ភ្នំពេញៈ អត្រាការប្រើប្រាស់កន្លែងជួលលក់រាយ (Retail) ក្នុងរាជធានីភ្នំពេញនាត្រីមាសទី ១ ឆ្នាំ ២០២២ នៅតែបន្តធ្លាក់ចុះប្រមាណ ០,៤ ភាគរយធៀបនឹងត្រីមាសទី ៤ ឆ្នាំ ២០២១ បើទោះបីការគំរាមកំហែងបណ្តាលមកពីវិបត្តិការឆ្លងរាលដាលជំងឺកូវីដ ១៩ នៅកម្ពុជាបានថយចុះជាបន្តបន្ទាប់ ក្រោយពីរដ្ឋាភិបាលប្រកាសបើកប្រទេសឡើងវិញកាលពីខែវិច្ឆិកា ឆ្នាំ ២០២១ ក៏ដោយ។ នេះបើតាមការស្រាវជ្រាវរបស់ក្រុមហ៊ុន CBRE Cambodia។
របាយការណ៍ស្រាវជ្រាវរបស់ក្រុមហ៊ុនអចលនទ្រព្យ CBRE Cambodia កាលពីពេលថ្មីៗនេះបង្ហាញថា ក្នុងត្រីមាសទី ១ ឆ្នាំ ២០២២ នេះអត្រាប្រើប្រាស់កន្លែងលក់រាយនៅក្នុងរាជធានីភ្នំពេញបានធ្លាក់មកនៅត្រឹម តែ ៦៦,៦ ភាគរយបើធៀបនឹងត្រីមាសទី ៤ ឆ្នាំ ២០២១ ដែលមាន ៦៧ ភាគរយ។ អត្រាប្រើប្រាស់នេះមានចំនួន ៧៤,៩ ភាគរយកាលពីអំឡុងត្រីមាសទី ១ ឆ្នាំ ២០២១ និង ៨៩,៩ ភាគរយ ក្នុងត្រីមាសទី ១ ឆ្នាំ ២០២០។
ការស្រាវជ្រាវរបស់ CBRE Cambodia ក៏បានរកឃើញទៀតថា ក្នុងត្រីមាសទី ១ ឆ្នាំ ២០២២ កន្លែងជួលលក់រាយប្រភេទ Prime Shopping Mall មានតម្លៃដាក់ជួលមធ្យម ២៧ ដុល្លារក្នុង ១ ម៉ែត្រការ៉េសម្រាប់រយៈពេល ១ ខែ ដែលតម្លៃនេះនៅថេរបើធៀបទៅនឹងត្រីមាសទី ៤ ឆ្នាំ ២០២១, ប្រភេទ Prime Retail Podium មានតម្លៃ ២១ ដុល្លារកើនឡើង ៥,៦ ភាគរយ, ប្រភេទ Community Mall មានតម្លៃ ២១ ដុល្លារធ្លាក់ចុះ ១,៦ ភាគរយ, និងប្រភេទ Prime High Street (ហាងលក់ទំនិញតាមផ្លូវធំៗ) មានតម្លៃជួលមធ្យម ២២ ដុល្លារធ្លាក់ចុះ ៦,៨ ភាគរយ។
ដោយឡែកក្នុងអំឡុងពេលខាងលើ គឺមានគម្រោងប្រភេទ Community Mall ចំនួន ៣ បានបញ្ចប់ការសាងសង់ និងដាក់ចូលទីផ្សារ រួមមាន Chip Mong Sen Sok Mall (ខណ្ឌសែនសុខ), Prince Times Square (ចំការមន), និង 60 Avenue (ខណ្ឌមានជ័យ)។
បើយោងតាម CBRE Cambodia កាលពីត្រីមាសទី ១ ឆ្នាំ ២០២២ មានហាងល្បីៗចំនួន ៤៤ បានបើកដំណើរការដោយក្នុងនោះ ៦ ជាម៉ាកយីហោអន្តរជាតិ ដូចជា H&M, Wilsonart និង OVS ជាដើម។
