ភ្ញៀវទេសចរនាំគ្នាឡើងទៅកម្សាន្តនៅលើភ្នំបូកគោកន្លងមក។ ហេង ជីវ័ន
ភ្នំពេញៈ ក្រុមហ៊ុនសុខាអូតែលបានចំណាយថវិកាអភិវឌ្ឍន៍អស់ចន្លោះពី ៤០០-៥០០ លានដុល្លារលើគម្រោងអភិវឌ្ឍន៍ទីក្រុងបូកគោថ្មីមានផ្ទៃដី ៣០ ពាន់ហិកតានៅក្នុងឧទ្យានជាតិភ្នំបូកគោ ដែលបច្ចុប្បន្នក្រុមហ៊ុនបានកំពុងឈូសដីធ្វើផ្លូវតភ្ជាប់មកកាន់ផ្លូវជាតិលេខ ៤ (២ ខ្សែ) ដែលមានប្រវែងសរុប ១២៧ គីឡូម៉ែត្រចាប់តាំងពីទទួលបានសិទ្ធិវិនិយោគពីរដ្ឋាភិបាលរហូតដល់ពេលនេះ។
.jpg)
ប្រធានក្រុមហ៊ុនសុខាអូតែល លោក សុខ គង់ បានប្រាប់ភ្នំពេញប៉ុស្តិ៍កាលពីសប្តាហ៍មុនថា បន្ទាប់ពីទទួលបានការយល់ព្រមពីរដ្ឋាភិបាលក្នុងការជួលដីឱ្យក្រុមហ៊ុនសុខាអូតែល អភិវឌ្ឍរហូតដល់ថ្ងៃទី ៣១ ខែ សីហា ឆ្នាំ ២១០៩ រួចមក ក្រុមហ៊ុនលោកបានខិតខំធ្វើកិច្ចការជាច្រើន ដើម្បីធ្វើយ៉ាងណាអភិវឌ្ឍទីក្រុងបូកគោឱ្យក្លាយជាកន្លែងដែលមានភាពទាក់ទាញខ្លាំងទាំងសម្រាប់ការកម្សាន្ត ស្នាក់នៅ និងវិនិយោគ។ លោកបន្តថា បច្ចុប្បន្នក្រុមហ៊ុនបានកំពុងសាងសង់ផ្លូវថ្មីមួយខ្សែ ដែលមានប្រវែងសរុប ១២៧ គីឡូម៉ែត្រតភ្ជាប់ពីក្រុងបូកគោទៅកាន់ផ្លូវជាតិលេខ ៤។
លោកថ្លែងថា៖ «បច្ចុប្បន្នផ្លូវនេះបានឈូសឆាយបានជាង ៨ គីឡូម៉ែត្រហើយ ប៉ុន្តែមិនទាន់ដឹងថា ចប់នៅពេលណាទេ ដោយវាអាស្រ័យលើទុនដែលក្រុមហ៊ុនមាន។ ផ្លូវនេះនឹងជួយសម្រួលការធ្វើដំណើររបស់ប្រជាពលរដ្ឋ និងកំណើនសេដ្ឋកិច្ចជាតិ ពិសេសសម្រាប់អ្នកចង់មកលេងកម្សាន្តទីក្រុងបូកគោអាចមកតាមផ្លូវជាតិលេខ ៤ ខណៈបច្ចុប្បន្នគេអាចធ្វើដំណើរទៅក្រុងបូកគោបានតែតាមផ្លូវជាតិលេខ ៣ ប៉ុណ្ណោះ»។
លោកប្រាប់ទៀតថា បើគិតពីការអភិវឌ្ឍតាំងពីដើមដំបូង រាប់ទាំងសណ្ឋាគារ កាស៊ីណូ ផ្លូវឡើងភ្នំ និងហេដ្ឋារចនាសម្ព័ន្ធជាច្រើនទៀត ក្រុមហ៊ុនរបស់លោកបានវិនិយោគអស់ទឹកប្រាក់ចន្លោះពី ៤០០ ទៅ ៥០០ លានដុល្លារហើយមកដល់ពេលនេះ។
