ក្រុងឡុងដ៍៖ លោក Patrick Vieira ប៊ិះនឹងទទួលបានភាពរីករាយ សម្រាប់ការវិលមកកាន់ទីលានរបស់អតីតក្រុមខ្លួន គឺ Arsenal តែគ្រាប់បាល់នៅនាទីទី៩០+៥ ដែលស៊ុតដោយខ្សែប្រយុទ្ធ Alexandre Lacazette បានជួយឱ្យក្រុមកាំភ្លើងធំ តាមស្មើ ២-២ ជាមួយក្រុមCrystal Palace អំឡុងការប្រកួត នៅក្របខ័ណ្ឌ Premier League កាលពីថ្ងៃចន្ទ។
ការស៊ុតបានសម្រេច នៅនាទីទី៨ ពីខ្សែប្រយុទ្ធ Pierre-Emerick Aubameyang បានធ្វើឱ្យក្រុមម្ចាស់ផ្ទះ Arsenal ចាប់ផ្ដើមហ្គេមយ៉ាងឥតខ្ចោះ តែការលេងអត់ចាញ់ ៥ លើក ដែលបាន និងកំពុងជួយឱ្យបរិយាកាសជុំវិញកីឡដ្ឋាន Emirates ពេញដោយភាពស្រស់ស្រាយនោះ ទំនងជាត្រូវបានបង្អាក់ ដោយសារតែគ្រាប់បាល់របស់ខែ្សប្រយុទ្ធ Christian Benteke នៅ Odsonne Edouard នៅវគ្គទី២ បាននាំឱ្យក្រុម Crystal នាំមុខវិញម្ដង។
តែយ៉ាងណា ជារឿងគួរឱ្យស្ដាយសម្រាប់លោក Vieira ដែលកូនក្រុមរបស់លោក មិនអាចទប់ឱ្យជាប់សម្រាប់គ្រាប់បាល់នាំមុខនេះ ដោយនៅសល់តែប៉ុន្មានវិនាទីទៀតប៉ុណ្ណោះ បានបណ្ដោយឱ្យកីឡាករសញ្ជាតិបារាំង Lacazette មានឱកាសផ្ដួលខ្លួនកាប់បាល់បញ្ចូលទីបានសម្រេច។
«វាកៀកណាស់ តែយើងបាន និងកំពុងនិយាយថា វាញឹកញាប់បន្តិចហើយ។ ខ្ញុំពិតជាមានការខកចិត្ត ព្រោះតាមវិធី ដែលក្រុមលេងតបតវិញ ក្នុងវគ្គទី ២ សមនឹងទទួលបានជ័យជម្នះណាស់ ក្នុងហ្គេមនេះ»។ នេះជាការលើកឡើងពីគ្រូបង្វឹករបស់ក្រុម Crystal លោក Vieira ដែលក្រុមរបស់លោក បានស្មើដល់ទៅ ៥ដង ក្នុងចំណោម ៨ហ្គេមលីគ នារដូវកាលនេះ និងឈរនៅលេខ ១៤ ជាមួយនឹង ៨ ពិន្ទុ។
ការបែងចែកពិន្ទុនេះ បានជួយឱ្យក្រុម Arsenal រំកិលឡើងដល់លំដាប់ទី ១២ ក្នុងតារាងពិន្ទុលីគកំពូលអង់គ្លេស តែទម្រង់លេងនេះ មានផលតិចតួចណាស់ ដើម្បីបង្ហាញថា ពួកគេនឹងបង្កើតជាឧបសគ្គដល់ក្រុមគូបដិបក្ខ ក្នុងការប្រជែងយកតំណែង សម្រាប់ទៅលេងនៅក្របខ័ណ្ឌ Champions League នៅបញ្ចប់រដូវកាលនោះ។
តែយ៉ាងណាក្ដី ការដណ្ដើមបាន ១០ ពិន្ទុ ពីការប្រកួត ដែលគួរណាស់តែបាន ១២ ពិន្ទុ ធ្វើឱ្យវិបត្តិ នាដើមរដូវកាលស្រាលបានខ្លះ សម្រាប់ក្លិប Arsenal បន្ទាប់ពីមាននូវការចាប់ផ្ដើមដ៏អាក្រក់បំផុត ជាលើកដំបូង ក្នុងរយៈពេល ៦៧ឆ្នាំ។
«បន្ទាប់ពីរកគ្រាប់បាល់បាន យើងមិនបានគ្រប់គ្រងហ្គេមឱ្យល្អគ្រប់គ្រាន់នោះឡើយ។ យើងមិនមានភាពនឹងនរ ឬក៏ការគ្រប់គ្រង។ រឿងល្អបំផុតនោះ គឺថា ពួកយើងបន្តប្រយុទ្ធ។ ពួកគេរក្សាការជឿជាក់ រហូតដល់វិនាទីចុងក្រោយ។ នោះគឺថា តើពួកយើងធ្វើយ៉ាងដូចម្ដេច ដើម្បីដណ្ដើមពិន្ទុឱ្យបាន»។ នេះជាការលើកឡើងរបស់អ្នកចាត់ការក្រុម Arsenal លោក Mikel Arteta។
លោក Vieira ដែលធ្លាប់ឈ្នះពាន Premier League ៣ ដង កាលនៅជាប្រធានក្រុមArsenal កំពុងត្រូវបានក្លិបចាស់របស់ខ្លួនមើលរំលង សម្រាប់តំណែងជាគ្រូបង្វឹក តែបុរសសញ្ជាតិបារាំង រូបនេះ បានរងបរាជ័យតែ ២ ដងប៉ុណ្ណោះ ពីការដឹកនាំក្រុម Crystal ៨ ប្រកួតបើកឆាក នៅលីគ ដោយចាញ់ក្រុម Chelsea និង Liverpool នៅក្រៅផ្ទះ៕ AFP/VN