សៀង ចន្ធា ពេលលោតតែតបាល់បញ្ចូលទី ជួយឱ្យបឹងកេត ឈ្នះក្រុមទ័ព ១-០ ពីថ្ងៃព្រហស្បតិ៍។ រូប បឹងកេត
.jpg)
ភ្នំពេញៈ ការតែតបញ្ចូលទីត្រឹម ១ គ្រាប់ របស់ខ្សែប្រយុទ្ធវ័យក្មេង សៀង ចន្ធា បានក្លាយជាជ័យជម្នះយ៉ាងសំខាន់បំផុត សម្រាប់ក្រុមការពារតំណែងជើងឯក បឹងកេត ដើម្បីបន្តក្តីរំពឹងកាន់តែខ្ពស់ ក្នុងការឆ្ពោះទៅប្រជែងយកពាន លីគកំពូលកម្ពុជា ឆ្នាំ ២០២១ ព្រោះការដណ្តើមបាន ៣ ពិន្ទុ ពីក្រុមកងយោធពលខេមរភូមិន្ទ (ទ័ព) កាលពីម្សិលមិញនេះ វាបានជួយឱ្យពួកគេ តាមកាន់តែកៀកក្រុមព្រះខ័នរាជស្វាយរៀង និងភ្នំពេញក្រោន ដែលកំពុងកាន់កាប់ លេខរៀងទី១ និងទី២ ដោយមាន ៣១ ពិន្ទុស្មើគ្នា។
តាមរយៈការប្រកួតយ៉ាងតានតឹង នៅកីឡដ្ឋានស្តាតចាស់ ដែលទើបបំពាក់ស្មៅថ្មី កាលពីថ្ងៃព្រហស្បតិ៍ ម្សិលមិញនោះ ក្រុមម្ចាស់ផ្ទះរបស់លោក Lee Tae Hoon និងក្រុមរបស់គ្រូបង្គោល លោក គឹម ភក្តី បានវាយបកគ្នាទៅវិញទៅមក ដោយបង្កើតបាន នៅការប្រកួតដ៏ទាក់ទាញមួយ សម្រាប់អ្នកទស្សនា។
ប៉ុន្តែអ្នកគាំទ្ររបស់ក្រុមទាំង ២ បានរង់ចាំរហូតដល់នាទីទី៧០ ទើបមានការគ្រាប់បាល់កើតឡើង គឺនៅពេលកីឡាករ ឱ ភារុណ បានលើកបាល់ពីចម្ងាយចូលតំបន់គ្រោះថ្នាក់ ផ្តល់ឱកាសឱ្យ សៀង ចន្ធា ដែលឈរក្បែររៀមច្បង ចាន់ វឌ្ឍនាកា លោតតែតបាល់នោះបញ្ចូលទីបានយ៉ាងល្អ ហើយវាក៏ជាគ្រាប់បាល់ជ័យជម្នះ ដែលបានជួយឱ្យបឹងកេត បន្តឈ្នះក្រុមទ័ព ១-០ បន្ថែមទៅលើការឈ្នះ ២-០ កាលពីជើងទី១ ផងដែរ។
ក្រុមបឹងកេត បានបង្ហាញភាពរីករាយខ្លាំង សម្រាប់ការទទួលបានជ័យជម្នះយ៉ាងសំខាន់នេះ ហើយការដណ្តើមបាន ៣ ពិន្ទុនេះ បានជួយឱ្យពួកគេឡើងទៅឈរនៅលេខ ៣ ជាបណ្តោះអាសន្ន ដោយមាន ៣០ ពិន្ទុ គឺតិចជាងក្រុមព្រះខ័នរាជស្វាយរៀង និងភ្នំពេញក្រោន ត្រឹម ១ ពិន្ទុប៉ុណ្ណោះ ព្រោះកាលពីថ្ងៃពុធ ស្វាយរៀង បានយកឈ្នះក្រុមណាហ្គាវើលដ៍ ២-១ ហើយ ភ្នំពេញក្រោន ឈ្នះក្រុមគិរីវង់សុខសែនជ័យ ៣-១ ស្របពេលក្រុមនគរបាលជាតិ បានរកឃើញជ័យជម្នះ ជាលើកដំបូង ក្នុងរដូវកាលនេះ ក្រោយយកឈ្នះក្រុមអាស៊ីអឺរ៉ុប ៤-៣។
តាមរយៈលទ្ធផលនៃការប្រកួត កាលពីថ្ងៃពុធ និងថ្ងៃព្រហស្បតិ៍ម្សិលមិញ ក្រុមស្វាយរៀង បានឡើងទៅឈរនៅលេខ ១ ជាបណ្តោះអាសន្ន និងតាមពីក្រោយ ដោយក្រុមភ្នំពេញក្រោន ដែលមាន ៣១ ពិន្ទុដូចគ្នា ហើយបឹងកេត ដែលឈរនៅលេខ ៣ មាន ៣០ ពិន្ទុ បានរុញក្រុមវិសាខា និងណាហ្គាវើលដ៍ ដែលមាន ២៨ ពិន្ទុដូចគ្នា ឱ្យទៅឈរនៅលេខ ៤ និងលេខ ៥ ខណៈក្រុមទ័ព ឈរនៅលេខ ៦ ដដែល មាន ២២ ពិន្ទុ និងគិរីវង់ ឈរនៅលេខ ៨ ចុងក្រោយគេ នៅក្នុងតំបន់ Top8 នេះ។
យ៉ាងណាក៏ដោយ ចំណាត់ថ្នាក់ នៅតំបន់ Top8 នេះ អាចនឹងមានការប្រែប្រួលសម្រាប់ការប្រកួតនៅថ្ងៃសៅរ៍ និងថ្ងៃអាទិត្យនេះ ហើយបឹងកេត ត្រូវបានគេមើលឃើញថា អាចមានភាគរយច្រើន ក្នុងការឈ្នះ ៣ ពិន្ទុបន្ថែម ពេលពួកគេធ្វើដំណើរទៅជួបក្រុមគិរីវង់ នៅថ្ងៃអាទិត្យ ស្របពេលទ័ព ត្រូវស្វាគមន៍ក្រុមស្វាយរៀង ម៉ោង ៣:៣០ ដូចគ្នា ហើយភ្នំពេញក្រោន ត្រូវជួប ក្រុមអង្គរថាយហ្គឺរ នៅល្ងាចម៉ោង ៦ ចំណែកក្រុមណាហ្គាវើលដ៍ ត្រូវប៉ះក្រុមខ្លាំង វិសាខា នៅថ្ងៃសៅរ៍ វេលាម៉ោង ៣:៣០៕
