ភ្នំពេញៈ ក្រុមអ្នកជំនាញអចលនទ្រព្យបានលើកឡើងថា ទោះបីកម្ពុជាបានបើកប្រទេសទទួលភ្ញៀវទេសចរ និងអ្នកវិនិយោគបរទេសចាប់តាំងពីខែវិច្ឆិកា ឆ្នាំ ២០២១ មក ក៏ទីផ្សារអចលនទ្រព្យនៅខេត្តព្រះសីហនុនៅមិនទាន់មានដំណើរការល្អឡើងវិញនោះទេ។
បច្ចុប្បន្ន ខេត្តព្រះសីហនុត្រូវបានរាជរដ្ឋាភិបាលកម្ពុជាកំណត់ជាតំបន់សេដ្ឋកិច្ចពិសេសគំរូពហុបំណង។
ប្រធានសមាគមអចលនទ្រព្យសកល លោក សំ សុខនឿន បានប្រាប់ភ្នំពេញប៉ុស្តិ៍កាលពីថ្ងៃទី ៩ ខែមីនា ថា ទីផ្សារអចលនទ្រព្យនៅខេត្តព្រះសីហនុ ចាប់តាំងពីឆ្នាំ ២០១៩ មកដល់ពេលនេះ គឺនៅស្ងប់ស្ងាត់ដដែល ដោយគេអាចនិយាយថា សកម្មភាពទីផ្សារធ្លាក់ចុះជាង ៩០ ភាគរយបើធៀបនឹងអំឡុងឆ្នាំ ២០១៦-២០១៨។ មានកត្តាចម្បងចំនួន ២ ដែលធ្វើឱ្យទីផ្សារនេះធ្លាក់ចុះ គឺទី ១ ការបិទបញ្ចប់រាល់ប្រតិបត្តិការល្បែងភ្នាល់តាមប្រព័ន្ធអនឡាញនៅកម្ពុជា (ចាប់ពីឆ្នាំ ២០១៩) និងទី ២ ការទទួលរងផលប៉ះពាល់ពីការឆ្លងរាលដាលជំងឺកូវីដ ១៩។
លោកថ្លែងថា៖ «ដោយសារអចលនទ្រព្យនៅខេត្តព្រះសីហនុមានតម្លៃខ្ពស់រួចទៅហើយកាលពីអំឡុងឆ្នាំ ២០១៦-២០១៨ ហេតុនេះការទិញក្នុងពេលនេះស្ទើរតែមិនមាន (ប្រជាជនក្នុងស្រុក)។ វានឹងអាចមានសកម្មភាពឡើងវិញ ប្រសិនបើអ្នកវិនិយោគបរទេស ពិសេសជនជាតិចិនបន្តចូលមកទីនោះសាជាថ្មី»។
យោងតាមលោក សុខនឿន តម្លៃអចលនទ្រព្យក្នុងក្រុងព្រះសីហនុពេលនេះ គឺប្រហាក់ប្រហែលឆ្នាំ ២០១៨ ប៉ុន្តែមិន មានសកម្មភាពទិញលក់ទេ ដោយកន្លែងខ្លះតម្លៃដីបានលោតដល់ ៧ ០០០ ដុល្លារក្នុង ១ ម៉ែត្រការ៉េ។ តម្លៃនេះ គឺមិនផ្តល់លទ្ធភាពឱ្យប្រជាជនក្នុង ស្រុកអាចវិនិយោគបានទេ។
លោក សុខនឿន បានថ្លែងបញ្ជាក់ទៀតថា៖ «ឆ្នាំ ២០១៦, ២០១៧ និងឆ្នាំ ២០១៨ ត្រូវបានគេចាត់ទុកជាសករាជមាសនៃទីផ្សារអចលនទ្រព្យ និងសំណង់ក្នុងខេត្តព្រះសីហនុ (ក្រុងព្រះសីហនុ) ដែលពេលនោះ មានការរីកលូតលាស់ឆាប់រហ័សនឹកស្មានមិនដល់»។
ចំណែកអគ្គនាយកក្រុមហ៊ុនអចលនទ្រព្យ ឡាក់គី រៀលធី លោក ឌឹត ចណ្ណា បាននិយាយ ថា នៅក្នុងត្រីមាសទី ១ ឆ្នាំ ២០២២ នេះទីផ្សារអចលនទ្រព្យក្នុងខេត្តព្រះសីហនុនៅមិនទាន់មានអ្វីប្រែប្រួលខ្លាំងគួរឱ្យកត់សម្គាល់ទេបើធៀបនឹងចុងឆ្នាំ ២០២១។ លោកបន្តថា ទោះយ៉ាងណាតម្លៃ និងសកម្មភាពទីផ្សារនេះអាចនឹងមានការប្រែប្រួលភ្លាមៗ ប្រសិនបើចំនួនអ្នកវិនិយោគ និងភ្ញៀវទេសចរបរទេសធ្វើដំណើរមកកម្សាន្តនៅទីនោះក្នុងចំនួនច្រើន។
លោកបានថ្លែងថា៖ «បើនិយាយក្នុងពេលនេះ គឺមិនទាន់មានធ្វើប្រែប្រួលទេ ប៉ុន្តែនៅពេលខាងមុខឆាប់ៗនេះអ្វីៗអាចនឹងមានការប្រែប្រួលខ្លាំង ព្រោះប្រទេសយើងបាននិងកំពុងបើកដំណើរការគ្រប់វិស័យ រួមទាំងជើងហោះហើរអន្តរជាតិផងដែរ»។
លោក ចណ្ណា ប្រាប់ថា លោកទើបទទួលបានព័ត៌មានថ្មីៗថា មានអ្នកវិនិយោគបរទេសជាច្រើនកំពុងចាប់អារម្មណ៍ក្នុងការបណ្តាក់ទុន សហការ ឬទិញគម្រោងអភិវឌ្ឍន៍ដែលជាប់គាំង យកទៅអភិវឌ្ឍបន្ត។ លោកបញ្ជាក់ថា៖ «ខ្ញុំគិតថាមិនយូរទៀតទេវិស័យអចលនទ្រព្យក្នុងខេត្តព្រះសីហនុនឹងមានសម្ទុះខ្លាំងដូចដើមវិញ (អំឡុងមុនឆ្នាំ ២០១៨)»។
បន្ទាប់ពីអាក់ខានជាច្រើនខែដែលបណ្តាលមកពីឥទ្ធិពលនៃការរីករាលដាលជំងឺកូវីដ ១៩ អាកាសយានដ្ឋានអន្តរជាតិខេត្តព្រះសីហនុទើបទទួលបានការចុះចតរបស់ជើងយន្តហោះប្រភេទពាណិជ្ជកម្មជាលើកដំបូងកាលពីរាត្រីថ្ងៃទី ៦ ខែមីនាកន្លងមក។ នេះបើតាមលោកនាយករដ្ឋមន្ត្រី ហ៊ុន សែន ថ្លែងក្នុងឱកាសដែលលោកបានអញ្ជើញចូលរួមបើកសម្ពោធដាក់ឱ្យដំណើរការជាផ្លូវការនៃមន្ទីរពេទ្យមិត្តភាពកម្ពុជា-ចិនត្បូងឃ្មុំ កាលពីថ្ងៃទី ៧ ខែមីនា៕ LA
វីដេអូ៖