ក្រុមខេត្តកំពង់ស្ពឺ បានព្យាយាមរារាំងកីឡាកររបស់ក្រុមភ្នំពេញហ្គាឡាក់ស៊ី នៅក្នុងការប្រកួតជម្រុះតាមពូល កន្លងមក។ រូបថត CNCC
.jpg)
ភ្នំពេញ៖ ការប្រកួតថ្នាក់ខេត្ត ពានរង្វាន់សម្តេច ហ៊ុន សែន ឆ្នាំ ២០២១ ដែលបានផ្អាកការប្រកួត ដោយសារការរីករាលនៃជំងឺកូវីដ ១៩ តាំងពីដើមខែមេសា មកនោះ ត្រូវបានគណៈកម្មការប្រកួតបាល់ទាត់កម្ពុជា (CNCC) នឹងភាគីពាក់ព័ន្ធ ឯកភាពគ្នាឱ្យចាប់ដំណើរការប្រកួតឡើងវិញ នៅដើមខែសីហា ខាងមុខនេះ ដើម្បីឈានទៅរកក្រុមឈ្នះតំណែងជើងឯក ទៅតាមការកំណត់។
យ៉ាងណាក៏ដោយ សម្រាប់ការប្រកួតឡើងវិញនេះ គឺមានតែក្រុមចំនួន ១០ ប៉ុណ្ណោះ ដែលបានស្ម័គ្រចិត្តចូលរួមបន្ត ក្នុងនោះមានក្រុមសៀមរាបអេហ្វស៊ី កោះកុងអេហ្វស៊ី ភ្នំពេញហ្គាឡាក់ស៊ី ខេត្តកំពង់ឆ្នាំង ខេត្តបាត់ដំបង ខេត្តបន្ទាយមានជ័យ ខេត្តឧត្តរមានជ័យ ខេត្តកណ្ដាល ខេត្តកំពត និងក្រុមខេត្តត្បូងឃ្មុំ។
ចំណែកក្រុមចំនួន ១១ ទៀត រួមមានក្រុមខេត្តកំពង់ស្ពឺ ខេត្តតាកែវ ខេត្តកំពង់ចាម ខេត្តស្វាយរៀង សូហ្វីយ៉ាប៉ៃលិន ខេត្តពោធិ៍សាត់ ខេត្តកែប ខេត្តព្រះសីហនុ ខេត្តកំពង់ធំ ខេត្តរតនគិរី និងខេត្តព្រះវិហារ បានសម្រេចចិត្តបង់ចោលការប្រកួតនេះតែម្តង ដោយសារស្ថានភាពការរីករាលជំងឺកូវីដ នៅតាមតំបន់របស់ក្រុមទាំងនោះ នៅតែជាហានិភ័យខ្ពស់ មិនអាចរៀបចំការប្រកួតបាន។
ជុំវិញបញ្ហានេះ លោក រុន វិទូ ជាគណៈកម្មការប្រកួតនេះ បានប្រាប់ភ្នំពេញប៉ុស្តិ៍ កាលពីព្រឹកថ្ងៃព្រហស្បតិ៍ថា៖ «សម្រាប់គម្រោងដាក់ឱ្យមានការប្រកួតឡើងវិញ នៃពានរង្វាន់សម្តេចនេះ ខាងគណៈកម្មការរបស់ CNCC បានធ្វើការសាកសួរទៅកាន់ក្រុមទាំង ២១ ដែលបានចូលរួមប្រកួតជម្រុះតាមពូលទាំង ៦ ប៉ុន្តែយើងទទួលបានមកវិញ គឺមានតែក្រុមចំនួន ១០ ទេ ដែលសុំឱ្យមានការប្រកួតបន្ត ចំណែកក្រុមចំនួន ១១ ទៀត បានសម្រេចមិនចូលរួមការប្រកួតឡើយ ដោយសារតែមានបញ្ហាលើវិបត្តិជំងឺកូវីដ១៩»។
