លោក ហ៊ុន សែន កាលពេលជានាយករដ្ឋមន្ត្រីកម្ពុជា បានជួបពិភាក្សាជាមួយ លោកមីន អោងឡាំង ប្រធានក្រុមប្រឹក្សារដ្ឋាបាលរដ្ឋមីយ៉ាន់ម៉ា នៅទីក្រុង ណៃពិដោរ ប្រទេសមីយ៉ាន់ម៉ា កាលពីខែមករា ឆ្នាំ២០២២។ រូបថត SPM
អ្នកវិភាគយល់ថា ទំនាក់ទំនងជាលក្ខណៈបុគ្គលរវាងមេដឹកនាំមីយ៉ាន់ម៉ា មីន អោងឡាំង និងប្រធានព្រឹទ្ធសភា លោក ហ៊ុន សែន គឺជាឱកាសក្នុងការធ្វើឲ្យស្ថានភាពជម្លោះនៅមីយ៉ាន់ម៉ាមានភាពប្រសើរឡើង។
លោក មីន អោងឡាំង ប្រធានក្រុមប្រឹក្សារដ្ឋាបាលរដ្ឋមីយ៉ាន់ម៉ា និង លោក ហ៊ុន សែន បានសរសេរលិខិតឆ្លើយឆ្លង និងជូនពរគ្នា ក៏ដូចជាបង្ហាញពីទំនាក់ទំនងល្អរវាងប្រទេសទាំងពីរ ក្នុងឱកាសខួបកំណើតឈានចូល ៧៣ឆ្នាំរបស់លោក ហ៊ុន សែន។
លិខិតរបស់លោក មីន អោងឡាំង សរសេរថា៖ «ក្នុងរយៈពេលប្រាំមួយទសវត្សរ៍នៃមិត្តភាព និងកិច្ចសហប្រតិបត្តិការពិសេសរបស់យើង មីយ៉ាន់ម៉ា និង កម្ពុជា តែងបានពូនជ្រំចំណងមិត្តភាពជិតស្និទ្ធ ការយោគយល់គ្នា និងការជឿទុកចិត្តគ្នា ដែលបានចាក់ឫស យ៉ាងជ្រៅនៅក្នុងវប្បធម៌ សាសនា និងប្រពៃណីរួមគ្នារបស់យើង។ ខ្ញុំពិតជាទន្ទឹងរង់ចាំពង្រឹងបន្ថែមទៀតនូវមិត្តភាព និងកិច្ចសហប្រតិបត្តិការរបស់យើង ដើម្បីផលប្រយោជន៍ទៅវិញទៅមករបស់ប្រជាជនយើងទាំងពីរ»។
ឆ្លើយតបទៅនឹងលិខិតរបស់លោក មីន អោងឡាំង លោក ហ៊ុន សែនថ្លែងថា ចំណងមិត្តភាពនិង កិច្ចសហប្រតិបត្តិការរវាងកម្ពុជា និងមីយ៉ាន់ម៉ា ដែលផ្អែកលើគ្រឹះវប្បធម៌ សាសនា និងប្រពៃណីរួមពិតជាកាន់តែរឹងមាំ។
លោកថ្លែងថា៖ «ខ្ញុំចូលរួមតាំងចិត្តជាមួយឯកឧត្តម ក្នុងការពង្រឹងបន្ថែមទៀតនូវមិត្តភាព និងកិច្ចសហប្រតិបត្តិការរវាងប្រទេសយើងទាំងពីរដើម្បីផលប្រយោជន៍ទៅវិញទៅមក របស់ប្រជាជនយើងទាំងពីរ»។
លោក ហ៊ុន សែន គឺជាមេដឹកនាំទី១ដែលបានជួបលោក មីន អោងឡាំង កាលពីឆ្នាំ២០២២ បន្ទាប់ពីមានរបបយោធាមីយ៉ាន់ម៉ាទម្លាក់លោកស្រី អង់សាន ស៊ូជី នៅខែកុម្ភៈ ឆ្នាំ២០២១។ មេដឹកនាំទាំងពីរក៏ធ្លាប់បានជួបពិភាក្សាគ្នាតាមរយៈអនឡាញផងដែរ។ លោក ហ៊ុន សែន ក៏ធ្លាប់បានលើកឡើងពីការដោះស្រាយជម្លោះនៅមីយ៉ាន់ម៉ា តាមរយៈបទពិសោធន៍នយោបាយឈ្នះ-ឈ្នះ របស់កម្ពុជា។
