ក្រុងប៉ារីស៖ ក្រុមជម្រើសជាតិវេលស៍ នាំគ្នាអបអរយ៉ាងរីករាយដែលបានឆ្លងទៅវគ្គ ១៦ ក្រុមចុងក្រោយ នៅក្នុង Euro 2020 ទោះចាញ់ក្រុមម្ចាស់ផ្ទះអ៊ីតាលី ១-០ អំឡុងការប្រកួតចុងក្រោយក្នុងពូល A នាទីក្រុងរ៉ូម កាលពីថ្ងៃអាទិត្យក៏ដោយ ស្របពេលក្រុមស្វ៊ីសត្រូវរង់ចាំសិនមុននឹងដឹងថា តើពួកគេអាចបានឆ្លងទៅវគ្គបន្ត ឬអត់?
ខ្សែប្រយុទ្ធឆ្នើម Gareth Bale និងមិត្តរួមក្រុមវេលស៍បានប្រកួតចាញ់ ១-០ ដោយសារក្រុមអ៊ីតាលី ដែលបានបង្ហាញទម្រង់លេងដ៏គួរឱ្យទាក់ទាញនៅឯកីឡដ្ឋានអូឡាំពិក ហើយគ្រាប់បាល់តែ ១ គ្រាប់នោះ ស៊ុតបញ្ចូលទីដោយខ្សែបម្រើ Matteo Pessina។
ក្រុមវេលស៍ ដែលបាត់បង់សមាជិកម្នាក់ ដោយខ្សែការពារ Ethan Ampadu ទទួលបានកាតក្រហមនៅនាទីទី៥៥ មិនអាចតាមស្មើបានឡើយ តែលទ្ធផលនេះ គ្រប់គ្រាន់ឱ្យពួកគេឈរនៅចំណាត់ថ្នាក់លេខ ២ ក្នុងពូល A ជាមួយនឹងគ្រាប់បាល់ចំណេញលើសក្រុមស្វ៊ីស ដែលយកឈ្នះក្រុមតួកគី ៣-១ ពីការប្រកួតនៅឯក្រុងបាគូ។
កីឡាករ Bale និយាយប្រាប់ប្រព័ន្ធផ្សព្វផ្សាយ ITV នៅចក្រភពអង់គ្លេសថា៖ «យើងចង់ឈ្នះជាពិសេស តែរឿងសំខាន់ គឺថា យើងបញ្ចប់នៅលេខ ២។ ឥឡូវនេះ យើងមានពេលសម្រាកតិចតួច ដូច្នេះ យើងអាចពង្រឹងសមត្ថភាពទាំងអស់គ្នាឡើងវិញ ហើយចាប់ផ្ដើមសាជាថ្មីម្ដងទៀត»។
ក្រុមវេលស៍ ដែលឡើងដល់វគ្គ ៤ ក្រុមចុងក្រោយ នៅ Euro 2016 នឹងត្រូវលេងក្នុងវគ្គ ១៦ ក្រុម នៅឯទីក្រុងអាំស្តែរដាំ នៅហូឡង់ នាថ្ងៃសៅរ៍នេះ ដោយប្រឈមជាមួយក្រុមលេខ ២ ក្នុងពូល B ដែលអាចជារុស្ស៊ី ដាណឺម៉ាក ឬក៏ហ្វាំងឡង់។
សម្រាប់ក្រុមអ៊ីតាលី ឥឡូវនេះ មិនទាន់ស្គាល់ពាក្យថា ចាញ់ចំនួន ៣០ ការប្រកួតហើយ ហើយជាពិសេសនោះ ឈ្នះ ១១ ហ្គេមបន្តបន្ទាប់គ្នា ជាមួយនឹងការបិទមិនឱ្យគេស៊ុតបញ្ចូលទីសូម្បីតែ ១ គ្រាប់។
«ពួកយើងមិនមានអារម្មណ៍ថា មានសម្ពាធណាមួយឡើយ ដោយពួកយើងត្រឹមតែរីករាយក្នុងការលេង និងធ្វើការបង្ហាញពីជាតិរបស់យើង»។ នេះជាសម្ដីរបស់ខ្សែបម្រើ Marco Verratti ក្នុងក្រុមអ៊ីតាលី។
ជ័យជម្នះចុងក្រោយនេះ នៅតែកើតមាន ទោះបីជាគ្រូបង្វឹកលោក Roberto Mancini ធ្វើការផ្លាស់ប្ដូរកីឡាករជម្រើសដំបូងដល់ទៅ ៨ រូប ហើយអ៊ីតាលី នឹងត្រូវជួបជាមួយក្រុមមួយ បើមិនអ៊ុយក្រែន ឬក៏អូទ្រីស នៅក្រុងឡុងដ៍ ក្នុងវគ្គ ១៦ ក្រុម។
ចំណែកក្រុមស្វ៊ីស ត្រូវប្រឈមនឹងការរង់ចាំដ៏អន្ទះអន្ទែង ដើម្បីបានដឹងថា តើពួកគេនឹងបានឆ្លងទៅជុំបន្ទាប់ ក្នុងនាមជាក្រុមលេខ ៣ ល្អបំផុត ឬអត់? តែពួកគេកំពុងមានឱកាសយ៉ាងរឹងមាំល្អ ក្រោយ Xherdan Shaqiri បានដើរតួយ៉ាងសំខាន់ក្នុងការជួយឱ្យមានជ័យជម្នះលើតួកគី ជាមួយនឹងការស៊ុតបញ្ចូលទី ២ គ្រាប់ម្នាក់ឯង សម្រាប់ការប្រកួតនៅក្រុងបាគូ។
ក្រុមតួកគីត្រូវត្រឡប់ទៅផ្ទះវិញ ដោយមិនមានសូម្បី ១ ពិន្ទុ ហើយនឹងទទួលយកនូវការខកចិត្តដ៏ធំមួយពីការប្រកួតប្រជែងជើងឯកអឺរ៉ុបនេះ។
ជាមួយគ្នានេះដែរ សហព័ន្ធបាល់ទាត់អឺរ៉ុប (UEFA) បានឱ្យដឹងកាលពីថ្ងៃអាទិត្យថា ស្ថាប័នកំពុងបើកការស៊ើបអង្កេតចំពោះបដាដែលត្រូវបានចោទប្រកាន់ថា មានការរើសអើងភេទទី៣ និងការធ្វើសំឡេងបែបសត្វស្វា អំឡុងការប្រកួត ២ លើក នៅឯកីឡដ្ឋាន Puskas Arena នាក្រុងប៊ុយដាប៉ែស ដែលក្រុមហុងគ្រីចាញ់ព័រទុយហ្គាល់ ៣-០ កាលពីថ្ងៃអង្គារ និងស្មើបារាំង ១-១ កាលពីថ្ងៃសៅរ៍៕ AFP/VN