ខ្សែប្រយុទ្ធ ចាន់ វឌ្ឍនាកា បានលោតរំលងអ្នកចាំទីរបស់ក្រុមឥណ្ឌា ពេលរូបគេលេងឱ្យក្រុមជម្រើសជាតិកម្ពុជា កាលពីឆ្នាំ២០១៧។ រូបថត ភ្នំពេញប៉ុស្តិ៍
.jpg)
ភ្នំពេញ៖ ខ្សែប្រយុទ្ធ ចាន់ វឌ្ឍនាកា និង ច្រឹង ពលរដ្ឋ ព្រមទាំងកីឡាករវ័យក្មេងជាច្រើនរូបទៀត ត្រូវបានកោះហៅឱ្យចូលរួមជាមួយក្រុមជម្រើសជាតិកម្ពុជា សម្រាប់ត្រៀមការប្រកួតវគ្គ Play off នៃពានរង្វាន់ AFC ASIAN Cup China 2023 និងការជម្រុះពានរង្វាន់ AFC U23 ASIAN Cup Uzbekistan 2022 ដែលនឹងចាប់ផ្ដើមពីថ្ងៃទី ៩ ដល់ថ្ងៃទី ២៦ ខែតុលា ឆ្នាំ ២០២១ នៅប្រទេសបារ៉ែន និងជប៉ុន។
តាមរយៈបញ្ជីឈ្មោះក្រុមជម្រើសជាតិកម្ពុជា ចំនួន ៣៦ នាក់ ដែលសហព័ន្ធកីឡាបាល់ទាត់កម្ពុជា បានប្រកាស កាលពីព្រឹកថ្ងៃចន្ទនេះ បានបង្ហាញថា ខ្សែប្រយុទ្ធរបស់បឹងកេត ចាន់ វឌ្ឍនាកា ដែលបានបាត់ឈ្មោះពីក្រុមជម្រើសជាតិកម្ពុជា អស់រយៈពេលជាច្រើនឆ្នាំ មកហើយនោះ ត្រូវបានអ្នកចាត់ការទូទៅលោក Keisuke Honda នឹងក្រុមគ្រូបង្វឹកក្រុមជម្រើសជាតិកម្ពុជា សម្រេចដាក់ឱ្យចូលរួមជាមួយក្រុមកម្ពុជា ជាថ្មី។
ការមានឈ្មោះនៅក្នុងក្រុមជម្រើសជាតិ សារឡើងវិញនេះ ក៏ព្រោះតែ ចាន់ វឌ្ឍនាកា ពេលនេះ បានបង្ហាញទម្រង់ល្អឡើងវិញ និងបានក្លាយជាខ្សែប្រយុទ្ធយ៉ាងសំខាន់ ដែលអាចជួយឱ្យ បឹងកេត ទទួលបានជ័យជម្នះ ៨ លើកជាប់ៗគ្នា មុនពេលពួកគេ មកចាញ់ក្រុមវិសាខា ៥-១ ប៉ុន្តែ បឹងកេត ក៏បានសងសឹងចំពោះការចាញ់ដ៏ជូរចត់នេះ វិញផងដែរ ដោយការយកឈ្នះ ២-១ លើ វិសាខា វិញ សម្រាប់ការប្រកួតជើងទី ២ នៃលីគកំពូលកម្ពុជា ហើយ ចាន់ វឌ្ឍនាកា ជាអ្នករកបានគ្រាប់បាល់ទាំង ២ នេះ តែម្នាក់ឯង។
ច្រឹង ពលរដ្ឋ (ជួរមុខ ទី១ រាប់ពីឆ្វេង) ពេលបង្ហាញខ្លួនជម្រើស១១នាក់ដំបូងរបស់កម្ពុជា ជាមួយ ចាន់ វឌ្ឍនាកា, សឿត បារាំង និងរៀមមួយចំនួនទៀត កាលពីឆ្នាំ២០១៧។ រូប ភ្នំពេញប៉ុស្តិ៍
ការសម្រេចនាំយកខ្សែប្រយុទ្ធពាក់លេខ ១១ ចាន់ វឌ្ឍនាកា មកចូលរួមជាមួយក្រុមជម្រើសជាតិកម្ពុជា ឡើងវិញនេះ អាចទទួលការសាទរខ្លាំង ពីអ្នកគាំទ្រភាគច្រើន ព្រោះពួកគេ មើលឃើញថា វឌ្ឍនាកា ពេលនេះ មានទម្រង់លេងល្អឡើងវិញហើយ បន្ទាប់ពីរូបគេ បានធ្លាក់គុណភាពលេង ជាមួយការមិនសូវបានបង្ហាញខ្លួន នៅលើទីលានប្រកួត អស់រយៈពេល ២ ទៅ៣ ឆ្នាំ កន្លងមកនេះ។
ជាមួយគ្នានេះ ខ្សែបម្រើកណ្តាលវ័យក្មេង ច្រឹង ពលរដ្ឋ របស់វិសាខា ដែលធ្លាប់ដើរតួនាទីជាអ្នកចែកបាល់យ៉ាងល្អ នៅតំបន់កណ្តាល ក្នុងក្រុមជម្រើសជាតិកម្ពុជា នោះ ក៏ត្រូវបានកោះហៅឱ្យចូលរួមជាមួយក្រុម ឡើងវិញផងដែរ តាំងពីរូបគេ ត្រូវបានអតីតគ្រូបង្វឹកក្រុមជម្រើសជាតិកម្ពុជា លោក Leonardo Vitorino ប្រកាសលុបឈ្មោះចេញពីក្រុមជម្រើសជាតិកម្ពុជា ជាមួយ សំអឿន ពិដោរ ក្នុងអំឡុងការប្រកួតស៊ីហ្គេម នៅប្រទេសម៉ាឡេស៊ី កាលពីឆ្នាំ ២០១៧ គឺពេលដែលក្រុមកម្ពុជា បានចាញ់ទាំង ៥ ប្រកួត និងឈរនៅបាតតារាង ប្រចាំពូល B ដោយគ្មាន១ពិន្ទុសោះ។
