ភ្នំពេញៈ ក្តីបារម្ភពីការឆ្លងរាលដាលជំងឺកូវីដ ១៩ និងការប្រកាសដាក់ចូលទីផ្សារចំនួន ១២ គម្រោង (Retail Project) បានធ្វើឱ្យអត្រាប្រើប្រាស់កន្លែងលក់រាយ (Retail Occupancy rate) នៅក្នុងរាជធានី-ភ្នំពេញក្នុងឆ្នាំ ២០២១ មានប្រមាណ ៦៧ ភាគរយ ខណៈកាលពីឆ្នាំ ២០២០ អត្រាប្រើប្រាស់មាន ៨៤ ភាគរយ។ នេះបើយោងតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia។
លទ្ធផលនៃការស្រាវជ្រាវរបស់ CBRE Cambodia កាលពីពេលថ្មីៗនេះបានឱ្យដឹងថា ក្នុងឆ្នាំ ២០២១ មានទីតាំងលក់រាយថ្មីចំនួន ១២ ទីតាំងបានបើកដំណើរការ ដែលស្មើនឹងផ្ទៃក្រឡាសរុបជាង ៨៨ ០០០ ម៉ែត្រការ៉េ ខណៈកាលពីឆ្នាំ ២០២០ ទីតាំងថ្មីដាក់ចូលទីផ្សារមាន ៥ ទីតាំង ស្មើនឹងផ្ទៃក្រឡាជាង ៤០ ០០០ ម៉ែត្រការ៉េ។ ចំណែកអត្រាប្រើប្រាស់ក្នុងឆ្នាំ ២០២១ មាន ៦៧ ភាគរយ ធ្លាក់ចុះពី ៨៤ ភាគរយកាលពីឆ្នាំ ២០២០។ គិតត្រឹមដំណាច់ឆ្នាំ ២០២១ ផ្ទៃក្រឡាកន្លែងលក់រាយនៅភ្នំពេញមានជាង ៤០ ម៉ឺនម៉ែត្រការ៉េ។
សម្រាប់តម្លៃជួលរបស់ទីតាំងលក់រាយនាដំណាច់ឆ្នាំ ២០២១ គឺប្រភេទ Shopping Mall មានតម្លៃជាមធ្យម ២៧ ដុល្លារក្នុង ១ ម៉ែត្រការ៉េសម្រាប់រយៈពេល ១ ខែ ធ្លាក់ចុះ ៦ ភាគរយបើធៀបនឹងឆ្នាំ ២០២០, ប្រភេទ Prime High Street មានតម្លៃ ២៤ ដុល្លារ ធ្លាក់ចុះ ១០ ភាគរយ, ប្រភេទ Prime Retail Podium តម្លៃ ២០ ដុល្លារថយចុះ ១៧ ភាគរយ និងប្រភេទ Community Mall មានតម្លៃ ២១ ដុល្លារធ្លាក់ចុះ ៣៦ ភាគរយ។
បើតាម CBRE Cambodia នៅក្នុងឆ្នាំ ២០២១ មានហាង/យីហោលំដាប់អន្តរជាតិ ២០ បានបើកដំណើរការមានចូលជា 7 eleven, Pizza Hut, PAPA John''s, Fila និង Ralph Lauren ជាដើម។
ក្នុងឆ្នាំ ២០២២ នេះផ្ទៃក្រឡាកន្លែងលក់រាយដែលគ្រោងនឹងដាក់ចូលក្នុងរាជធានី-ភ្នំពេញ មានចំនួនជាង ១៩ ម៉ឺនម៉ែត្រការ៉េ ដោយប្រភេទ Shopping Mall មានជាង ១១០ ០០០ ម៉ែត្រការ៉េ, Community Mall ជាង ៥០ ០០០ ម៉ែត្រការ៉េ, Retail Podium ជាង ២៥ ០០០ ម៉ែត្រការ៉េ និងប្រភេទផ្សេងទៀតជាង ១ ០០០ ម៉ែត្រការ៉េ។ គម្រោងទាំងនោះមានដូចជា Chip Mong Sen Sok Mall, Chip Mong 271 Mega Mall, Prince International Plaza និង Lucky Pavilion Mall។ នេះបើតាមការព្យាកររបស់ CBRE Cambodia។
