កាសែត ភ្នំពេញ ប៉ុស្តិ៍ ត្រូវបានបង្កើតឡើង កាលពីខែកក្កដា ឆ្នាំ ១៩៩២ ដែលគិតរហូតមកទល់ខែកក្កដា ឆ្នាំ ២០២១ នេះ មានអាយុកាល ២៩ ឆ្នាំហើយ។
ចាប់តាំងពីចាប់ផ្តើមដំណើរការ និងរហូតមកទល់បច្ចុប្បន្ននេះ កាសែត ភ្នំពេញ ប៉ុស្តិ៍ ទាំងភាសាខ្មែរ និងអង់គ្លេស គឺនៅតែឈរនៅលំដាប់កំពូលក្នុងចំណោមប្រព័ន្ធផ្សព្វផ្សាយដ៏សម្បូរបែប នៅក្នុងប្រទេសកម្ពុជា ខាងការផ្តល់ព័ត៌មានពិត សុក្រឹត ឯករាជ្យ មានគុណភាព និងជឿទុកចិត្ត។
ខាងក្រោមនេះ គឺជាទស្សនៈចម្រុះគ្នារបស់មិត្តអ្នកអានដែលរួមមាន អ្នកវិភាគ មន្ត្រីរដ្ឋាភិបាល និងអ្នកមានជំនាញក្នុងវិស័យសារព័ត៌មាន ចំពោះកាសែត ភ្នំពេញ ប៉ុស្តិ៍ ក្នុងឱកាសអបអរសាទរគម្រប់ខួប ២៩ ឆ្នាំ របស់កាសែត ភ្នំពេញ ប៉ុស្តិ៍៖
លោក ប៉ែន បូណា ប្រធានក្លឹបអ្នកកាសែតកម្ពុជា ដែលជាអ្នកតាមដានព័ត៌មានកាសែត ភ្នំពេញ ប៉ុស្តិ៍ តាំងពីកាសែតនេះ បើកដំបូងនិយាយថា៖ «ខ្ញុំពីមុន គឺខ្ញុំតែងតែទទួលបានជាវកាសែតបោះពុម្ព តែឥឡូវមិនសូវបានអានកាសែតបោះពុម្ពនោះប៉ុន្មានទេ គឺយូរៗខ្ញុំទិញកាសែតម្តងដែរ ប៉ុន្តែភាគច្រើនតាមហ្វេសប៊ុកផេករបស់ ភ្នំពេញ ប៉ុស្តិ៍»។
ចំពោះភាពងាយស្រួលទទួលបានព័ត៌មានពី ភ្នំពេញ ប៉ុស្តិ៍ លោក ប៉ែន បូណា បាននិយាយថា៖ «ដូចជាមិនលំបាកអីទេ ដូចតែយើងអានរាល់ដងហ្នឹង គឺយើងអានព័ត៌មានរាល់ថ្ងៃតាម ភ្នំពេញ ប៉ុស្តិ៍ នោះដែរ។ ព័ត៌មានដែលខ្ញុំចូលចិត្តអានពី ភ្នំពេញ ប៉ុស្តិ៍ គឺព័ត៌មានថ្មីៗដែលកើតឡើងក្តៅៗ និងព័ត៌មានសេដ្ឋកិច្ច»។
លោកបញ្ជាក់ថា៖ «និយាយតាមត្រង់ទៅ ឥឡូវនេះ កាសែតមានភាពស្រដៀងៗគ្នាទៅនឹងព័ត៌មានតាមវេបសាយ ហើយបើគិតថា យើងជាកាសែតបោះពុម្ព តែយើងក៏មានពហុប្រព័ន្ធផ្សព្វផ្សាយដែរ។ ប៉ុន្តែបើយើងជាកាសែតបោះពុម្ពផ្សាយ ហើយជាកាសែតភាសាបរទេសទៀត ព័ត៌មានដែលខ្ញុំ មើលទៅប្រហាក់ប្រហែលគ្នាដែរទៅនឹងស្ថាប័នដទៃ។ យ៉ាងណា មានព័ត៌មានខ្លះ ដូចជា ព័ត៌មានសេដ្ឋកិច្ចពី ភ្នំពេញ ប៉ុស្តិ៍ គឺលឿន និងប្លែកពីគេ»។
