រោងចក្រផលិតស៊ីម៉ងត៍របស់ក្រុមហ៊ុន ជីបម៉ុង អ៊ិនស៊ី ស៊ីមេន ខបភើរេសិន ដែលបើកដំណើរការកាលពីឆ្នាំ ២០១៨។ ហ៊ឹន ពិសី
កំពង់ស្ពឺៈ គម្រោងវិនិយោគរោងចក្រផលិតស៊ីម៉ងត៍តម្លៃជាង ២៥០ លានដុល្លារនៅខេត្តកំពង់ស្ពឺរបស់ក្រុមហ៊ុនមកពីប្រទេសចិន Conch KT Cement បានសិក្សាបញ្ចប់អំពីសក្តានុពលធនធានរួចរាល់ហើយ ដោយនៅពេលនេះក្រុមហ៊ុនកំពុងរៀបចំបំពេញបន្ថែមនូវនីតិវិធីច្បាប់នៅក្រសួង-ស្ថាប័ន និងផ្នែកពាក់ព័ន្ធដើម្បីឈានឆ្ពោះទៅចាប់ផ្តើមដំណើរការសាងសង់។ នេះបើយោងតាម លោក វ៉ី សំណាង អភិបាលខេត្តកំពង់ស្ពឺ។
.jpg)
គម្រោងវិនិយោគលើរោងចក្រផលិតស៊ីម៉ងត៍តម្លៃប្រមាណជាង ២៥០ លានដុល្លារនេះ មានទីតាំងស្ថិតនៅភូមិមនោរម្យ ឃុំហោងសំណំ ស្រុកឱរ៉ាល់ ខេត្តកំពង់ស្ពឺ។
លោក វ៉ី សំណាង អភិបាលខេត្តកំពង់ស្ពឺបានប្រាប់ភ្នំពេញប៉ុស្តិ៍ក្នុងថ្ងៃទី ២៣ ខែមីនាថា បច្ចុប្បន្នការសិក្សារបស់ក្រុមហ៊ុនទៅលើសក្តានុពលធនធាននៅក្នុងតំបន់បានបញ្ចប់រួចរាល់ហើយដោយក្នុងនោះក្រុមហ៊ុនក៏បានសិក្សាពីការដោះស្រាយផលប៉ះពាល់ជាមួយភាគីពាក់ព័ន្ធ និងបានរៀបចំប្លង់គោលពីការបែងចែកតំបន់អាជីវកម្ម និងតំបន់រដ្ឋបាល សម្រាប់ដំណើរការអាជីវកម្មផងដែរ។ លោកបន្តថា ទោះយ៉ាងណាមកដល់ពេលនេះ រដ្ឋបាលខេត្តកំពង់ស្ពឺ នៅមិនទាន់ទទួលបានព័ត៌មានលម្អិតពីកាលបរិច្ឆេទនៃការចាប់ផ្តើមដំណើរការសាងសង់រោងចក្រនេះនៅឡើយទេ។
លោកថ្លែងថា៖ «ពេលនេះក្រុមហ៊ុនកំពុងបំពេញបន្ថែមនូវបែបបទនីតិវិធីច្បាប់តាមក្រសួង-ស្ថាប័ន និងលិខិតបទដ្ឋានពាក់ព័ន្ធមួយ ដោយក្រុមហ៊ុននៅមិនទាន់បានសាងសង់អ្វីនៅឡើយទេ ក្រៅពីការឈូសឆាយផ្លូវ ដើម្បីចូលសិក្សាធនធានតែប៉ុណ្ណោះ»។
លោកអភិបាលខេត្តបានលើកឡើងទៀតថា កត្តាស្ថិរភាពនយោបាយមានសុខសន្តិភាព និងសុវត្ថិភាពល្អ កត្តាភូមិសាស្ត្រអំណោយផលដោយមានផ្លូវជាតិសំខាន់ៗឆ្លងកាត់ ពិសេសផ្លូវល្បឿនលឿន និងភាពសម្បូរបែបនៃកម្លាំងពលកម្ម បានធ្វើឱ្យខេត្តកំពង់ស្ពឺ ទាក់ទាញការចូលមកបណ្តាក់ទុនពីសំណាក់អ្នកវិនិយោគនៅគ្រប់ទិសទី។ ការបណ្តាក់ទុនវិនិយោគបានជួយផ្តល់ឱ្យខេត្តនូវភាពវិជ្ជមានជាច្រើនទាំងកម្រិតជីវភាពប្រជាជន និងកំណើនសេដ្ឋកិច្ចជាតិផងដែរ។
