កីឡាករវាយកូនហ្គោលចំនួន ៥៦ នាក់បានចូលរួមព្រឹត្តិការណ៍វាយកូនហ្គោលសប្បុរសធម៌ប្រចាំឆ្នាំលើកទី ៧ (7th Lighthouse Club Annual Charity Golf Day) នៅក្លិបវាយកូនហ្គោល Royal Phnom Penh Golf Club កាលពីថ្ងៃទី ២២ ខែមករា ដែលជាព្រឹត្តិការណ៍ដ៏សំខាន់មួយសម្រាប់គាំទ្រដល់គម្រោង CSR នៃវិស័យសំណង់នៅកម្ពុជា។ ចំណែកអ្នកឧបត្ថម្ភសាជីវកម្មចំនួន ៤ គឺក្រុមហ៊ុន COVA Cambodia, Evermore International, Hongkong Land និងក្រុមហ៊ុន Seara Sports Systems Cambodia ។
អង្គការ Lighthouse Club តែងតែជួយផ្លាស់ប្តូរជីវិតបន្ថែម តាមរយៈផ្តល់ការអប់រំសម្រាប់បណ្តុះបណ្តាលយុវជនកម្ពុជា ដោយបានជួយមនុស្សជាច្រើនឱ្យបន្តទទួលបានជំនាញក្នុងអាជីពការងារផ្នែកសំណង់ ហើយក៏ផ្តល់ការគាំទ្រដល់កម្មករសំណង់ ដែលរងរបួសនៅកន្លែងធ្វើការផងដែរ។
«ឧបត្ថម្ភអង្គការ Lighthouse អនុញ្ញាតឱ្យក្រុមហ៊ុន COVA Cambodia ផ្តល់ជំនួយ និងគាំទ្រដល់ឧស្សាហកម្មដែលយើងធ្វើប្រតិបត្តិការ។ តាមរយៈការផ្តល់ការអប់រំ យើងអាចធានាបានថា កម្មករសំណង់ជំនាន់ក្រោយគឺត្រូវបានបណ្តុះបណ្តាល ប្រកបដោយវិជ្ជាជីវៈ និងមានលក្ខណសម្បត្តិគ្រប់គ្រាន់ដើម្បីសម្រេចការងារឱ្យដល់កម្រិតល្អបំផុត»។
«ការបណ្តុះបណ្តាល និងការអភិវឌ្ឍសិស្សរបស់អង្គការ Lighthouse Club នឹងផ្តល់អត្ថប្រយោជន៍ជាច្រើនដល់ឧស្សាហកម្មសំណង់រយៈពេលវែងរបស់កម្ពុជា។ តាមរយៈការបណ្តុះបណ្តាលកម្លាំងការងារក្នុងស្រុកឆ្ពោះទៅរកប្រសិទ្ធភាព គុណភាព និងស្ថិរភាព ដែលអនុញ្ញាតឱ្យប្រជាជនកម្ពុជារីកចម្រើននៅក្នុងឧស្សាហកម្មនេះ ដែលជានិច្ចកាលតែងតែគ្រប់គ្រងដោយសាជីវកម្មអន្តរជាតិ»។
លោក Kerr Thomson ប្រធានដឹកនាំក្រុមហ៊ុន COVA Cambodia ប្រចាំកម្ពុជាបានថ្លែងថា៖ «នៅក្រុមហ៊ុន COVA យើងក៏ជួយសិស្សដែលបានបញ្ចប់ការសិក្សាពីអង្គការ Lighthouse Club មកធ្វើការនៅក្នុងការិយាល័យរបស់យើងដែរ។ នេះជាការល្អណាស់សម្រាប់គ្រប់ភាគីពាក់ព័ន្ធ ដោយសារយើងអាចនាំសិស្សមកកន្លែងធ្វើការ ដើម្បីជួយដល់ក្រុមរបស់យើង ខណៈផ្តល់ប្រាក់ចំណូល និងការបណ្តុះបណ្តាលបន្ថែមដល់ពួកគេ»។
«ព្រឹត្តិការណ៍វាយកូនហ្គោលសប្បុរសធម៌ប្រចាំឆ្នាំរបស់អង្គការ Lighthouse គឺជាវិធីដ៏ល្អមួយក្នុងការលើកកម្ពស់ការងារដែលអង្គការ Ligh-thouse Club Cambodia ធ្វើនៅកម្ពុជា។ វាក៏ជាថ្ងៃដ៏រីករាយសម្រាប់អ្នកវាយកូនហ្គោលដែលចូលចិត្តលេងកីឡាវាយកូនហ្គោលផងដែរ»។
«ការគាំទ្រដែលអង្គការ Lighthouse Club Cambodia ផ្តល់ជូនដល់សិស្សនៅក្នុងឧស្សាហកម្មសំណង់ គឺជួយអភិវឌ្ឍអ្នកដឹកនាំជំនាន់ក្រោយ នៅក្នុងឧស្សាហកម្មសំណង់របស់កម្ពុជា ហើយបើគ្មាន អង្គការ Lighthouse Club Cambodia ទេ នោះសិស្សទាំងនេះភាគច្រើននឹងមិនអាចបញ្ចប់ការសិក្សា និងសម្រេចក្តីសុបិនរបស់ពួកគេបានឡើយ»។
លោក Brenden McNally នាយកគ្រប់គ្រងក្រុមហ៊ុន Evermore International ថ្លែងថា៖ «អង្គការ Lighthouse Club Cambodia ក៏ជួយដល់កម្មករសំណង់ដែលជួបគ្រោះថ្នាក់នៅពេលកំពុងបំពេញការងារផងដែរ ដោយជួយលើថ្លៃព្យាបាល និងជួយគ្រួសាររបស់ពួកគេ អំឡុងពេលកំពុងសម្រាកព្យាបាល»។
