ភ្នំុំពេញ៖ អ្នកប្រដាល់ឆ្នើមជួរមុខ ឡៅ ចន្ទ្រា របស់ក្លិបបញ្ជាការដ្ឋានទ័ពពិសេស ត្រូវបានគណៈកម្មការរៀបចំការប្រកួតប្រចាំសង្វៀន CNC ដាក់ឱ្យប្រកួតដណ្តើមប្រាក់លាន ជាមួយជើងខ្លាំង ធឿន ធារ៉ា របស់សមាគមកីឡាប្រដាល់ក្រសួងកសិកម្ម ក្នុងទម្ងន់ ៧១ គីឡូក្រាម នាល្ងាចថ្ងៃសៅរ៍នេះ ខណៈអ្នកទាំង២នេះ សុទ្ធតែទើបត្រូវបាន ថៃ រិទ្ធី វ៉ៃឱ្យសន្លប់ធំ នៅក្នុងទឹកទី ៣ ដូចគ្នា។
ជាមួយនឹងប្រវត្តិប្រកួតជាង ១០០ ដង ឡៅ ចន្ទ្រា ជាជើងខ្លាំង ដែលធ្លាប់ឈ្នះបានខ្សែក្រវាត់ចំនួន ៣ ស្ថាប័ន គឺខ្សែក្រវាត់ខារ៉ាបាវ នៅសង្វៀនបាយ័ន ខ្សែក្រវាត់ស្រាបៀរលីអូ នៅសង្វៀន CNC និងខ្សែក្រវាត់ ISI Palm នៅសង្វៀន PNN ខណៈកន្លងមកនេះ ចន្ទ្រា សឹងរកគូប្រកួតខ្មែរគ្នាឯងមិនបាន។
យ៉ាងណាក៏ដោយ កាល ៣ សប្កាហ៍មុន ឡៅ ចន្ទ្រា បានចាញ់សន្លប់ធំ ក្រោមកណ្តាប់ដៃ ថៃ រិទ្ធី បន្ទាប់មកបានមកស្មើពិន្ទុជាមួយជើងថ្មី ឈឿង ល្វៃ ខណៈជំនួបកន្លងមក ឈឿង ល្វៃ ធ្លាប់ចាញ់ ចន្ទ្រា រាប់ភ្លេច។ លទ្ធផលនេះ ត្រូវបានគេមើលឃើញថា ចន្ទ្រា មានកម្រិតវិជ្ជាគុនធ្លាក់ចុះជាងមុនឆ្ងាយណាស់។
ចំណែកលោក ឡៅ ស៊ីណាត ជាគ្រូបង្វឹកជំនួយ និងជាបងបង្កើតរបស់ ឡៅ ចន្ទ្រា បានទទួលស្គាល់ថា ប្អូនរបស់ខ្លួន ពិតជាមានវិជ្ជាគុនធ្លាក់ចុះមែន។ ឡៅ ស៊ីណាត បាននិយាយថា៖ «ពីរប្រកួតចុងក្រោយនេះ ចន្ទ្រា វាធ្លាក់ចុះខ្លាំងមែន និយាយទៅខ្សោយកម្លាំង។ ទោះបីខំហាត់បានល្អ តែឡើងប្រកួត ធ្វើមិនបានល្អដូចចិត្ត»។
អតីតជើងខ្លាំង ឡៅ ស៊ីណាត បានបន្ថែមថា៖ «នៅក្នុងការប្រកួតជាង ១០០ ដង ដោយមានប្រវត្តិចារទុក គឺខ្ញុំមិនដែលឃើញកីឡាករខ្មែរណា វ៉ៃឱ្យ ឡៅ ចន្ទ្រា សន្លប់ដូចពេលជួប ថៃ រិទ្ធី នោះទេ។ ចំណែកការជួប ធឿន ធារ៉ា លើកនេះ ក៏មិនមែនស្រួលប្រកួតនោះដែរ គឺខ្ញុំមិនហ៊ានអះអាងពីលទ្ធផលឈ្នះមុនទេ ព្រោះគេជាកីឡាករល្អមួយរូប ហេតុនេះខ្ញុំរំពឹងត្រឹម ៦០ ភាគរយប៉ុណ្ណោះ»។
ចំណែកកីឡាករ ធ្លាប់ប្រកួតបាន ១២០ ដង ឈ្នះ ១០៥ ចាញ់ ១៣ និងស្មើ ២ ដង ឡៅ ចន្ទ្រា បាននិយាយថា៖ «ការប្រកួតនេះ ខ្ញុំមិនហ៊ាននិយាយទេ តែខ្ញុំធានាវ៉ៃអស់ពីសមត្ថភាព នឹងចង់ឈ្នះ ដើម្បីស្តាមុខមាត់មកវិញ។ ខ្ញុំហាត់បានល្អ ត្រៀមប្រកួតនេះយកឈ្នះ តែមិនហ៊ានទាយមុនទេ»។
តាមប្រវត្តិរវាង ឡៅ ចន្ទ្រា និង ធឿន ធារ៉ា ធ្លាប់ប្រកួតគ្នាម្ដង កាលពីពាក់កណ្ដាលឆ្នាំ២០២០ ដោយកាលនោះ ឡៅ ចន្ទ្រា បានឈ្នះត្រឹមតែឈ្នះពិន្ទុទាំងប្រផិតប្រផើយបំផុត។ ចំណែកការជួបគ្នាលើកនេះ ធឿន ធារ៉ា បាននិយាយខ្លីថា៖ «ខ្ញុំកំពុងហាត់ត្រៀមប្រកួតនេះឱ្យបានល្អ។ ខ្ញុំសង្ឃឹមឈ្នះ៧០ភាគរយ ប៉ុន្តែចាំមើលជាក់ស្តែងទៅ»។
តាមប្រវត្តិ ធឿន ធារ៉ា កន្លងមក លំបាករកដៃគូណាស់ គឺមានតែ រឿង សោភ័ណ្ឌ និង ឡុង សុភី អាចទប់ទល់បាន ដោយគេមានជំនាញជង្គង់ល្អ និងមានបទពិសោធប្រកួតនៅប្រទេសថៃញឹកញាប់ ហើយបញ្ហាធ្លាក់ចុះមួយរយៈកន្លងមក គឺដោយសារមានប្រពន្ធ និងជាប់រវល់មើលថែទាំកូន ដ្បិតអីប្រពន្ធធ្វើការជាកម្មការិនីរោងចក្រ ខណៈកាលពីពេលថ្មីៗនេះ ធឿន ធារ៉ា ត្រូវបាន ថៃ រិទ្ធី វ៉ៃឱ្យសន្លប់ ជាមួយការបែកពេញផ្ទៃមុខ។
យ៉ាងណាក៏ដោយ ប្រភពពីមហាជននិយមតាមដានការប្រកួតរបស់ ឡៅ ចន្ទ្រា និង ធឿន ធារ៉ា គឺពួកគាត់ភាគច្រើន មានជំនឿចិត្តខ្លាំងទៅលើ ធឿន ធារ៉ា ថា ជាអ្នកមានភាគរយខ្ពស់ជាង ក្នុងការដណ្តើមយកប្រាក់លាន ពីកម្មវិធីប្រដាល់គោជល់ នៅលើសង្វៀន CNC នាថ្ងៃសៅរ៍នេះ៕