ភ្នំពេញៈ ក្រុមហ៊ុន Frasers Hospitality មានមូលដ្ឋាននៅក្នុងប្រទេសសិង្ហបុរីនៅឆ្នាំនេះនឹងចាប់ផ្តើមចូលទីផ្សារថ្មីមួយនៅអាស៊ីអាគ្នេយ៍ ព្រមទាំងនឹងបើកគម្រោងអចលនទ្រព្យដំបូងរបស់ខ្លួននៅចំកណ្តាលទីក្រុងភ្នំពេញផងដែរ។
បើតាមសេចក្តីប្រកាសព័ត៌មានក្រុមហ៊ុន Frasers Hospitality នឹងមានអចលនទ្រព្យចំនួន ៣ នៅតំបន់ពាណិជ្ជកម្មសំខាន់ៗក្នុងរាជធានីភ្នំពេញរួមមាន គម្រោង Capri by Fraser ចំនួន ៨៨ បន្ទប់ (បើកដំណើរការនៅខែតុលា ឆ្នាំ ២០២២),Capri by Fraser មាន ៧៨ បន្ទប់ (បញ្ចប់ការសាងសង់នៅឆ្នាំ ២០២៤) និងគម្រោង Fraser Residence Sen Sok មាន ២០០ បន្ទប់ (នឹងបញ្ចប់នៅឆ្នាំ ២០២៦)។
Capri by Fraser ទាំង ២ នេះមានទីតាំងនៅកណ្តាលទីក្រុងភ្នំពេញដោយមានចម្ងាយពីគ្នាប្រហែល ៥ នាទី (ជិះរថយន្ត)។ អចលនទ្រព្យទាំង ២ នេះនឹងត្រូវប្រើប្រាស់ចម្រុះមានដូចជាបន្ទប់សណ្ឋាគារ អាផាតមិន ដែលរចនាឡើងដើម្បីផ្គត់ផ្គង់ដល់អ្នកធ្វើដំណើរ និងភ្ញៀវកម្រិតមធ្យមស្នាក់នៅ។
រីឯ Fraser Residence Sen Sok ស្ថិតនៅខណ្ឌសែនសុខ ជាទីតាំងដែលមានការរីកចម្រើនខ្លាំង។
សេចក្តីប្រកាសព័ត៌មានបានឱ្យដឹងថា ដោយសារកម្ពុជាមានផែនការស្ដារសេដ្ឋកិច្ចឡើងវិញពីវិបត្តិជំងឺកូវីដ ធុរកិច្ចអន្តរជាតិបានបង្ហាញចំណាប់អារម្មណ៍ក្នុងការបង្កើនវត្តមានរបស់ពួកគេនៅក្នុងរាជធានីភ្នំពេញ។
ប្រទេសកម្ពុជា គឺជាទីតាំងដ៏គួរឱ្យទាក់ទាញដែលមានអត្រាចាក់វ៉ាក់សាំង និងដូសជំរុញខ្ពស់បំផុតនៅលើពិភពលោក និងមានការរឹតបន្តឹងតាមច្រកព្រំដែនតិចតួច។ អាកាសយានដ្ឋានថ្មីដែលបច្ចុប្បន្នកំពុងសាងសង់នៅភ្នំពេញនឹងគាំទ្រដល់ការមកដល់របស់ភ្ញៀវទេសចរ ដែលឃើញមានការកើនឡើងជារៀងរាល់ឆ្នាំចាប់ពីចន្លោះឆ្នាំ ២០១០ ដល់ឆ្នាំ ២០១៩។
