឍន៍អាស៊ី ១១ភាគរយពីជប៉ុន ១២ភាគរយពីធនាគារពិភពលោក ៥ភាគរយពីកូរ៉េខាងត្បូង ៥ភាគរយពីបារាំង ចំណែកបំណុលនៅសល់ជាបំណុលចាស់ និងបំណុលដៃគូពហុភាគីផ្សេងទៀត។
លោក អ៊ុន ឃាង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។ ក្រសួងការបរទេស
ក្រសួងសេដ្ឋកិច្ចចាត់ទុកបំណុលនេះថា ស្ថិតក្នុងកម្រិតនិរន្តរភាព និងមានហានិភ័យទាប។ នេះបើតាមរបាយការណ៍ក្រសួងសេដ្ឋកិច្ច និងហិរញ្ញវត្ថុដែលចេញផ្សាយកាលពីខែមិថុនា។
លោក អ៊ុន ឃាង ថ្លែងថា មានការលើកឡើងថា កម្ពុជាត្រូវតែមានការប្រុងប្រយ័ត្នក្នុងការប្រើប្រាស់បំណុលរបស់ខ្លួន។
លោកថា៖ «ខ្ញុំគិតថា រដ្ឋាភិបាលកម្ពុជាមានការប្រុងប្រយ័ត្នយ៉ាងខ្លាំងក្នុងការប្រើប្រាស់កម្ចីដែលខ្លួនទទួលបានតាមរយៈស្ថាប័ននានាទាំងទ្វេភាគី និងពហុភាគី»។
លោកថា បំណុល ឬកម្ចីទាំងនោះមានសក្ដានុពលដើម្បីជំរុញសេដ្ឋកិច្ច ប្រសិនបើវាត្រូវបានប្រើប្រាស់ត្រឹមត្រូវតាមផែនការ។
លោកថ្លែងដូច្នេះថា៖ «ខ្ញុំគិតថា មានស្ថាប័នពីរដែលគេជឿជាក់បំផុត នោះគឺ មូលនិធិរូបិយវត្ថុអន្តរជាតិ (IMF) និងធនាគារពិភពលោក World Bank។ ស្ថាប័នទាំងពីរនេះបានរាយការណ៍អំពីកម្រិតបំណុលរបស់កម្ពុជា ហើយបានបញ្ជាក់យ៉ាងច្បាស់ថា បំណុលនេះមាននិរន្តរភាព ហើយវាមិនមែនស្ថិតក្នុងស្ថានភាពមួយដែលមិនអាចគ្រប់គ្រងបាននោះទេ»។
លោក អ៊ុន ឃាង ពន្យល់ថា រាជរដ្ឋាភិបាលកម្ពុជាបានប្រើប្រាស់កម្ចីដើម្បីកសាងហេដ្ឋារចនាសម្ព័ន្ធ ដែលនេះគឺជារឿងវិជ្ជមាន។ យ៉ាងណាក៏ដោយ លោកថា ការប្រើប្រាស់កម្ចីដើម្បីកសាងតែហេដ្ឋារចនាសម្ព័ន្ធតែមួយមុខមិនទាន់គ្រប់គ្រាន់នោះទេ គឺត្រូវមានផែនការយុទ្ធសាស្ត្រគ្រប់ជ្រុងជ្រោយក្នុងការប្រើប្រាស់ហេដ្ឋារចនាសម្ព័ន្ធទាំងនោះដើម្បីភ្ជាប់ជាមួយនឹងការតភ្ជាប់ច្រវ៉ាក់តម្លៃសាកល។
លោកក៏ថ្លែងអំពីការលើកឡើងនានាដែលថា ចិនបានបង្កើតបំណុលនៅក្នុងប្រទេសផ្សេង។
លោកនិយាយថា៖ «ខ្ញុំគិតថា វាជាការយល់ខុសមួយដែលថា ចិនមានបំណងបង្កើនអន្ទាក់បំណុលនៅក្នុងប្រទេសណាមួយ។ នេះជាការគិតងាយពេក ពីព្រោះបញ្ហាបំណុលនេះគឺជាបញ្ហាសន្ទស្សន៍ពហុសមាសភាព ហើយជាប់ពាក់ព័ន្ធយ៉ាងច្រើនទៅនឹងការចាត់ចែងសេដ្ឋកិច្ចផ្ទៃក្នុង និងការវិនិយោគនៅក្នុងប្រទេសទទួលកម្ចី»៕
