ក្រុងប៉ារីស៖ សហព័ន្ធបាល់ទាត់ពិភពលោក (FIFA) បានធ្វើការអញ្ជើញសហព័ន្ធបាល់ទាត់ជាតិនីមួយៗ ឱ្យចូលរួមប្រជុំតាមអនឡាញ នៅថ្ងៃទី ៣០ ខែកញ្ញានេះ ដើម្បីពិភាក្សាពីកាលវិភាគប្រកួតរបស់ក្រុមជម្រើសជាតិ ដែលជាកិច្ចប្រឹងប្រែង ក្នុងការជំរុញឱ្យមានការរៀបចំព្រឹត្តិការណ៍ World Cup ដែលធ្លាប់កើតឡើងរៀងរាល់ ៤ ឆ្នាំម្ដង ឱ្យមកត្រឹម ២ ឆ្នាំម្ដងវិញ។
ស្ថាប័នគ្រប់គ្រងបាល់ទាត់ពិភពលោកមួយនេះ ចង់បើកឱ្យមានដំណាក់កាលពិភាក្សាគ្នាជាថ្មី ចំពោះកាលវិភាគប្រកួតអន្តរជាតិទាំងផ្នែកបុរស និងនារី ដែលនឹងត្រូវផុតនៅចុងឆ្នាំ ២០២៣ និង ២០២៤ តាមលំដាប់លំដោយ។
ក្នុងសេចក្ដីប្រកាសរបស់ខ្លួន កាលពីថ្ងៃចន្ទ FIFA បានឱ្យដឹងថា៖ «មានការយល់ស្របយ៉ាងទូលំទូលាយ ក្នុងរង្វង់អ្នករៀបចំហ្គេមថា កាលវិភាគប្រកួតអន្តរជាតិ គួរតែត្រូវបានកែប្រែ និងធ្វើឱ្យប្រសើរឡើង។ បន្ទាប់ពីមានការអញ្ជើញ ចំពោះអ្នកពាក់ព័ន្ធទាំងអស់ ក្នុងនោះរួមទាំងសហព័ន្ធនានាផងដែរ កាលពីដើមខែកញ្ញានេះ កិច្ចពិភាក្សានឹងត្រូវបានរៀបចំឡើង ក្នុងប៉ុន្មានសប្ដាហ៍ខាងមុខនេះ»។
«FIFA ក៏បានអញ្ជើញផងដែរ នូវសមាគមជាសមាជិករបស់ខ្លួន ឱ្យចូលរួមការប្រជុំតាមអនឡាញលើកទី១ នេះ នៅថ្ងៃទី ៣០ ខែ កញ្ញា ឆ្នាំ ២០២១។ នេះជាឱកាស ១ ក្នុងចំណោមឱកាសជាច្រើន ក្នុងការបង្កើតឱ្យមានការជជែកដេញដោលជាវិជ្ជមាន និងបើកទូលាយ ទាំងនៅកម្រិតតំបន់ និងពិភពលោក នាប៉ុន្មានខែខាងមុខនេះ»។ FIFA ឱ្យដឹងបន្ថែម ក្នុងសេចក្ដីប្រកាសព័ត៌មានរបស់ខ្លួន។
សំណើដ៏ចម្រូងចម្រាស់ ក្នុងការឱ្យមានការរៀបចំ World Cup ២ ឆ្នាំម្ដង ត្រូវបានសើរើឡើងវិញ ដោយអតីតអ្នកចាត់ការក្រុមកាំភ្លើងធំ Arsenal លោក Arsene Wenger ដែលបច្ចុប្បន្ន មានតួនាទីជាប្រធានក្រុមអភិវឌ្ឍន៍កីឡាបាល់ទាត់ទូទាំងពិភពលោករបស់ FIFA។
គំនិតនេះ នឹងធ្វើឱ្យមានការប្រកួតបាល់ទាត់ជាអន្តរជាតិរៀងរាល់ឆ្នាំ ចាប់ពីឆ្នាំ ២០២៥-២០២៦ តទៅ ដោយឆ្លាស់គ្នារវាងព្រឹត្តិការណ៍ World Cup និងកម្មវិធីប្រកួតប្រចាំតំបន់ផ្សេងទៀត ដូចជាជើងឯកទ្វីបអឺរ៉ុប (European Championship) និងជើងឯកទ្វីបអាមេរិកឡាទីន (Copa America) ជាដើម។
ប្រធានសហព័ន្ធបាល់ទាត់អឺរ៉ុប (UEFA) លោក Aleksander Ceferin ជំទាស់ទាំងស្រុង ចំពោះការស្នើនេះ ហើយព្រមានថា ក្រុមជម្រើសជាតិ នៅអឺរ៉ុប នឹងធ្វើពហិការចំពោះការរៀបចំ World Cup ២ឆ្នាំម្ដងនេះ ខណៈដែលសហព័ន្ធបាល់ទាត់អាមេរិកឡាទីន (CONMEBOL) បានលើកឡើងថា គម្រោងការនេះ មិនមានភាពយុត្តិធម៌ សម្រាប់ការប្រកួតប្រជែងកីឡាឡើយ។
ជាមួយគ្នានេះ ប្រធាន FIFA លោក Gianni Infantino បានធ្វើការសន្យាថា ការសម្រេចចំពោះការរៀបចំព្រឹត្តិការណ៍ World Cup រៀងរាល់ ២ ឆ្នាំម្ដងនេះ នឹងត្រូវធ្វើឡើងនៅចុងឆ្នាំនេះ៕ AFP/VN