កាលពីសប្ដាហ៍មុន ប្រតិភូមីយ៉ាន់ម៉ា ដឹកនាំដោយលោក U Ko Ko Hlaing ដែលជាបេសកជនពិសេសរបស់លោក មីន អោងឡាំង បានបំពេញទស្សនកិច្ចមកកាន់ប្រទេសកម្ពុជា ដោយបានជួបជាមួយលោក ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត។
ក្នុងអំឡុងទសន្សកិច្ចនេះ ប្រតិភូមីយ៉ាន់ម៉ា បានថ្លែងប្រាប់មេដឹកនាំកម្ពុជាអំពីស្ថានភាពនៅមីយ៉ាន់ម៉ា និងការត្រៀមរៀបចំបោះឆ្នោត«ដោយសេរី និងយុត្តិធម៌» នៅមីយ៉ាន់ម៉ានាពេលខាងមុខ។
យ៉ាងណាក៏ដោយ ស្ថានភាពនៅមីយ៉ាន់ម៉ា មិនមានភាពប្រសើរឡើងទេ ដោយអំពើហិង្សារវាងរដ្ឋបាលមីយ៉ាន់ម៉ា និងក្រុមតស៊ូបន្តកើតមានជាញឹកញាប់។
លោក គិន ភា ប្រធានវិទ្យាស្ថានទំនាក់ទនងអន្តរជាតិនៃរាជបណ្ឌិត្យសភាកម្ពុជា បានថ្លែងថា ការឆ្លើយឆ្លងលិខិតរវាងលោក ហ៊ុន សែន និង លោក មីន អោងឡាំង បង្ហាញពីទំនាក់ទំនងពិសេសលើសពីទំនាក់ទំនងរវាងប្រទេសនិងប្រទេស ប៉ុន្តែរវាងកម្រិតបុគ្គលជាថ្នាក់ដឹកនាំ។
លោកថ្លែងថា ផ្អែកលើទំនាក់ទំនងល្អនេះ កម្ពុជាអាចយកឱកាសនេះជួយអន្តរាគមន៍តាមរយៈនយោបាយឈ្នះៗឲ្យស្ថានភាពនៅមីយ៉ាន់ម៉ាវិលទៅរកប្រក្រតីភាពវិញដូចកាលពីមុនរដ្ឋប្រហារឆ្នាំ២០២១ និងឈានទៅរកការបោះឆ្នោតដែលមានការចូលរួមពីគ្រប់ភាគី។
លោកនិយាយថា៖ «ដំណោះស្រាយនៅមីយ៉ាន់ម៉ា គឺជាដំណោះស្រាយមួយដែលប្រជាជនមីយ៉ាន់ម៉ាទន្ទឹងចង់បាន ដើម្បីវិលទៅរកដំណើរការប្រជាធិបតេយ្យជាប្រក្រតីវិញ សិទ្ធិមនុស្ស នីតិរដ្ឋ និងការផ្ដល់ឱកាសឲ្យប្រជាពលរដ្ឋជាអ្នកកំណត់ជោគវាសនារបស់ប្រទេស»។
លោកបន្តថា៖ «កម្ពុជាអាចប្រើទំនាក់ទំនងពិសេសជាលក្ខណៈបុគ្គលរបស់ថ្នាក់ដឹកនាំ ដើម្បីឈានទៅរកដំណោះស្រាយមួយដែលអាចបញ្ចប់វិបត្តិនៅមីយ៉ាន់ម៉ាបាន។ បើអាចធ្វើបាន ខ្ញុំគិតថា កម្ពុជាកំពុងដើរតួនាទីយ៉ាងសំខាន់ក្នុងកិច្ចការតំបន់ និងអន្តរជាតិ ហើយក៏បានរួមចំណែកជាវិជ្ជមានសម្រាប់សន្តិភាព ស្ថិរភាព និងវិបុលភាពតំបន់ផងដែរ»៕
