«ឆ្នាំទេសចរណ៍កម្ពុជា-ចិន» គំនិតផ្តួចផ្តើមរយៈពេលមួយឆ្នាំនេះជាលទ្ធផលនៃដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង មកកាន់កម្ពុជា កាលពីពាក់កណ្តាលខែមេសា ឆ្នាំ២០២៥។ រូបថត ហុង រស្មី
ភ្នំពេញ៖ ក្នុងគោលបំណងពង្រឹងទំនាក់ទំនងវប្បធម៌ និងទេសចរណ៍រវាងកម្ពុជា និងចិន ក្រសួងទេសចរណ៍បានដាក់ចេញនូវផែនការមហិច្ឆតាមួយសម្រាប់ «ឆ្នាំទេសចរណ៍កម្ពុជា-ចិន»។
គំនិតផ្តួចផ្តើមរយៈពេលមួយឆ្នាំនេះជាលទ្ធផលនៃដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង មកកាន់កម្ពុជា កាលពីពាក់កណ្តាលខែមេសា ឆ្នាំ២០២៥ មានបំណងទាក់ទាញភ្ញៀវទេសចរចិនឱ្យកាន់តែច្រើន និងធ្វើឱ្យទំនាក់ទំនងទ្វេភាគីរវាងប្រទេសទាំងពីរកាន់តែស៊ីជម្រៅ។
លោក ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានបញ្ជាក់អំពីផែនការរបស់ក្រសួងទេសចរណ៍ បានបញ្ជាក់ពីការចាប់ផ្តើមយុទ្ធនាការដ៏សំខាន់នេះ។
លោកបានចែករំលែកព័ត៌មានលម្អិតអំពីការរៀបចំព្រឹត្តិការណ៍សំខាន់ៗដែលនឹងត្រូវរៀបចំជាផ្នែកនៃ «ឆ្នាំទេសចរណ៍កម្ពុជា-ចិន» ក្នុងឆ្នាំ២០២៥ នេះ។
ព្រឹត្តិការណ៍នេះ រួមមាន ពិធីបុណ្យតន្ត្រីអន្តរជាតិ (Music festival) មហោស្រព្យសិល្បៈតាមដងផ្លូវអន្តរជាតិ មហោស្រព្យក្បាច់គុនចម្រុះ ការផ្សព្វផ្សាយការទូតម្ហូបអាហារ សន្និសីទទេសចរណ៍អន្តរជាតិ កម្ពុជា-ចិន វេទិកាផ្គូរផ្គងធុរកិច្ចទេសចរណ៍ ផ្លាស់ប្ដូរទូតសុឆន្ទៈទេសចរណ៍ ផ្សព្វផ្សាយទេសចរណ៍ភាពយន្តកម្ពុជា-ចិន ការទទួលប្រតិភូសារព័ត៌មានចិនមកកម្ពុជា, ការបើករថយន្តទេសចរណ៍ឆ្លងកាត់ព្រំដែនកម្ពុជា-ចិន Cambodia Festival នៅចិន និងការបង្ហាញទេសចណ៍ក្នុងរដូវកាលបៃតងកម្ពុជាទៅកាន់ប្រទេសចិន។
លោក ជំនោរ បានថ្លែងថា៖ «ពិធីបុណ្យតន្ត្រីអន្តរជាតិ (Music festival) ត្រូវបានរៀបចំនៅខេត្ដសៀមរាប ឬរាជធានីភ្នំពេញ ដើម្បីផ្លាស់ប្ដូរវប្បធម៌រវាងប្រទេសទាំងពីរ រួមជាមួយការរៀបចំមហោស្រពសិល្បៈតាមដងផ្លូវ (Street Art) ដោយមានការសម្ដែងសិល្បៈនានា ដូចជា ល្ខោនបាសាក់ ល្ខោនហ៊ីចិន»។
សម្រាប់រយៈពេល ៤ខែដើមឆ្នាំ២០២៥នេះ ទេសចរចិនមានចំនួនជាង ៣៨ម៉ឺនលាន កើនឡើងជិត ៤៨ភាគរយ ពីរយៈពេលដូចគ្នានៃឆ្នាំ២០២៤។ រូបថត ហុង រស្មី
លោកបានលើកឡើងថា កាលបើកសម្ពោធ «ឆ្នាំទេសចរណ៍ កម្ពុជា-ចិន ២០២៥» នៅសាលចតុមុខ កាលពីថ្ងៃទី២៣ ខែឧសភាថា ការសម្ដែងសិល្បៈរួមគ្នា និងស្រដៀងគ្នានោះ គឺការសម្ដែងឈុតពិសេសរវាងស្ដេចស្វា ហនុមាន និងស្ដេចស្វា ស៊ុន អ៊ូខុង បង្ហាញពីភ្ជាប់ទំនាក់ទំនងវប្បធម៌ និងអរិយធម៌នៃប្រទេសទាំងពីរ។