លោកបន្តថា៖ «តាមយោបល់ខ្ញុំ ភ្នំពេញ ប៉ុស្តិ៍ ទី១ យើងជាកាសែតអង់គ្លេសខ្ញុំចង់ឱ្យ ភ្នំពេញ ប៉ុស្តិ៍ហ្នឹង ក្លាយជាកាសែតមួយ ដែលអាចធ្វើជាឯកសារយោង ដែលឱ្យកាសែតផ្សេងៗក្នុងតំបន់ក្នុងពិភពលោកអាចដកស្រង់ធ្វើជាអំណះអំណាងសម្រាប់ព័ត៌មានរបស់គេ»។
លោកបន្ថែមថា៖ «ខ្ញុំឃើញថា បើអាច ភ្នំពេញ ប៉ុស្តិ៍ គួរតែពង្រឹងកម្រិតគុណភាពរបស់យើងឱ្យខ្ពស់ជាងហ្នឹង។ ឧទាហរណ៍យើងគួរមានអ្នកវិភាគ ដែលមានសមត្ថភាពខាងវិភាគបញ្ហាក្នុងស្រុក បញ្ហាក្នុងតំបន់ និងបញ្ហាធំៗនៅក្នុងពិភពលោក ព្រោះយើងជាកាសែតភាសាបរទេស ដែលមានអ្នកអានជាខ្មែរផង ជាបរទេសផង ដើម្បីផ្តល់ចំណេះដឹងដល់ខ្មែរ និងបរទេសគេចាប់អារម្មណ៍តាមដាន»។
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មានវិទ្យា និងជាអ្នកនាំពាក្យក្រសួងព័ត៌មាន ដែលបានតាមដានព័ត៌មានពី ភ្នំពេញ ប៉ុស្តិ៍ តាំងពីមុនឆ្នាំ ២០០៧ បាននិយាយថា៖ «ខ្ញុំភាគច្រើនទទួលព័ត៌មានពី ភ្នំពេញ ប៉ុស្តិ៍ តាមរយៈប្រព័ន្ធតេឡេក្រាមច្រើនជាង ព្រោះខ្ញុំប្រើប្រាស់វាជាប្រចាំ។ ខ្ញុំត្រូវការផ្ទៀងផ្ទាត់ព័ត៌មានច្រើន ដូច្នេះខ្ញុំតាមដានចំណងជើងនៅលើហ្នឹង ហើយបានមកអានកាសែត ដែលតែងតែមាននៅលើតុធ្វើការរបស់ខ្ញុំជារៀងរាល់ព្រឹក»។
លោកបន្តថា៖ «ចំពោះភាពងាយស្រួលវិញ សម្រាប់ខ្ញុំគឺស្រួលហើយ ព្រោះខ្ញុំចូលចិត្តតាមដានព័ត៌មានចម្រុះ ដូច្នេះឱ្យតែព័ត៌មាន ខ្ញុំតែងតែអាន ហើយជ្រើសរើសព័ត៌មានចាំបាច់ដែលអាចយកមកប្រើការបាន។ ខ្ញុំនៅតែត្រូវការការបោះពុម្ពកាសែតតាមរយៈសន្លឹកក្រដាសដដែល ដោយសារតែខ្ញុំមានអត្ថបទកាសែតនេះ មកដល់លើតុខ្ញុំ ហើយខ្ញុំត្រូវមើលឡើងវិញកន្លែងខ្លះ ព្រោះតែអត្ថបទច្រើនពេកនៅលើប្រព័ន្ធអ៊ីនធឺណិត»។
