ទីក្រុងបាងកកៈ ការស្ទង់មតិថ្មីៗនេះបង្ហាញថា សន្ទស្សន៍ទំនុកចិត្តក្នុងវិស័យអចលនទ្រព្យក្នុងទីក្រុងបាងកកនិងតំបន់ជុំវិញ បានធ្លាក់ចុះដល់ក្រោមមធ្យមភាគក្នុងរយៈពេល១០ត្រីមាសកន្លងមកនេះ។ នេះបើតាមរបាយការណ៍របស់មជ្ឈមណ្ឌលព័ត៌មានអចលនទ្រព្យ (REIC) ដែលបានផ្សព្វផ្សាយកាលពីថ្ងៃសៅរ៍។
មជ្ឈមណ្ឌលព័ត៌មានអចលនទ្រព្យ (REIC) របស់ធនាគារលំនៅឋានរបស់រដ្ឋាភិបាលថៃ បានលើកឡើងថា សន្ទស្សន៍ទំនុកចិត្តនៃអ្នកអភិវឌ្ឍន៍លំនៅឋានក្នុងទីក្រុងបាងកកក្នុងត្រីមាសទី៣ឆ្នាំនេះមានត្រឹមតែ៤៥,៨ពិន្ទុ ដែលធ្លាក់ចុះបន្ថែមទៀតពីត្រីមាសមុន។
ទោះបីយ៉ាងណា មជ្ឈមណ្ឌលនេះនិយាយថា ខ្លួនជឿថាទំនុកចិត្តនឹងប្រសើរឡើងវិញក្នុងឆមាសបន្ទាប់ ពេលដែលស្ថានភាពកូវីដ១៩ ធូរស្រាលវិញ។
សន្ទស្សន៍តម្លៃសម្រាប់វិស័យនេះក៏បានស្ថិតនៅក្រោមមធ្យមភាគ (median) សម្រាប់ ១០ ត្រីមាសជាប់ៗគ្នាផងដែរ ចាប់តាំងពីត្រីមាសទី២ នៃឆ្នាំ ២០១៩មក។
លោក Wichai Viratakaphan អគ្គនាយកស្តីទីនៃ REIC បាននិយាយថា វិធានការត្រួតពិនិត្យប្រាក់កម្ចីទៅនឹងតម្លៃ (LTV) របស់ធនាគារកណ្តាលថៃនៅត្រីមាសទី២ឆ្នាំ២០១៩ រួមជាមួយនឹងការរីករាលដាលនៃជំងឺកូវីដ១៩គឺត្រូវស្តីបន្ទោសចំពោះសន្ទស្សន៍ទាប។
លោកនិយាយថា កត្តាទាំងពីរនេះបានធ្លាក់ចុះយឺតទាំងការផ្គត់ផ្គង់និងតម្រូវការក្នុងវិស័យអចលនទ្រព្យ ដោយបន្ថែមថា អ្នកអភិវឌ្ឍន៍នៅតែព្រួយបារម្ភអំពីការរីករាលចេះតែបន្ត។
លោក Wichai និយាយថា៖«ទោះបីយ៉ាងណា សន្ទស្សន៍ទំនុកចិត្តក្នុងចំណោមអ្នកអភិវឌ្ឍន៍នៅទីក្រុងបាងកកទាំងមូលសម្រាប់៦ខែក្រោយ បានកើនឡើងដល់ ៥៧,២ ភាគរយ។ នេះប្រហែលដោយសារការសន្យារបស់រដ្ឋាភិបាលដើម្បីឲ្យប្រជាជន ៧០ ភាគរយទទួលបានវ៉ាក់សាំងត្រឹមចុងឆ្នាំ ២០២១ រួមទាំងការប្រើប្រាស់វ៉ាក់សាំង Pfizer ដែលផ្តល់ដោយអាមេរិកសម្រាប់ជាដូសជំរុញ»។
លោកបានបន្ថែមថា មជ្ឈមណ្ឌលរដ្ឋបាលស្ថានភាពសេដ្ឋកិច្ច(CESA) ថ្មីៗនេះក៏បានស្នើវិធានការថ្មីទៅកាន់គណៈរដ្ឋមន្ត្រី រួមទាំងការពង្រីកទំហំទៅដល់អ្នកទិញជាជនបរទេសដែរ។ CESA បានស្នើថា ជនបរទេសត្រូវបានអនុញ្ញាតឱ្យកាន់កាប់ច្រើនជាង៤៩ភាគរយនៃយូនីតខុនដូ ព្រមទាំងត្រូវអនុញ្ញាតឱ្យទិញអចលនទ្រព្យជាដីថែមទៀត។
លោក បន្ថែមថា៖«ទំនុកចិត្តក្នុងអចលនទ្រព្យសម្រាប់រយៈពេល៦ខែបន្ទាប់នេះបានកើនឡើងគួរជាទីកត់សម្គាល់ចាប់តាំងពីរដ្ឋាភិបាលបានចាប់ផ្តើមបន្ធូរវិធានការបិទខ្ទប់ និង អនុញ្ញាតឱ្យអាជីវកម្មខ្លះដូចជា ភោជនីយដ្ឋាន ហាងកែសម្ផស្ស កន្លែងម៉ាស្សា និងក្រុមហ៊ុនអាកាសចរណ៍ចាប់ផ្តើមអាជីវកម្មឡើងវិញ»៕ The Nation(Thailand)-ANN/RR