Osimhen របស់ Napoli លោតតែតបាល់អំឡុងការប្រកួត នៅ Serie A ទល់នឹង Torino កាលពីថ្ងៃអាទិត្យ។ AFP
.jpg)
ក្រុមរ៉ូម៖ ក្រុម Napoli បានឡើងទៅឈរទីកំពូល នៃតារាងពិន្ទុនៃក្របខ័ណ្ឌ Serie A ក្រោយចប់ការប្រកួត កាលពីថ្ងៃអាទិត្យ ដោយសារបានយកឈ្នះក្រុម Torino នៅផ្ទះខ្លួនឯង ជាមួយនឹងគ្រាប់បាល់តែ ១ គ្រាប់គត់ របស់ខ្សែប្រយុទ្ធ Victor Osimhen នៅ ៩ នាទីចុងក្រោយនៃការប្រកួត។
ក្រុម AC Milan បានឆក់យកតំណែងលេខ ១ ជាបណ្ដោះអាសន្ន ក្រោយពីអាចវាយបកចំពោះការនាំមុខ ២ គ្រាប់មុនរបស់ក្រុម Hellas Verona ហើយយកឈ្នះ ៣-២ វិញ សម្រាប់ការប្រកួត ក្នុងកីឡដ្ឋាន San Siro កាលពីថ្ងៃសៅរ៍។
ប៉ុន្តែក្រុមឥតខ្ចោះ Napoli បានរំកិលត្រឡប់ទៅនៅពីលើក្រុមយក្សក្រុងមីឡានវិញ បន្ទាប់ពីកីឡាករ Osimhen ដែលរួមចំណែក ១ គ្រាប់ដែរ ក្នុងជ័យជម្នះ ២-០ របស់ក្រុមជម្រើសជាតិនីហ្សេរីយ៉ា លើក្រុមសា.អាហ្វ្រិកកណ្ដាល សម្រាប់ការទាត់វគ្គជម្រុះ World Cup កាលពីសប្ដាហ៍មុន ដោយបានតែតបញ្ចូលទីគ្រាប់បាល់ជ័យជម្នះនៅនាទីទី៨១។
ក្រុមម្ចាស់ផ្ទះ Napoli គួរតែបានគ្រាប់បាល់នាំមុខ តាំងពីវគ្គទី១ ម្ល៉េះ តែការស៊ុតប៉េណាល់ទីរបស់កីឡាករ Lorenzo Insigne ត្រូវបានអ្នកចាំទីចាប់បាន ហើយនៅវគ្គទី២ ការស៊ុតរបស់ខ្សែប្រយុទ្ធ Hirving Lozano បានត្រឹមតែបុកបង្គោលទី មុនពេលមានគ្រាប់បាល់របស់កីឡាករ Osimhen នេះ។
ក្រោយពីអាចស៊ុតគ្រាប់បាល់ជ័យជម្នះឱ្យក្រុម កីឡាករ Osimhen បាននិយាយថា៖ «វាជាគ្រាប់បាល់ដ៏សំខាន់បំផុត ក្នុងអាជីពរបស់ខ្ញុំ។ ខ្ញុំរីករាយណាស់។ បរិយាកាស នៅឯកីឡដ្ឋាន ពិតជាពិសេសអស្ចារ្យណាស់។ អ្នកគាំទ្រ បានជួយជាកម្លាំងចិត្តរុញឱ្យពួកយើងឆ្ពោះទៅមុខ ហើយពួកយើង ដណ្ដើម ៣ ពិន្ទុ បានសម្រេច»។
ក្រុម Napoli ឥឡូវនេះ មាន ២៤ ពិន្ទុ ពោលគឺនាំមុខក្រុម Milan ២ពិន្ទុ បន្ទាប់ពីតាមស្មើនឹងកំណត់ត្រាយ៉ាងល្អបំផុត ក្នុងប្រវត្តិសាស្ត្ររបស់ក្លិបផ្ទាល់ ដែលធ្វើបានបែបបែបហ្នឹងដែរ កាលពីរដូវកាល ២០១៧-២០១៨ ដោយការឈ្នះទាំងអស់ នៅរាល់ការប្រកួត ៨ ដងដំបូង។
ក្រុមការពារជើងឯក Inter Milan ដែលពេលនេះ នៅលេខ ៣ មាន ១៧ ពិន្ទុ បន្ទាប់ពីភា្លត់ចាញ់ក្រុម Lazio ក្រៅផ្ទះ ៣-១ កាលពីថ្ងៃសៅរ៍។ ចំណែកក្រុម Juventus បន្តដំណើរឡើងចំណាត់ថ្នាក់ជាលំដាប់ បន្ទាប់ពីប្រសើរឡើង ពីការចាប់ផ្ដើមអាក្រក់ ខណៈដែល ១ គ្រាប់ពីកីឡាករ Moise Kean នៅវគ្គទី១ ជួយឱ្យមានជ័យជម្នះ ១-០ លើក្រុម Roma របស់លោកJose Mourinho។
«ខ្ញុំពេញចិត្តនឹងការឈ្នះ ១-០ នេះ ព្រោះវាជាលទ្ធផលល្អ ជាពិសេសនៅពេលដែលយើងបន្តការបិទមិនឱ្យមានការស៊ុតបញ្ចូលទីបាន។ Roma ជាក្រុមល្អខាងទិកនិច។ ពួកគេមានកីឡាករ ដែលពេញដោយគុណភាពជាច្រើន ហើយបង្កបញ្ហាឱ្យពួកយើង នៅដើមដំបូង។ តែបន្ទាប់មក យើងស៊ុតបញ្ចូលទីបាន និងធ្វើបានល្អឡើងៗ ខណៈពេលវេលា បានរំកិលទៅមុខ»។ នេះជាការលើកឡើងរបស់គ្រូបង្វឹកក្រុម Juve លោក Massimiliano Allegri៕ AFP/VN