ចំណែកកីឡាករ សឿត បារាំង និង ណារ៉ុង កក្កដា ក៏ត្រូវបានកោះហៅឱ្យចូលរួមជាមួយក្រុមជម្រើសជាតិកម្ពុជា ឡើងវិញផងដែរ ប៉ុន្តែនៅក្នុងបញ្ជីឈ្មោះក្រុមជម្រើសជាតិកម្ពុជា លើកនេះ គ្មានវត្តមានខ្សែប្រយុទ្ធជើងចាស់ ប្រាក់ មុន្នីឧត្តម និងខ្សែការពារ ធារី ចន្ថាប៊ីន នោះទេ ហើយខ្សែប្រយុទ្ធឆ្នើម ម៉ាត់ នូរ៉ុណ ដែលកំពុងមានរបួស ក៏មិនត្រូវបានដាក់បញ្ចូលនោះដែរ តែ គួច សុកុម្ភៈ នៅតែបន្តមានឈ្មោះ ក្នុងនាមជាកីឡាករ ដែលមានអាយុច្រើនជាងគេ នៅក្នុងក្រុមគោព្រៃកម្ពុជា។
បញ្ជីឈ្មោះក្រុមកីឡាករជម្រើសជាតិកម្ពុជា ទាំង៣៦នាក់ ដែលត្រូវបានកោះហៅ លើកនេះ។ FFC
រឿងដែលគួរឱ្យចាប់អារម្មណ៍ខ្លាំង សម្រាប់ការប្រមូលផ្តុំក្រុមជម្រើសជាតិកម្ពុជា លើកនេះ គឺលោក Keisuke Honda និងក្រុមគ្រូបង្វឹកនៃក្រុមជម្រើសជាតិកម្ពុជា បានសម្រេចកោះហៅកីឡាករវ័យក្មេងរហូតដល់១៣នាក់ ឱ្យចូលបំពេញបេសកកម្ម ជាមួយក្រុមជម្រើសជាតិ លើកនេះ ក្នុងនោះមានកីឡាករ វីរៈ ដារ៉ា, ចាន់ សារ៉ាពេជ្រ, លីម អារុណរ៉េយមិន, គី រីណា, ស៊ិន សុវណ្ណមករា, ជួន ចាន់ចាវ, ឡុង ម៉េងហាវ, មិន រតនៈ, អ៊ាន ពិសី, ជឿន ណាចា, ញាណ សុស៊ីដាន, រដ្ឋ សំណាង និង រ៉េត លីហេង។
ចំណែក កីឡាករវ័យក្មេង ញឹម លីហួរ, ឡេង ណូរ៉ា និង ស រតនា ត្រូវបានកោះហៅឱ្យចូលរួមជាមួយក្រុមជម្រើសជាតិ ជាលើកទី២ ផងដែរ។ តែទោះបីជាយ៉ាងណា នៅក្នុងបញ្ជីឈ្មោះក្រុមជម្រើសជាតិកម្ពុជា ទាំង ៣៦ នាក់នេះ ត្រូវបានបែងចែកជា ២ ផ្នែក គឺក្រុមជម្រើសជាតិកម្ពុជាអាយុក្រោម ២៣ ឆ្នាំ ដែលពួកគេ ត្រៀមសម្រាប់ ការប្រកួតជម្រុះពានរង្វាន់ AFC U23 ASIAN Cup Uzbekistan 2022 ដែលកម្ពុជា ឈរនៅពូល K ជាមួយក្រុមម្ចាស់ផ្ទះជប៉ុន និងក្រុមហុងកុង។
មួយទៀត គឺក្រុមធំជម្រើសជាតិកម្ពុជា ដែលត្រូវប្រកួតវគ្គ Play off ពានរង្វាន់ AFC ASIAN Cup China 2023 គឺកម្ពុជា ត្រូវប្រកួតជម្រុះជាមួយក្រុមកោះហ្គាម នៅទឹកដីកណ្តាល ប្រទេសបារ៉ែន ដោយជើងទី ១ គ្រោងធ្វើនៅថ្ងៃទី៩ និងជើងទី ២ ធ្វើនៅថ្ងៃទី១២ ខែតុលា ឆ្នាំ២០២១ ប៉ុន្តែតាមគម្រោង ទាំងក្រុម U23 និងក្រុមធំ ជម្រើសជាតិកម្ពុជា ត្រូវចេញដំណើរទៅហ្វឹកហាត់នៅប្រទេសបារ៉ែន ជាមួយគ្នា រួចទើបបន្តដំណើរទៅប្រកួតជម្រុះពានរង្វាន់ AFC U23 ASIAN Cup Uzbekistan 2022 នៅប្រទេសជប៉ុន ដោយក្រុមកម្ពុជា ត្រូវជួបក្រុមហុងកុង នៅថ្ងៃទី ២៣ មុនប៉ះក្រុមម្ចាស់ផ្ទះ ជប៉ុន នៅថ្ងៃទី ២៦ ខែតុលា ឆ្នាំ២០២១៕
