ក្រុងមែលប៊ន៖ អត្តពលិកវាយកូនបាល់ (តិន្នីស) អាជីព ដែលមិនបានចាក់វ៉ាក់សាំង ប្រហែលជាមិនអាចទទួលបានវីសា (ទិដ្ឋាការ) ដើម្បីទៅចូលរួមការប្រកួតដណ្ដើមពាន Grand Slam ក្នុងកម្មវិធី Australian Open 2022 នោះឡើយ។ នេះបើតាមការព្រមានពីមន្ត្រីនៅមូលដ្ឋានម្នាក់នាថ្ងៃអង្គារ ដែលនាំឱ្យកីឡាករត្រូវការពារជើងឯក Novak Djokovic កាន់តែមិនមានភាពច្បាស់លាស់អំពីការចូលរួមរបស់ខ្លួន ក្នុងព្រឹត្តិការណ៍ដ៏ធំ នាពេលខាងមុខនេះ។
ប្រមុខរដ្ឋវិចតូរៀ (Victoria) លោក Dan Andrews បានថ្លែងថា លោករំពឹងថា នឹងមិនមានការលើកលែងនូវច្បាប់ចាក់វ៉ាក់សាំងការពារជំងឺកូវីដ ១៩ របស់ប្រទេសអូស្ត្រាលីនោះឡើយ ចំពោះកីឡាករ កីឡាការិនី ដែលមកចូលរួមប្រកួតប្រជែង ក្នុងព្រឹត្តិការណ៍ដណ្ដើមពាន Grand Slam ក្នុងខែមករាខាងមុខនេះ។
លោក Andrews បានថ្លែងថា៖ «ខ្ញុំមិនគិតថា អត្តពលិកវាយកូនបាល់ ដែលមិនចាក់វ៉ាក់សាំងណាម្នាក់ នឹងទទួលបានវីសា ចូលមកក្នុងប្រទេសនេះ។ វីរុសមិនខ្វល់ថា តើចំណាត់ថ្នាក់ក្នុងវិស័យកីឡាតិន្នីសរបស់អ្នកទីប៉ុន្មាននោះទេ ឬក៏ពានរង្វាន់លំដាប់ Grand Slam ដែលអ្នកបានឈ្នះចំនួនប៉ុន្មាននោះឡើយ»។
«ហើយប្រសិនបើពួកគេ ទទួលបានវីសា ក៏ពួកគ នឹងប្រហែលជាត្រូវធ្វើចត្តាឡីស័ក ជាច្រើនសប្ដាហ៍ដែរ ខណៈដែលអត្តពលិកដទៃ មិនចាំបាច់ធ្វើបែបហ្នឹង ដោយសារគេបានចាក់វ៉ាក់សាំងរួចរាល់ហើយ»។ នេះជាការបន្ថែមរបស់លោក Andrews។
ការលើកឡើងរបស់លោក Andrew កើតមាន ខណៈដែលកីឡាករសញ្ជាតិស៊ែប៊ី Djokovic បានប្រាប់បណ្ដាញសារព័ត៌មាន នៅប្រទេសកំណើតរបស់ខ្លួនថា រូបគេមិនប្រាកដទេថា តើត្រៀមខ្លួនទៅចូលរួមប្រកួតប្រជែង ក្នុងកម្មវិធី Australian Open ឬអត់?
«ខ្ញុំមិនដឹងថា តើខ្ញុំនឹងទៅប្រទេសអូស្រ្តាលី ឬអត់? ខ្ញុំមិនដឹងថា នឹងមានអ្វីកើតឡើងនោះឡើយ។ ស្ថានការណ៍ពេលនេះ មិនជាល្អប៉ុន្មាននោះទេ»។ នេះជាសម្ដីរបស់កីឡាករDjokovic ដែលបានប្រាប់ទៅកាសែត Blic នៅប្រទេសស៊ែប៊ី ក្នុងកិច្ចសម្ភាសន៍មួយ នាថ្ងៃអង្គារ។
កីឡាករលំដាប់លេខ ១ ពិភពលោក Djokovic បានសម្ដែងការជំទាស់ជាសាធារណៈ ចំពោះការចាក់វ៉ាក់សាំង ហើយបដិសេធ ក្នុងការនិយាយថា តើរូបគេការពារខ្លួនឯងពីការឆ្លងវីរុសកូរ៉ូណាយ៉ាងដូចម្ដេច?
កីឡាករ Djokovic ដែលឈ្នះពាននៅក្រុងមែលប៊នចំនួន ៩ លើក បាននិយាយដែរថា រូបគេបានគ្រោងត្រឡប់ទៅរកការប្រកួតប្រជែងវិញ នៅឯកម្មវិធី Paris Masters ដែលដំណើរការពីថ្ងៃទី ១ ដល់ទី ៧ ខែវិច្ឆិកា និងចូលរួមការប្រកួតកម្មវិធី Davis Cup សម្រាប់ក្រុមជម្រើសជាតិ ពីថ្ងៃទី ២៥ ខែវិច្ឆិកា ដល់ថ្ងៃទី ៥ ខែធ្នូ៕ AFP/VN