.jpg)
ភ្នំពេញៈ ខ្សែប្រយុទ្ធ ថា គ្រីយ៉ា និង វិច្ឆិការ ពៅ សុទ្ធតែរកបានគ្រាប់បាល់ច្រើន លើសពី ៣ គ្រាប់ ក្នុងពេលពួកគេ បានជួយឱ្យក្រុមខេត្តបាត់ដំបង និងក្រុមកោះកុងអេហ្វស៊ី ឆ្លងផុតវគ្គជម្រុះ ៨ ក្រុមចុងក្រោយ នៃការប្រកួតថ្នាក់ខេត្តពានរង្វាន់សម្តេច ហ៊ុន សែន លើកទី១៥ ប្រចាំឆ្នាំ ២០២១។ ចំណែកក្រុមខេត្តត្បូងឃ្មុំ និងខេត្តបន្ទាយមានជ័យ ក៏ទទួលបានឱកាស ឡើងទៅកាន់វគ្គពាក់កណ្តាលផ្តាច់ព្រ័ត្រ ដូចគ្នា។
តាមរយៈការប្រកួតជម្រុះ ៨ ក្រុមចុងក្រោយ នៅលើទីលានខុសៗគ្នា កាលពីថ្ងៃសៅរ៍ និងថ្ងៃអាទិត្យ កន្លងមកនេះ ក្រុមខេត្តបាត់ដំបង ធ្វើបានយ៉ាងល្អបំផុត ដើម្បីទម្លាក់ក្រុមខេត្តកណ្ដាល ជាមួយការយកឈ្នះរហូតដល់ ៧-១ នៅកីឡដ្ឋាន 7NG ហើយកីឡាករពាក់លេខ ៣៣ ថា គ្រីយ៉ា អាចរកបានដល់ ៤ គ្រាប់តែម្នាក់ឯង ហើយបន្ថែមដោយ វុធ ដេវីត ចំនួន ២ គ្រាប់ និង ហាលីម រ៉គីម ចំនួន ១ គ្រាប់ ខណៈ ១ គ្រាប់របស់ខេត្តកណ្តាល រកបានដោយ ធឿន ដាវីត។
ចំណែកខ្សែប្រយុទ្ធ វិច្ឆិការ ពៅ របស់ក្រុមកោះកុងអេហ្វស៊ី ក៏អាចរកបាន ៤ គ្រាប់តែម្នាក់ឯងផងដែរ ដើម្បីជួយឱ្យក្រុមមកពីដែនសមុទ្រមួយនេះ លត់ក្រុមខេត្តកំពង់ឆ្នាំង ៩-១ នៅទីលានកីឡដ្ឋានស្តាតចាស់ ចំណែក ៥ គ្រាប់ទៀត រកបានដោយ សាន បូរ៉ា ចំនួន ២ គ្រាប់ និង ប៉ែន បញ្ញាវុឌ្ឍ, វិសាល ជៀន និង សើ រ៉ូហ្ស ម្នាក់ ១ គ្រាប់ ហើយ ១ គ្រាប់របស់ខេត្តកំពង់ឆ្នាំង រកបានដោយកីឡាករ យូ ទេះ។
ជាមួយគ្នានោះ កីឡាករ មីន សែតសេន និង កើ ហ្វីន បានរួមគ្នាជួយឱ្យក្រុមខេត្តត្បូងឃ្មុំ យកឈ្នះក្រុមភ្នំពេញហ្គាឡាក់ស៊ី ២-០ តាមរយៈការរកបានម្នាក់ ១ គ្រាប់ របស់ពួកគេនៅនាទីទី៣១ និងទី៥៦ សម្រាប់ការប្រកួតនៅកីឡដ្ឋាន AEU Sport Park។ រីឯ ឈឿន គីមហ៊ុន បានក្លាយជាវីរបុស ដែលបានជួយឱ្យក្រុមខេត្តបន្ទាយមានជ័យ យកឈ្នះក្រុមសៀមរាបអេហ្វស៊ី ក្នុងលទ្ធផល ១-០ តាមរយៈការរកបានត្រឹម ១ គ្រាប់ ដ៏មានន័យរបស់គេនៅនាទីទី៧៤។
តាមរយៈលទ្ធផលនៃការប្រកួតនេះ បានជួយឱ្យក្រុមទាំង ៤ ឡើងទៅជួបគ្នា នៅវគ្គពាក់កណ្តាលផ្តាច់ព្រ័ត្រ ដោយក្នុងនោះ ក្រុមខេត្តត្បូងឃ្មុំ ត្រូវជួបជាមួយក្រុមខេត្តបាត់ដំបង នៅថ្ងៃពុធ ទី២០ ហើយក្រុមខេត្តបន្ទាយមានជ័យ ត្រូវប្រឈមជាមួយ ក្រុមកោះកុងអេហ្វស៊ី នៅថ្ងៃព្រហស្បតិ៍ ទី ២១ ខែតុលា ខាងមុខនេះ៕