លោក ជំនោរ បានបន្ដថា៖ «យើងចង់ដឹងចង់ស្គាល់ស្ដេចស្វាក្នុងភាពយន្ដចិន ស៊ុន អ៊ូខុង ហើយខាងចិន ក៏ចង់ដឹងអំពីស្ដេចស្វា ហនុមានយើងផងដែរ»។
ក្រៅពីភាពស្រដៀងនៃសិល្បៈសម្ដែង កម្ពុជា-ចិន នៅមានសិល្បៈក្បាច់គុន ដូចជាល្បុក្កតោ យុទ្ធគុនខម ប្រដាក់ខ្មែរ និងកុងហ្វ៊ូ សាវលីង ក៏ដូចជា ថៃជី ជាដើម។
ប្រទេសចិនមានពេលវេលាឈប់សម្រាកធំៗ២ដង ក្នុងរយៈពេល១ឆ្នាំ នៅចន្លោះបុណ្យចូលឆ្នាំចិន និងចន្លោះខែតុលា។
លោក ហួត ហាក់ រដ្ឋមន្ត្រីក្រសួងទេសចរណ៍ និងអភិបាលខេត្តជាំងស៊ូ ព្រមជាមួយលោក វ៉ាង វ៉ិនពីន បានជ្រើសរើសយកត្រីមាសទី៣ ដើម្បីរៀបចំឲ្យបានមុន ១ខែទៅ២ខែ សម្រាប់ផ្ដល់ឱកាសឲ្យប្រជាជនចិនបានស្គាល់ពីកម្ពុជា និងជ្រើសរើសយកកម្ពុជា ជាគោលដៅទេសចរណ៍ នាពេលឈប់សម្រាកនៅខែតុលា។
ជាមួយគ្នានេះ មានការរៀបចំព្រឹត្តិការណ៍ការទូតទេសចរណ៍ម្ហូបអាហារ រវាងប្រទេសទាំងពីរ ពោលគឺផ្លាស់ប្ដូររសជាតិ ម្ហូបអាហារទៅវិញទៅមក ដោយចិនមានម្ហូបប្រចាំតំបន់ចំនួន៨ ចំណែក កម្ពុជាមានម្ហូបប្រចាំតំបន់ដូចជា នំបញ្ចុក អាម៉ុក បង្អែមខ្មែរ នំខ្មែរជាច្រើនប្រភេទ។
ដើម្បីទាក់ទាញភ្ញៀវទេសចរចិនបន្ថែមទៀត ក្រសួងបានផ្ដោតលើការផ្សព្វផ្សាយថ្ងៃឈប់សម្រាកសំខាន់ៗរបស់ប្រទេសចិន ដូចជាបុណ្យចូលឆ្នាំចិន និងសប្តាហ៍មាសខែតុលា។ រូបថត ហុង រស្មី
ក្នុងន័យនេះ ការផ្លាស់ប្ដូរម្ហូបអាហារទៅវិញទៅមក ក៏ជាការលើកកម្ពស់កិត្តិនាមរបស់ប្រទេសកម្ពុជាទៅលើ ទីផ្សារអន្តរជាតិផងដែរ។
ក្រសួងទេសចរណ៍ នៅថ្ងៃទី២៧ ខែឧសភា ឆ្នាំ២០២៥នេះ បានបង្ហាញសេចក្តីប្រកាសព័ត៌មាន ស្តីពីលទ្ធផលនៃការរៀបចំពិធីបើក «ឆ្នាំទេសចរណ៍ កម្ពុជា-ចិន ២០២៥» អមដោយការសម្តែងសិល្បៈពិសេស «សម្រស់កម្ពុជា-ជាំងស៊ូ» នៅរាជធានីភ្នំពេញ ថ្ងៃទី២៣-២៥ ខែឧសភា ឆ្នាំ២០២៥។
សេចក្តីប្រកាសព័ត៌មានរបស់ក្រសួងទេសចរណ៍ នាថ្ងៃទី១៩ ខែឧសភា បានអះអាងថា ព្រឹត្តិការណ៍ ជាលទ្ធផលនៃដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង មកកាន់កម្ពុជា កាលពីពាក់កណ្តាលខែមេសា ឆ្នាំ២០២៥ ដោយប្រមុខរដ្ឋាភិបាលប្រទេសទាំងពីរកំណត់យកឆ្នាំ២០២៥ ជាឆ្នាំទេសចរណ៍កម្ពុជា-ចិន។
កម្ពុជាទទួលភ្ញៀវទេសចរ ចិនមានចំនួនជាង ៣៨ម៉ឺនលាន រយៈពេល ៤ខែដើមឆ្នាំ២០២៥នេះ កើនឡើងជិត ៤៨ភាគរយ ពីរយៈពេលដូចគ្នានៃឆ្នាំ២០២៤។
ដោយឡែក ក្នុងងឆ្នាំ២០២៤ កម្ពុជាទទួលបានភ្ញៀវទេសចរសរុប ៦,៦១០,៥៩២ នាក់ ក្នុងនោះមាន ភ្ញៀវចិន ៨៤៨,៩៥២ នាក់ កើន ៥៥ភាគរយ បើធៀបនឹងឆ្នាំ២០២៣៕