លោក សុខ គង់ បានលើកឡើងថា ដោយសារគម្រោងនេះមានទំហំធំ និងប្រើពេលអភិវឌ្ឍន៍យូរ ដូច្នេះក្រុមហ៊ុនលោកក៏ប្រកាសបើកទទួលការចូលរួមវិនិយោគពីសំណាក់វិនិយោគិនក្នុងស្រុក និងបរទេស ព្រមទាំងអាជ្ញាធរដើម្បីជួយឱ្យគម្រោងនេះអាចសម្រេចបានតាមផែនការមេកំណត់ផងដែរ។
លោកបានបញ្ជាក់ថា៖ «យើងបាននិងកំពុងកសាងទីក្រុងថ្មីនេះដើម្បីជំរុញការអភិវឌ្ឍសេដ្ឋកិច្ចជាតិ ប៉ុន្តែទំហំចំណាយច្រើនណាស់ ដែលទុនវិនិយោគពី ១០ ទៅ ២០ ពាន់លានដុល្លារមិនគ្រប់ទេ ហេតុនេះក្រុមហ៊ុនសូមស្នើរដ្ឋាភិបាល និងវិស័យឯកជនបន្តគាំទ្រឱ្យកាន់តែខ្លាំងថែមទៀត ដើម្បីក្រុមហ៊ុនមានទឹកចិត្តពង្រីកការវិនិយោគឱ្យកាន់តែលឿនថែមមួយកម្រិតទៀត»។
លោក ពៅ វណ្ណថា ប្រធានក្រុមវិស្វករប្រចាំគម្រោងសាងសង់ផ្លូវថ្មីនេះបាននិយាយថា ការសាងសង់ផ្លូវនេះបានជួបឧបសគ្គច្រើន ដោយសារជាផ្លូវថ្មីសុទ្ធសាធ និងត្រូវពុះកាត់ភ្នំ និងផ្ទាំងថ្មធំៗជាច្រើន ហេតុនេះការសាងសង់នឹងត្រូវចំណាយ ពេល និងថវិកាច្រើន។
យោងតាមលោក វណ្ណា ផ្លូវថ្មីនេះមានប្រវែងសរុប ១២៧ គីឡូម៉ែត្រដោយចេញពីគម្រោងអភិវឌ្ឍន៍ក្រុងបូកគោ ៣៣ គីឡូម៉ែត្រ វានឹងត្រូវបែកចេញជា ២ គឺមួយឆ្ពោះទៅផ្លូវជាតិលេខ ៤ ដោយកាត់តាមចម្ការដូងប្រេងរបស់ក្រុមហ៊ុន ម៉ុង រិទ្ធី គ្រុប និងមួយខ្សែទៀតនឹងឆ្ពោះទៅកាន់ពេជ្រនិល (យាយម៉ៅ)។
លោកប្រាប់ថា៖ «ផ្លូវថ្មីនេះមានសារៈសំខាន់ណាស់ ដែលនឹងជួយសម្រួលដល់ការធ្វើដំណើររបស់ប្រជាពលរដ្ឋពីផ្លូវជាតិលេខ ៤ ទៅកាន់ក្រុងបូកគោ និងជួយលើកកម្ពស់ជីវភាព សេដ្ឋកិច្ច សង្គមរបស់ប្រជាពលរដ្ឋនៅតំបន់នោះផងដែរ”។
ឧទ្យានជាតិព្រះមុនីវង្សភ្នំបូកគោ ដែលត្រូវបានគេស្គាល់ភាគច្រើនថា ឧទ្យានជាតិបូកគោមានចម្ងាយប្រមាណ ១១ គីឡូម៉ែត្រពីក្រុងកំពតទៅកាន់ជើងភ្នំ និងចម្ងាយ ៣២ គីឡូម៉ែត្រពីជើងភ្នំដល់កំពូលភ្នំ។
បើយោងតាមលោក សុខ គង់ បានឱ្យដឹងថា ឧទ្យានជាតិព្រះមុនីវង្សភ្នំបូកគោ មានផ្ទៃដីប្រមាណ ១៤០ ០០០ ហិកតា ប៉ុន្តែមានតែផ្ទៃដី ៣០ ០០០ ហិកតាប៉ុណ្ណោះសម្រាប់យកមកអភិវឌ្ឍ៕ LA