លោកបញ្ជាក់ថា៖ «ក្រោមការដឹកនាំរបស់ប្រមុខរាជរដ្ឋាភិបាល បច្ចុប្បន្នកម្ពុជាបានទាក់ទាញអ្នកវិនិយោគជាច្រើនឱ្យចូលមកប្រកបរបរអាជីវកម្មនៅកម្ពុជា ដែលសកម្មភាពទាំងនេះបានជួយធ្វើឱ្យជីវភាពប្រជាជនក្នុងខេត្តមានលក្ខណៈល្អប្រសើរ មានការងារ មានមុខរបរច្បាស់លាស់ ជួយលើកស្ទួយជីវភាពសហគមន៍ ជួយអភិវឌ្ឍសង្គមជាតិពី ១ ឆ្នាំទៅ ១ ឆ្នាំ និងចូលរួមកាត់បន្ថយភាពក្រីក្ររបស់ប្រជាពលរដ្ឋជាបន្តបន្ទាប់»។
ប្រធានគ្រប់គ្រងទូទៅនៃសមាគមអ្នកសាងសង់កម្ពុជា លោក ជីវ ស៊ីវផេង បាននិយាយថា ការវិនិយោគលើរោងចក្រផលិតស៊ីម៉ងត៍ នឹងផ្តល់ផលប្រយោជន៍យ៉ាងច្រើនសម្រាប់សេដ្ឋកិច្ចកម្ពុជា ទាំងការបង្កើតការងារថ្មី ការកាត់បន្ថយការនាំចូលពីបរទេស និងអាចឈានទៅនាំចេញនៅពេលអនាគតផងដែរ ខណៈកម្ពុជាមានទីតាំង (វត្ថុធាតុដើម) ជាច្រើនសម្រាប់ផលិតស៊ីម៉ងត៍។ លោកបានបន្តថា តាមរយៈកំណើនសេដ្ឋកិច្ច និងការរីកចម្រើននៃវិស័យសំណង់ ប្រទេសកម្ពុជានឹងត្រូវការស៊ីម៉ងត៍ក្នុងបរិមាណច្រើននៅពេលខាងមុខ ជាពិសេសនៅពេលស្ថានភាពការឆ្លងរាលដាលជំងឺកូវីដ ១៩ ត្រូវគ្រប់គ្រងបានទាំងស្រុង។
លោកថ្លែងថា៖ «ការបង្កើតរោងចក្រផលិតនៅក្នុងស្រុក នឹងមិនត្រឹមតែធ្វើឱ្យតម្លៃស៊ីម៉ងត៍ទាបជាងមុនប៉ុណ្ណោះទេ ប៉ុន្តែវាថែមទាំងជួយឱ្យស៊ីម៉ងត៍កាន់តែមានគុណភាពល្អផងដែរ»។
លោកបន្ថែមថា នៅពេលមានការវិនិយោគលើរោងចក្រផលិតក្នុងស្រុកកាន់តែច្រើន វាក៏ជួយផ្តល់ទំនុកចិត្តដល់វិនិយោគិនថ្មីៗ ក្នុងការចូលមកបណ្តាក់ទុននៅកម្ពុជាកាន់តែច្រើន។
កាលពីឆ្នាំ ២០២១ លោក វ៉ី សំណាង ធ្លាប់បានប្រាប់ភ្នំពេញប៉ុស្តិ៍ថា តាមផែនការរោងចក្រផលិតស៊ីម៉ងត៍នេះនឹងមានសមត្ថភាពផលិតស៊ីម៉ងត៍បានជិត ២ លានតោនក្នុង ១ ឆ្នាំ។
របាយការណ៍ក្រសួងពាណិជ្ជកម្មបានបង្ហាញថា ក្នុងរយៈពេល ១០ ខែ ឆ្នាំ ២០២១ កម្ពុជាបាននាំចូលស៊ីម៉ងត៍ ក្នុងតម្លៃសរុប ៤០ លានដុល្លារធ្លាក់ចុះ ៣៣ ភាគរយធៀបរយៈពេលដូចគ្នាឆ្នាំ ២០២០ ដែលមាន ៥៩ លានដុល្លារ។
គិតត្រឹមដើមឆ្នាំ ២០២២ នៅកម្ពុជាមានរោងចក្រផលិតស៊ីម៉ងត៍ចំនួន ៥ កំពុងដំណើរការ ដែលរួមមានក្រុមហ៊ុនជីបម៉ុង អ៊ិនស៊ី ស៊ីមេន ខបភើរេសិន, ក្រុមហ៊ុនកំពតស៊ីមេន, ក្រុមហ៊ុនបាត់ដំបង ខនស៍ ស៊ីមេន, ក្រុមហ៊ុនស៊ីម៉ងត៍ចក្រីទីង និងក្រុមហ៊ុនស៊ីម៉ងត៍ ថៃប៊ុនរ៉ុង ខមភេនី លីមីធីត។ ទុនវិនិយោគសរុបរបស់រោងចក្រទាំង ៥ មានជាង ២ ០០០ លានដុល្លារ៕ LA