បង្កើតឡើងនៅចក្រភពអង់គ្លេសក្នុងឆ្នាំ ១៩៥៦ អង្គការ Lighthouse ពង្រីកបាន ៣០ សាខានៅទូទាំងពិភពលោក។ សាខានៅរាជធានីភ្នំពេញត្រូវបានបង្កើតឡើងក្នុងឆ្នាំ ២០១០ ហើយបច្ចុប្បន្នមានសមាជិកជាង ១០០ នាក់។ កិច្ចខិតខំប្រឹងប្រែងរបស់អង្គការសប្បុរសធម៌នេះគឺដើម្បី «លើកកម្ពស់ស្តង់ដាក្នុងឧស្សាហកម្មនេះ» ហើយក្រុមហ៊ុន Seara Cambodia ដែលជាក្រុមហ៊ុនមានឯកទេសសាងសង់ផ្នែកកីឡា និងផ្គត់ផ្គង់ និងដំឡើងសម្ភារហាត់ប្រាណសម្រាប់គេហដ្ឋានឯកជន និងសម្រាប់ប្រើប្រាស់លក្ខណៈពាណិជ្ជកម្មនៅក្នុងឆ្នាំនេះបានចូលមកក្នុងនាមជាអ្នកឧបត្ថម្ភសាជីវកម្ម។
«ការផ្តោតសំខាន់របស់អង្គការ Lighthouse Club ទៅលើការជួយដល់យុវជនកម្ពុជាតាមរយៈការសិក្សាជំនាញវិជ្ជាជីវៈ និងការផ្តល់ជំនួយហិរញ្ញវត្ថុតាមលទ្ធភាព គឺជាការជួយបើកឱកាសកាន់តែច្រើន នៅក្នុងជីវិតកម្មករសំណង់ និងរួមចំណែកដល់ការអភិវឌ្ឍជារួមរបស់ព្រះរាជាណាចក្រកម្ពុជា»។
លោក Anthony S Gaglardi ប្រធានគ្រប់គ្រងក្រុមហ៊ុន Seara Cambodia មានប្រសាសន៍ថា៖ «អង្គការ Lighthouse បាននាំយកក្រុមហ៊ុនផ្សេងៗមករួមគ្នាក្នុងកិច្ចសហការដ៏ល្អ ដើម្បីពង្រឹងចំណងដែលយើងចែករំលែកក្នុងការរួមចំណែក ឆ្ពោះទៅរកការរីកចម្រើន និងអនាគតរបស់កម្ពុជា ទន្ទឹមនឹងនោះក៏ជួយលើកកម្ពស់ស្តង់ដានៅក្នុងឧស្សាហកម្មនេះតាមរយៈកម្មវិធីផ្តល់ពានរង្វាន់ Golden Helmet Awards ដើម្បីលើកកម្ពស់ការយល់ដឹងអំពីសុខភាព និងសុវត្ថិភាព»។
កម្មវិធី Golden Safety Helmet Award ដែលនឹងប្រារព្ធឡើងនៅចុងឆ្នាំនេះ គឺដើម្បីអបអរសាទរដល់ក្រុមហ៊ុនម៉ៅការ ដែលបានបញ្ចប់គម្រោងដោយគ្មានគ្រោះថ្នាក់ ឬឧបទ្ទវហេតុកើតឡើង។
ដោយសម្គាល់ឃើញពីសារៈសំខាន់នៃការអនុវត្តគោលការណ៍សុវត្ថិភាព ទើបអង្គការ Lighthouse Club តាមរយៈកម្មវិធីផ្តល់ពានរង្វាន់នេះ គឺមានគោលបំណងលើកទឹកចិត្ត ទាំងក្រុមហ៊ុនម៉ៅការ និងអតិថិជនឱ្យយល់ដឹងថាសុវត្ថិភាពមិនមែនជាអ្វីដែលត្រូវបំភ្លេច ឬលាក់កំបាំងនោះទេ ប៉ុន្តែវាជាអ្វីដែលគួរមានមោទនភាព។
លោក Thomson ថ្លែងថា ការប្ដេជ្ញាចិត្តរបស់អង្គការ Lighthouse Club ចំពោះការអប់រំ និងសុវត្ថិភាព ដើម្បីគាំទ្រវិស័យសំណង់នៅកម្ពុជា និងដើម្បីអភិវឌ្ឍស្តង់ដាខ្ពស់បំផុត គឺជាអ្វីដែលត្រូវប្រកាន់ខ្ជាប់។
យើងទាំងអស់គ្នាដែលនៅក្នុងឧស្សាហកម្មសំណង់កម្ពុជា តែងតែយកចិត្តទុកដាក់ខ្ពស់បំផុត ចំពោះសុវត្ថិភាព និងតម្លៃនៃជីវិតមនុស្ស»។
សម្រាប់ក្រុមគ្រួសារកម្មករសំណង់ដែលបានរងរបួសនៅកន្លែងធ្វើការ ហើយសិស្សដែលមានចំណាប់អារម្មណ៍ចូលរួមក្នុងកម្មវិធីអាហារូបករណ៍របស់អង្គការ Lighthouse Club Cambodia ហើយបុគ្គល ឬក្រុមហ៊ុនដែលចង់ចូលរួមជាមួយអង្គការ Lighthouse ដើម្បីជួយអភិវឌ្ឍអនាគតនៃវិស័យសំណង់របស់ព្រះរាជាណាចក្រកម្ពុជា សូមទាក់ទងតាមរយៈអ៊ីមែល៖ admin@lighthouseclubkh.com៕