អ្នកនាង គឹម គិនកេសា នាយិការងផ្នែកស្រាវជ្រាវ និងប្រឹក្សាយោបល់ក្រុមហ៊ុន CBRE Cambodia បានប្រាប់ភ្នំពេញប៉ុស្តិ៍ក្នុងថ្ងៃទី ២ ខែកុម្ភៈថា កន្លែងជួលលក់រាយបានរងផលប៉ះពាល់ខ្លាំងនាអំឡុងពាក់កណ្តាលឆ្នាំ ២០២១ ដោយធ្លាក់ចុះទាំងចំនួនអតិថិជនដើរទិញទំនិញ និងការបើកដំណើរការអាជីវកម្មថ្មី។ ស្របពេលជាមួយគ្នានេះនិន្នាការនៃការទិញទំនិញតាមអនឡាញក៏កាន់តែមានសកម្មភាពខ្លាំងផងដែរ។ អ្នកនាងបន្តថា ទោះយ៉ាងណាស្ថានភាពនេះបានចាប់ផ្តើមល្អឡើងវិញបណ្តើរៗហើយចាប់ពីចុងឆ្នាំ ២០២១ មក។
អ្នកនាង គិនកេសា និយាយថា៖ «ទីផ្សារនេះបានល្អឡើងវិញជាបន្តបន្ទាប់ ប៉ុន្តែវាអាចនឹងមានបញ្ហាប្រឈមខ្លះសម្រាប់ឆ្នាំ ២០២២ នេះ»។
យោងតាម អ្នកនាង គិនកេសា អ្វីដែលជាបញ្ហាគួរឱ្យចាប់អារម្មណ៍សម្រាប់ឆ្នាំនេះគឺចំនួននៃការផ្គត់ផ្គង់កន្លែងលក់រាយដាក់ចូលទីផ្សារនឹងមានរហូតដល់ជិត ២០ ម៉ឺនម៉ែត្រការ៉េ ដែលនឹងធ្វើឱ្យមានការប្រកួតប្រជែងតម្លៃដាក់ជួលកាន់តែខ្លាំង។
ប្រធានសមាគមអចលនទ្រព្យសកល លោក សំ សុខនឿន បានយល់ឃើញប្រហាក់ប្រហែលនឹងការលើកឡើងខាងលើ ដោយលោកបាននិយាយថា ទីផ្សារកន្លែងជួលសម្រាប់លក់ទំនិញបានធ្លាក់ចុះយ៉ាងខ្លាំងអំឡុងចុងត្រីមាសទី ២ និងត្រីមាសទី ៣ ឆ្នាំ ២០២១ ដែលបណ្តាលមកពីក្តីព្រួយបារម្ភពីការឆ្លងរាលដាលកូវីដ ១៩។ ទោះយ៉ាងណាទីផ្សារនេះចាប់ផ្តើមល្អឡើងវិញហើយ។ លោកបន្តថា ការបើកដំណើរការសេដ្ឋកិច្ច និងប្រទេសឡើងវិញបានចូលរួមចំណែកយ៉ាងច្រើនក្នុងការធ្វើឱ្យតម្រូវការកន្លែងលក់រាយ មានសម្ទុះឡើងវិញ។
លោកថ្លែងថា៖ «អត្រាដ៏ខ្ពស់នៃចំនួនប្រជាជនចាក់វ៉ាក់សាំង និងការគ្រប់គ្រងដ៏មានប្រសិទ្ធភាពនៃការឆ្លងរាលដាលជំងឺកូវីដ ១៩ នឹងធ្វើឱ្យអត្រានៃភាពទំនេររបស់ទីតាំងនៅសល់ធ្លាក់ចុះ»៕ LA