ក្រុងឡុងដ៍: ខ្សែការពារស្លាប Marcos Alonso របស់ក្រុមតោខៀវ Chelsea នឹងលែងធ្វើការលុតជង្គង់ម្ខាង នៅមុនការប្រកួតរបស់ក្របខ័ណ្ឌ Premier League ទៀតហើយ ខណៈដែលគេមានការជឿជាក់ថា រូបភាពប្រឆាំងនឹងការរើសអើងជាតិសាសន៍ពណ៌សម្បុរ កំពុងបាត់បង់កម្លាំងបន្តិចហើយ។
កីឡាករទាំងអស់ បានធ្វើការលុតជង្គង់ម្ខាង នៅមុនការប្រកួត នៅ Premier League ចាប់តាំងពីខែមិថុនា ឆ្នាំ ២០២០ មក ក្នុងគោលបំណង ពង្រឹងសាមគ្គីភាពជាមួយនឹងចលនា «Black Lives Matter» (ជីវិតជនស្បែកខ្មៅមានតម្លៃ)។
ខ្សែប្រយុទ្ធ ២ រូប គឺ Wilfried Zaha របស់ក្រុម Crystal Palace និង Ivan Toney របស់ក្រុម Brentford បានសម្រេចចិត្ត មិនចូលរួមក្នុងទិដ្ឋភាពលុតជង្គង់ នៅឆ្នាំនេះ ដោយលើកហេតុផលថា គួរតែធ្វើអ្វីបន្ថែមលើសពីនេះ ដើម្បីលុបបំបាត់ការរើសអើងនោះ។
ឥឡូវនេះ កីឡាករ Alonso បានធ្វើតាមដែរ ហើយនឹងជំនួសមកវិញដោយការចង្អុលស្លាក ដែលមានអក្សរ «No Room for Racism» (គ្មានកន្លែងសម្រាប់ឱ្យមានការរើសអើង) នៅលើអាវរបស់ខ្លួនពេលកីឡាករដទៃនាំគ្នាលុតជង្គង់។
«ខ្ញុំប្រឆាំងទាំងស្រុង ចំពោះការរើសអើងជាតិសាសន៍ ហើយខ្ញុំប្រឆាំងនឹងការរើសអើងគ្រប់រូបភាពទាំងអស់។ ខ្ញុំគ្រាន់តែចង់ត្រឹមតែចង្អុលស្លាកនៅលើអាវដែលសរសេរថា ទេ ចំពោះការរើសអើងជាតិសាសន៍ពណ៌សម្បុរ ដូចដែលអ្នកកីឡាផ្សេងទៀត និងកីឡាករបាល់ទាត់មួយចំនួន ក្នុងប្រទេសដទៃបានធ្វើ»។ កីឡាករ Alonso បាននិយាយ។
កីឡាករសញ្ជាតិអេស្ប៉ាញ រូបនេះ បានបន្តទៀតថា៖ «ខ្ញុំចង់ធ្វើវិធីបែបនេះជាង ហើយពិតណាស់ ខ្ញុំចង់និយាយឱ្យបានច្បាស់ថា ខ្ញុំប្រឆាំងនឹងការរើសអើងគ្រប់រូបភាព ហើយខ្ញុំគោរពគ្រប់គ្នា»។
ដោយត្រូវបានសួរថា តើការសម្រេចចិត្តរបស់ខ្លួន គឺជាការសម្រេចខាងនយោបាយឬអត់? កីឡាករ Alonso បានតបថា៖ «ខ្ញុំមិនដឹង! ខ្ញុំគ្រាន់តែចង់ធ្វើតាមវិធីនេះជាង។ វាជាវិធីរបស់ខ្ញុំ ក្នុងការធ្វើបែបនេះ ដែលខ្ញុំគិតថា វាជាវិធីមួយផ្សេងទៀត»។
«ហើយប្រហែលមកពីខ្ញុំគិតថា វាកំពុងបាត់បង់កម្លាំងបន្តិចហើយ ដូច្នេះខ្ញុំគ្រាន់តែចង់ធ្វើវិធីនេះ ហើយគ្រាន់តែចង់បង្ហាញឱ្យឃើញពីការគាំទ្រយ៉ាងពេញ-ទំហឹងរបស់ខ្ញុំ ក្នុងការប្រយុទ្ធប្រឆាំងជាមួយនឹងការរើសអើងជាតិសាសន៍»។ Alonso ដែលធ្វើការលុតជង្គង់ពេញ ១ រដូវកាលកន្លងទៅបន្ថែម៕ AFP/VN