ចំពោះប្រធានបទ ឬប្រភេទព័ត៌មានដែល ភ្នំពេញ ប៉ុស្តិ៍ មិនទាន់បានផ្សាយ ហើយចង់ឱ្យមានផ្សព្វផ្សាយ លោក ផុស សុវណ្ណ បាននិយាយថា៖ «មិនមែនតែខ្ញុំទេ សូម្បីឯកឧត្តមរដ្ឋមន្ត្រីក្រសួងព័ត៌មានក៏ចង់ឃើញ ហើយតាមពិត ភ្នំពេញ ប៉ុស្តិ៍ បានធ្វើច្រើនហើយលើទំព័រអ្នកថ្មី។ ប៉ុន្តែយើងចង់ឱ្យមានទំព័រមួយដែលវាល្អ សម្រាប់អ្នកខ្លាំងអ្នកដែលពូកែផ្នែកណាមួយគួរតែមានរំលេចទុកលើទំព័រកាសែតទៅ។ បានន័យថា ទំព័រ ១ ហ្នឹង បង្ហាញគាត់ថា គាត់ខ្លាំងអីគេគ្រូបង្រៀនល្អ មេឃុំល្អ ចៅហ្វាយខេត្តល្អ កម្មករល្អ ឱ្យក្លាយទៅជាទំព័រគំរូមួយ ហើយចំណុចហ្នឹង គឺត្រូវមានលើទំព័រកាសែតហ្នឹងជាប្រចាំតែម្តង ដែលយើងចូលចិត្តដឹងតែម្តង»។
លោក ប៉ា ចន្ទរឿន ជាប្រធានវិទ្យាស្ថានប្រជាធិបតេយ្យកម្ពុជា ដែលតែងតែអាន ភ្នំពេញ ប៉ុស្តិ៍ ជាប្រចាំ ហើយក៏ជាអ្នកផ្តល់បទសម្ភាសឱ្យ ភ្នំពេញ ប៉ុស្តិ៍ ជាញឹកញាប់ផងនោះបានថ្លែងថា លោកតែងតែអានព័ត៌មានពីកាសែត ភ្នំពេញ ប៉ុស្តិ៍ តាមរយៈប្រព័ន្ធផ្សព្វផ្សាយចម្រុះមិនថាជាលក្ខណៈកាសែត វេបសាយ តេឡេក្រាម ឬហ្វេសប៊ុកនោះទេ ព្រោះ ភ្នំពេញ ប៉ុស្តិ៍ មានទាំងភាសាខ្មែរ និងអង់គ្លេស ដែលអាចទទួលបានព័ត៌មានទាំងក្នុង និងក្រៅប្រទេស។
លោកបញ្ជាក់ថា៖ «ខ្ញុំបានអានកាសែត ភ្នំពេញ ប៉ុស្តិ៍ តាំងពីខ្ញុំ រៀនថ្នាក់បរិញ្ញាបត្រ ប៉ុន្តែកាលនោះមិនបានទិញផ្ទាល់ទេ គឺទៅចូលអាននៅការិយាល័យរបស់សាលា។ កាលនោះ គឺយូរហើយ ព្រោះអ៊ីនធឺណិតយើងមិនទាន់សម្បូរបែបដូចសព្វថ្ងៃ គឺមានតែអាន ភ្នំពេញ ប៉ុស្តិ៍ ជាកាសែត»។
លោកបាននិយាយបន្តថា៖ «ខ្ញុំតែងតែអានព័ត៌មានសេដ្ឋកិច្ច សង្គម វប្បធម៌ នយោបាយ ការអប់រំ ដែលត្រូវនឹងជំនាញខ្ញុំហ្នឹង។ ខ្ញុំពេញចិត្តនឹងជំហររបស់ ភ្នំពេញ ប៉ុស្តិ៍ ទោះបីជាមានការផ្លាស់ប្តូរ ម្ចាស់ ឬក៏នយោបាយយើងក៏ដោយក៏ ភ្នំពេញ ប៉ុស្តិ៍ នៅតែមានជំហរអព្យាក្រឹតច្រើន បើប្រៀបធៀបនឹងកាសែតដទៃទៀតនៅក្នុងព្រះរាជាណាចក្រកម្ពុជា។ ខ្ញុំសង្ឃឹមថា ភ្នំពេញ ប៉ុស្តិ៍ នឹងប្រកាន់ជំហរជាកាសែតឯករាជ្យ ហើយរក្សាគោលជំហររបស់ខ្លួនជាស្ថាប័នព័ត៌មានពិតប្រាកដមួយក្នុងការផ្តល់ព័ត៌មានពិត ដល់ពលរដ្ឋ និងភាគីពាក់ព័ន្ធ»។
