ភ្នំពេញៈ ការបន្តអូសបន្លាយពេលនៃជំងឺកូវីដ ១៩ ក្នុងរយៈពេលជាង ១ ឆ្នាំមកនេះបានធ្វើឱ្យអត្រាស្នាក់នៅ និងតម្លៃជួលរបស់អាផាតមិននៅក្នុងរាជធានីភ្នំពេញដែលភាគច្រើនពឹងផ្អែកលើជនបរទេសនោះ បានធ្លាក់ចុះជាបន្តបន្ទាប់។ នេះបើយោងតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia។
របាយការណ៍ CBRE Cambodia បង្ហាញថា គិតត្រឹមដំណាច់ឆមាសទី១ ឆ្នាំ ២០២១ នៅរាជធានីភ្នំពេញមានអគារអាផាតមិនកម្រិត A និង B សរុបចំនួន ៥៤ គម្រោងស្មើនឹងបន្ទប់ស្នាក់នៅសរុប ៣ ២០០ យូនីត។ ក្នុងនោះ ខណ្ឌបឹងកេងកងមានប្រមាណ ៤៨ ភាគរយ ខណ្ឌចំការមន ២៧ ភាគរយ ខណ្ឌដូនពេញ ១៧ ភាគរយ ខណ្ឌជ្រោយចង្វារ ៥ ភាគរយ និងខណ្ឌទួលគោក ៣ ភាគរយ។ សម្រាប់ឆមាសទី១ មិនមានគម្រោងអាផាតមិនណាមួយបានបញ្ចប់ការសាងសង់ទេ។
របាយការណ៍ឱ្យដឹងទៀតថា នៅក្នុងអំឡុងពេលខាងលើ អាផាតមិនកម្រិត A មានតម្លៃជួលជាមធ្យម ២១,៦ ដុល្លារក្នុង ១ ម៉ែត្រការេសម្រាប់រយៈពេល ១ ខែ ថយចុះ ៥,២ ភាគរយពីចំនួន ២២,៧ ដុល្លារ កាលពីឆមាសទី ២ ឆ្នាំ ២០២០ និងកម្រិត B មានតម្លៃ ១៥ ដុល្លារ ថយចុះ ៦,៧ ភាគរយពីចំនួន ១៦ ដុល្លារ។
ជាមួយគ្នានេះដោយសារតែទីផ្សារអាផាតមិនពឹងផ្អែកលើជនបរទេស ហេតុនេះការរឹតត្បឹតការធ្វើដំណើរឆ្លងប្រទេសបានជះឥទ្ធិពលយ៉ាងខ្លាំងដល់ទីផ្សារមួយនេះ ដោយអត្រាស្នាក់នៅជារួមសម្រាប់អាផាតមិនកម្រិត A និង B ក្នុងឆមាសទី ១ មានប្រមាណ ៥០ ភាគរយធ្លាក់ចុះពីប្រមាណ ៦០ ភាគរយ កាលពីចុងឆ្នាំ ២០២០។
ទោះយ៉ាងណា តាមការព្យាកររបស់ ក្រុមហ៊ុន CBRE Cambodia នៅឆមាសទី ២ ឆ្នាំ ២០២១ នឹងមានគម្រោងអគារអាផាតមិន ៣ ទីតាំងបញ្ចប់ការសាងសង់ដែលមានបន្ទប់សរុប ៣៩៥ យូនីត។
អ្នកនាង គឹម គិនកេសា អ្នកគ្រប់គ្រងជាន់ខ្ពស់ CBRE Cambodia បានប្រាប់ ភ្នំពេញ ប៉ុស្តិ៍ កាលពីថ្ងៃទី ៤ ខែសីហាថា ទីផ្សារអាផាតមិននៅរាជធានីភ្នំពេញ ទទួលរងឥទ្ធិពលដោយផ្ទាល់ពីការឆ្លងរាលដាលជំងឺកូវីដ ១៩ តាំងពីដើមឆ្នាំ ២០២០ មក ដោយអតិថិជនជួលដែលភាគច្រើនជាជនបរទេស បានធ្វើដំណើរត្រឡប់ទៅប្រទេសខ្លួនវិញ និងភាគច្រើនមិនទាន់វិលត្រឡប់មកភ្នំពេញវិញនៅឡើយទេ។ អ្នកនាងអះអាងថា៖ «កត្តានេះបានធ្វើឱ្យអត្រាជួល និងតម្លៃជួលធ្លាក់ចុះ»។
ទាក់ទងនឹងការសាងសង់អ្នកនាង គិនកេសា បានបញ្ជាក់ថា ដោយសារស្ថានភាពការឆ្លងរាលដាលកូវីដ ១៩ អាចនឹងបន្តអូសបន្លាយពេលយូរទៅមុខទៀតនោះ ដូច្នេះសម្ពាធទីផ្សារនឹងកើតមានមួយកម្រិតទៀតពិសេសនៅចុងឆ្នាំ ២០២១ និងឆ្នាំ ២០២២។
អ្នកនាងលើកឡើងថា៖ «ដោយសារទីផ្សារអាផាតមិន និងខុនដូមានទំនាក់ទំនងគ្នាខ្លាំង ហើយតាមការរំពឹងទុកនៅចុងឆ្នាំ ២០២១ និងឆ្នាំ ២០២២ នឹងមានគម្រោងសាងសង់ខុនដូមួយចំនួនទៀតបញ្ចប់ការសាងសង់ ហេតុនេះសម្ពាធទីផ្សារអាផាតមិននឹងកើនឡើងមួយកម្រិតទៀត»៕ LA