លោកស្រី Tonya Khong អនុប្រធានជាន់ខ្ពស់តំបន់អាស៊ីប៉ាស៊ីហ្វិករបស់ក្រុមហ៊ុន Frasers Hospitality ថ្លែងថា៖ «ក្នុងរយៈពេល ១ ទសវត្សរ៍ចុងក្រោយនេះ រាជធានីភ្នំពេញបានវិវឌ្ឍក្លាយទៅជាទីក្រុងមួយដែលរីកចម្រើន និងរស់រវើក។ គួបផ្សំជាមួយនឹងសេដ្ឋកិច្ចវ័យក្មេង ថាមវន្ត និងវិធានការស្តារឡើងវិញពីការរីករាលដាលជំងឺកូវីដដ៏រឹងមាំនៅកម្ពុជា យើងមានសេចក្តីសោមនស្សរីករាយក្នុងការបង្ហាញ យីហោអចលនទ្រព្យ Frasers Hospitality របស់យើង ដើម្បីបំពេញតម្រូវការទីផ្សារផ្សេងៗ និងផ្តល់បទពិសោធប្រកបដោយគុណភាពខាងអចលនទ្រព្យ»។
លោកស្រីលើកឡើងថា ចក្ខុវិស័យសម្រាប់អាស៊ីអាគ្នេយ៍ក៏គ្រោងនឹងទទួលបានជោគជ័យ ជាពិសេសជាមួយនឹងប្លុកពាណិជ្ជកម្មសេរីឈានមុខគេលើពិភពលោក កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ក៏បានចូលជាធរមាននៅក្នុងឆ្នាំនេះផងដែរ។ ក្រុមវិនិយោគិន និងក្រុមអ្នកវិភាគរំពឹងថា កិច្ចព្រមព្រៀងពាណិជ្ជកម្មមួយនេះនឹងជំរុញឱ្យមានសកម្មភាពអាជីវកម្ម និងការចូលរួមកាន់តែច្រើន។
លោកស្រីបន្ថែមថា៖ «អចលនទ្រព្យទាំង ៣ របស់យើងនឹងដាក់ឱ្យដំណើរការក្នុងរយៈពេលប៉ុន្មានឆ្នាំខាងមុខនេះ ហើយយើងត្រៀមខ្លួនជាស្រេចដើម្បីសម្រួលដល់ការវិលត្រឡប់មកវិញ ការធ្វើដំណើរ ក៏ដូចជាការជំរុញដែលរំពឹងទុកពីព្រឹត្តិការណ៍ក្នុងតំបន់ជាច្រើនដូចជា ព្រឹត្តិការណ៍កីឡាអាស៊ីអាគ្នេយ៍ឆ្នាំ ២០២៣ និងកិច្ចព្រមព្រៀង RCEP ជាដើម។ ការចូលមកទីផ្សារកម្ពុជា គឺជាមហិច្ឆតារយៈពេលវែងរបស់យើងក្នុងការបង្កើនវត្តមានរបស់យើងនៅក្នុងប្រទេសមួយនេះ និងតំបន់អាស៊ីអាគ្នេយ៍»។
Frasers Property Limi-ted (Frasers Property រួមជាមួយ Frasers Property Group ជាក្រុមហ៊ុនបុត្រសម្ព័ន្ធរបស់ខ្លួន) គឺជាក្រុមហ៊ុនអភិវឌ្ឍន៍ គ្រប់គ្រង ប្រតិបត្តិករអន្តរជាតិនៃផលិតផល និងសេវាកម្មអចលនទ្រព្យនៅទូទាំងចង្វាក់តម្លៃអចលនទ្រព្យ។ ក្រុមហ៊ុននេះបានចុះបញ្ជីនៅផ្សារគោលនៅផ្សារហ៊ុន Singapore Exchange Securities Trading Limited និងមានការិយាល័យកណ្តាលនៅប្រទេសសិង្ហបុរី។ ក្រុមហ៊ុនមួយនេះមានទ្រព្យសកម្មប្រមាណ ៤០,៣ ពាន់លានដុល្លារសិង្ហបុរី គិតត្រឹមថ្ងៃទី ៣០ ខែកញ្ញា ឆ្នាំ ២០២១៕ LA