អ្នកនាង គឹម គិនកេសា នាយិកាផ្នែកស្រាវជ្រាវ និងប្រឹក្សាយោបល់ CBRE Cambodia បានប្រាប់ភ្នំពេញប៉ុស្តិ៍កាលពីថ្ងៃទី ២០ ខែមេសាថា នៅក្នុងត្រីមាសទី ១ នេះ ការជួលក្នុងទីផ្សារ Retail មានភាពសកម្មគួរឱ្យកត់សម្គាល់ដោយក្នុងនោះមានម៉ាកយីហោថ្មីៗច្រើនចូលមកកាន់គម្រោង Community Mall ថ្មីៗ និងម៉ាកយីហោចាស់ជាច្រើនបានបើកសាខាបន្ថែមជាបន្តបន្ទាប់។
អ្នកនាង គិនកេសា បានថ្លែងថា៖ «ក្នុងឆ្នាំ ២០២២ នេះយើងអាចនឹងឃើញសកម្មភាពជួលបន្តលូតលាស់បន្ថែមទៀត ក៏ប៉ុន្តែដោយសារមានគម្រោងថ្មីៗជាច្រើនដែលគ្រោងនឹងបើកក្នុងឆ្នាំនេះផងដែរ ដូច្នេះទីផ្សារកន្លែងជួលលក់រាយអាចនឹងមានការប្រកួតប្រជែងកាន់តែខ្លាំងលើតម្លៃជួល និងលក្ខខណ្ឌអនុគ្រោះនានា»។
អ្នកនាងបន្តថា យោងតាមទិន្នន័យពី Google Mobility Tracker ចរាចរណ៍ទៅកាន់ទីផ្សារ និងកន្លែងកម្សាន្តនានារបស់អតិថិជនចាប់តាំងពីដើមត្រីមាសទី ១ ឆ្នាំ ២០២២ មកគឺមានភាពល្អប្រសើរបើធៀបនឹងត្រីមាសទី ៤ ឆ្នាំ ២០២១។ ចំនួននេះបានធ្លាក់ចុះយ៉ាងគំហុកកាលពីអំឡុងខែឧសភាឆ្នាំមុន ដែលបណ្តាលមកពីការបិទខ្ទប់របស់រដ្ឋាភិបាល ដើម្បីទប់ស្កាត់ការឆ្លងរាលដាលកូវីដ ១៩។
ប្រធានសមាគមអចលនទ្រព្យសកល លោក សំ សុខនឿន បាននិយាយថា បច្ចុប្បន្នកន្លែងលក់រាយបានបង្ហាញវត្តមាននៅស្ទើរគ្រប់កន្លែងក្នុងរាជធានីភ្នំពេញ ដែលធ្វើឱ្យចំនួននៃការផ្គត់ផ្គង់លើសតម្រូវការសម្រាប់ប្រជាជនដែលមានប្រមាណជាង ២ លាននាក់។ លោកបន្តថា នៅពេលនេះសូម្បីតែគម្រោងអភិវឌ្ឍន៍បុរីមួយចំនួនក៏មានសង់កន្លែងលក់រាយសម្រាប់ជួលផងដែរ។
លោកបន្ថែមថា ម្យ៉ាងទៀតដោយសារពេលនេះវិបត្តិសេដ្ឋកិច្ចពិភពលោកដែលបណ្តាលមកពីឥទ្ធិពលជំងឺកូវីដ ១៩ និងការកើនឡើងតម្លៃប្រេងឥន្ធនៈ (សង្គ្រាមនៅប្រទេសអ៊ុយក្រែន) នៅបន្តកើតមាន វាក៏បានធ្វើឱ្យការចំណាយរបស់គ្រួសារមួយចំនួនធ្លាក់ចុះផងដែរ។
លោកអះអាងថា៖ «ខ្ញុំគិតថាស្ថានភាពទីផ្សារកន្លែងលក់រាយក្នុងឆ្នាំ ២០២២ នេះនឹងបន្តជួបបញ្ហាដដែល ហើយការផ្គត់ផ្គង់ថ្មីៗក៏នឹងកើនឡើងផងដែរ»។
តាមការព្យាកររបស់ក្រុមហ៊ុន CBRE Cambodia នៅក្នុងឆ្នាំ ២០២២ នេះផ្ទៃក្រឡាកន្លែងជួលលក់រាយក្នុងរាជធានីភ្នំពេញដែលត្រូវដាក់ចូលទីផ្សារនឹងមានចំនួនប្រហែល ៣០០ ០០០ ម៉ែត្រការ៉េ ដែលធ្វើឱ្យផ្ទៃក្រឡាកន្លែងសម្រាប់ជួលលក់រាយកើនឡើងដល់ជាង ៧០០ ០០០ ម៉ែត្រការ៉េ៕ LA