លោក រុន វិទូ ពេលពន្យល់ពីលក្ខខណ្ឌ និងរូបមន្តនៃការប្រកួតថ្មី ទៅដល់តំណាងក្រុមទាំង១០ ដែលបានចូលរួមប្រជុំ តាមអនឡាញ កាលពីថ្ងៃពុធ។ រូបថត CNCC
លោក រុន វិទូ បានបន្ថែមថា៖ «ជាមួយការដកខ្លួនរបស់ក្រុមទាំង ១១ នោះ យើងក៏បានឯកភាព កែប្រែលក្ខខណ្ឌ និងរូបមន្តនៃការប្រកួត ដោយយើងកំណត់យកក្រុមលេខ១ នៅតាមពូលនីមួយៗ ឡើងទៅវគ្គ ៨ ក្រុម ដោយស្វ័យប្រវត្តិតែម្តង ចំណែកពូលខ្លះ ដែលនៅសល់តែមួយក្រុមនោះ ក៏យើងសម្រេចយកក្រុមនោះ ឡើងទៅវគ្គបន្តផងដែរ រីឯក្រុមលេខ ២ នៅតាមពូលនីមួយៗ ត្រូវប្រកួតខ្វែង ដើម្បីយកក្រុមឈ្នះ ចំនួន ២ ក្រុម ទៅបំពេញបន្ថែម នៅក្នុងវគ្គ ១/៤ ផ្តាច់ព្រ័ត្រ»។
តាមរយៈការបោះបង់របស់ក្រុមចំនួន ១១ ខាងលើនេះ គឺបានធ្វើឱ្យពូល ក នៅសល់តែក្រុមភ្នំពេញហ្គាឡាក់ស៊ី និងក្រុមខេត្តកំពង់ឆ្នាំង រីឯពូល ខ នៅសល់ក្រុមខេត្តបន្ទាយមានជ័យ និងខេត្តបាត់ដំបង ខណៈពូល គ សល់ក្រុមសៀមរាបអេហ្វស៊ី និងក្រុមខេត្តឧត្តរមានជ័យ ហើយពូល ង សល់ក្រុមកោះកុងអេហ្វស៊ី និងក្រុមខេត្តកំពត ប៉ុន្តែពូល ឃ និងពូល ច នៅសល់ ១ ក្រុមដូចគ្នា គឺក្រុមខេត្តកណ្តាល និងក្រុមខេត្តត្បូងឃ្មុំ។
ហេតុនេះក្រុមខេត្តកណ្តាល មកពីពូល ឃ និងក្រុមខេត្តត្បូងឃ្មុំ មកពីពូល ច ត្រូវឡើងទៅឈរចាំនៅវគ្គ ៨ ក្រុម ដោយស្វ័យប្រវត្តិ ចំណែកក្រុមកោះកុងអេហ្វស៊ី និងក្រុមខេត្តបន្ទាយមានជ័យ ក៏បានឡើងទៅវគ្គបន្តដោយស្វ័យប្រវត្តិដែរ ក្នុងនាមជាក្រុមលេខ១ ប្រចាំពូល ខ និងពូល ង ចំណែកក្រុមខេត្តបាត់ដំបង និងខេត្តកំពត ដែលទទួលបានលេខ ២ នៅក្នុងពូលទាំង ២ នេះ ត្រូវរង់ចាំការប្រកួតចុងក្រោយរវាងក្រុមទាំង ៤ ដែលឈរនៅពូល ក និងពូល គ។
សម្រាប់ការប្រកួតដណ្តើមយកលេខ ១ និងលេខ ២ រវាងក្រុមទាំង ៤ ឈរនៅពូល ក និងពូល គ នេះ នឹងត្រូវធ្វើឡើង នៅថ្ងៃទី៣ ខែសីហា ខាងមុខនេះ ដោយក្រុមឈ្នះ បានលេខ ១ នឹងឡើងទៅវគ្គ៨ក្រុម ចំណែកក្រុមចាញ់ បានលេខ២ ត្រូវប្រកួតខ្វែងជាមួយក្រុមលេខ ២ ខេត្តបាត់ដំបង និងខេត្តកំពត ហើយក្រុមឈ្នះ ត្រូវឡើងទៅប្រកួតវគ្គ ៨ ក្រុម ជាមួយក្រុម ដែលកំពុងឈរចាំ៕