បន្ថែមពីនេះលោក ប៉ា ច័ន្ទរឿន ក៏ចង់ឃើញកាសែត ភ្នំពេញ ប៉ុស្តិ៍ បញ្ចូលអត្ថបទព័ត៌មានខ្លះ ទាក់ទងនឹងវប្បធម៌ និងសីលធម៌ សង្គម ឬក៏គំរូល្អមួយចំនួន ដែលមាននៅក្នុងសង្គមយើង ដើម្បីជាទុនសម្រាប់ប្រជាពលរដ្ឋយកជាគតិ ឬជាគំរូ ក្នុងការបង្ហាញពីទិដ្ឋភាពវិជ្ជមាននៃសង្គមខ្មែរ។
លោក ព្រុំ សុខា រដ្ឋមន្ត្រីក្រសួងមុខងារសាធារណៈ និងជាប្រិយមិត្តរបស់កាសែត ភ្នំពេញ ប៉ុស្តិ៍ ចាប់តាំងពីកាសែតនេះ ចាប់កំណើតឡើងដំបូង បានស្វាគមន៍ចំពោះការបន្តប្រតិបត្តិការរបស់កាសែត ភ្នំពេញ ប៉ុស្តិ៍ និងសង្ឃឹមថា កាសែតនេះនឹងបន្តការផ្សព្វផ្សាយព័ត៌មានក្នុងការចូលរួមចំណែកដល់ការអភិវឌ្ឍកម្ពុជា។
លោកបន្តថា៖ «ព័ត៌មានដែលផ្សាយចេញដោយកាសែត ភ្នំពេញ ប៉ុស្តិ៍ គឺជាព័ត៌មានដែលអាចឱ្យអ្នកអានយកមកប្រើប្រាស់បាន និងមានប្រភពច្បាស់ៗក្នុងព័ត៌មាននីមួយៗ។ ភ្នំពេញ ប៉ុស្តិ៍ ដែលបានឈរជើងដល់សព្វថ្ងៃ គឺមានន័យថា បានចូលរួមដល់ដំណើរការលទ្ធិប្រជាធិបតេយ្យនៅកម្ពុជាសម្រាប់បម្រើឱ្យអ្នកអានក្នុងការពង្រីកព័ត៌មានចម្រុះ»។
ជាមួយនឹងការបន្តគាំទ្រនេះ លោក ព្រុំ សុខា បានបញ្ជាក់ថា៖ «ខ្ញុំនៅតែទទួលបានព័ត៌មានយ៉ាងសម្បូរបែបពីកាសែត ភ្នំពេញ ប៉ុស្តិ៍ មិនថា ជាកាសែតបោះពុម្ព ឬតាមប្រព័ន្ធផ្សព្វផ្សាយនានា របស់ស្ថាប័ន ភ្នំពេញ ប៉ុស្តិ៍ នោះទេ ខ្ញុំទទួលបានគ្រប់ទាំងអស់។ ខ្ញុំចាត់ទុកថា កាសែតបោះពុម្ព គឺនៅតែមានសារប្រយោជន៍ ហើយខ្ញុំគាំទ្រដល់ការផ្សព្វផ្សាយជាភាសាខ្មែរ សម្រាប់ពលរដ្ឋខ្មែរ ដែលកាលពីមុន យើងមានតែភាសាបរទេសទេ ដូច្នេះសម្រាប់អ្នកចេះភាសាអង់គ្លេសបានតិច គាត់អាចតាមដានអានតាមភាសាខ្មែរបានដែរ»៕