ភ្នំពេញ៖ ផ្លូវដើររួមគ្នាដ៏វែងឆ្ងាយ ដែលបានជួបប្រទះគ្រប់រសជាតិ របស់លោក មាស ចាន់ណា ក្នុងនាមជាកីឡាករផង គ្រូជំនួយផង និងជាគ្រូបង្គោលផង នៅពេលលោកបំពេញភារកិច្ច នៅក្នុងក្លិបណាហ្គាវើលដ៏ អស់រយៈពេល ២០ ឆ្នាំ កន្លងមកនេះ បានឈានមកដល់ផ្លូវបែកហើយ នៅពេលភាគីទាំង២ បានប្រកាសរៀងៗខ្លួន ពីការចែកផ្លូវគ្នា នៅចុងខែតុលានេះ។
ក្លិបណាហ្គាវើលដ៏ មិនបានបន្តកុងត្រាឱ្យលោកគ្រូ មាស ចាន់ណា ទៀតនោះទេ បើទោះបីជា បុរសម្នាក់នេះ ធ្លាប់បានសាងស្នាដៃយ៉ាងច្រើន ជូនដល់ក្លិបមួយនេះ។ មិនតែប៉ុណ្ណោះ ការផ្តល់ដំណឹង ពីការមិនបន្តកុងត្រាថ្មីនេះ ក៏ត្រូវបានធ្វើឡើង មិនស្របទៅនឹងគោលការណ៍ និងច្បាប់បាល់ទាត់ ទៅទៀត ដែលបញ្ហានេះ បានធ្វើឱ្យ លោក មាស ចាន់ណា ប្រតិកម្មខ្លាំងៗតបទៅនឹងទង្វើនេះ។
«បើមិនបន្តកុងត្រា អស់លោកគួរតែផ្តល់ដំណឹងដល់គេ យ៉ាងហោចណាស់ ១ ខែមុនផង មិនមែនអស់លោក ផ្តល់ដំណឹងតែកន្លះខែទេ សូមអស់លោកស្គាល់អំពីច្បាប់បាល់ទាត់ផង ព្រោះអស់លោកសុទ្ធតែមកពីប្រទេស ដែលរីកចំរើនផ្នែកបាល់ទាត់ ស្គាល់អំពីច្បាប់បាល់ទាត់។ ខ្ញុំមិនដែលអង្វរ ឬក៏ទ្រអស់លោក ដើម្បីបន្តកុងត្រានោះទេ បើខ្ញុំដឹកនាំអន់ អស់លោក ដកខ្ញុំចេញតាំងពីយូរមកហើយ ( តែកុំមកបោកប្រាស់)»។
នេះជាសារស័ព្ទ ដែលលោក មាស ចាន់ណា បានបង្ហោះ នៅលើហ្វេសប៊ុក កាលពីថ្ងៃអាទិត្យ ដើម្បីបង្ហាញពីការមិនពេញចិត្ត ទៅនឹងបុគ្គល២រូប នៅក្នុងក្លិបណាហ្គាវើលដ៍ ដែលបានរួមគ្នាធ្វើបាបលោក ហើយអ្នកទាំង២នោះ ត្រូវបានគេទម្លាយថា ម្នាក់ជាអគ្គលេខាធិការ និងម្នាក់ទៀត ជានាយកបច្ចេកទេសរបស់ក្លិបមួយនេះ។
យ៉ាងណាក៏ដោយ រឿងដ៏រសើបនេះ បានវិលមករកភាពស្ងប់ស្ងាត់វិញ ហើយណាហ្គាវើលដ៍ ក៏បានប្រកាសពីការចែកផ្លូវគ្នានេះ ជាផ្លូវការ កាលពីអង្គារ ដោយបានលើកឡើងថា៖ «លោក មាស ចាន់ណា នឹងត្រូវចាកចេញពីក្លិប នៅចុងខែនេះ បន្ទាប់ពីកិច្ចសន្យារបស់គាត់ ផុតកំណត់។ ក្លិបបាល់ទាត់ណាហ្គាវើលដ៍ សូមថ្លែងអំណរគុណចំពោះគាត់ ដែលបានបំពេញការងារ សម្រាប់ក្លិបរបស់យើង កន្លងមក ទាំងជាកីឡាករ និងជាគ្រូបង្វឹកផង។ យើងសូមជូនពរឱ្យគាត់ បន្តទទួលបានជោគជ័យ ក្នុងអាជីពជាគ្រូបង្វឹកនាពេលអនាគត»។
ជាមួយគ្នានេះ លោក មាស ចាន់ណា ក៏បានបង្ហោះសារមួយ ដើម្បីលាគ្រប់គ្នា នៅក្នុងក្លិបណាហ្គាវើលដ៍ ផងដែរ ជាពិសេសកីឡាករ ដោយលោកបានផ្តាំឱ្យពួកគេ ត្រូវរក្សាឱ្យបាននៅ «ភាពស្មោះត្រង់» ជាមួយគ្នា និងត្រូវព្យាយាមបន្តទៀត ដើម្បីឈានទៅសម្រេចក្តីសុបិនរបស់ខ្លួន។
លោក ចាន់ណា បានសរសរថា៖ «បងសូមអរគុណដល់ប្អូនៗ ដែលជាកីឡាករ ណាហ្គាវើលដ៍ទាំងអស់ ដែលយើងបានរួមរស់ជាមួយគ្នា ហត់នឿយជាមួយគ្នា សប្បាយជាមួយគ្នា តែពេលនេះ ជាពេលវេលាដែលយើងត្រូវបែកគ្នា។ បាល់ទាត់តែប៉ុណ្ណឹង សូមប្អូនៗ បន្តការហ្វឹកហាត់ឱ្យបានល្អ ដើម្បីអាជីព និងក្តីសុបិនរបស់យើង ហើយបងសង្ឃឹមថា ថ្ងៃណាមួយយើងនឹងធ្វើការជាមួយគ្នាម្តងទៀត។ សូមផ្តាំប្អូនៗថា ភាពស្មោះត្រង់ គឺសំខាន់ណាស់ សម្រាប់សាងកេរ្តិ៍ឈ្មោះរបស់យើង ដូច្នេះប្អូនៗត្រូវចេះស្រឡាញ់គ្នា គោរពគ្នា ឱ្យតម្លៃគ្នា និងកែលម្អគ្នា»។
គួររំឭកថា លោក មាស ចាន់ណា ធ្លាប់លេងឱ្យក្លិបណាហ្គាវើលដ៍ (ពីមុនឈ្មោះ ណាហ្គាខប) អស់រយៈពេល១៣ឆ្នាំ ក្នុងនាមជាកីឡាករដ៏ឆ្នើមម្នាក់ មុនពេលលោកបានវិវឌ្ឍខ្លួនមកធ្វើជាគ្រូជំនួយ និងគ្រូបង្គោល ដឹកនាំក្លិបដដែលនេះ ក្នុងរយៈពេល៧ឆ្នាំចុងក្រោយនេះ ហើយក្នុងរយៈពេល២០ឆ្នាំនេះ លោក ចាន់ណា ធ្លាប់ជួយក្លិបនេះ ឱ្យលើកពានលីគកំពូលកម្ពុជា ចំនួន៣ដង កាលពីឆ្នាំ២០០៧ ឆ្នាំ២០០៩ និងឆ្នាំ២០១៨ រួមទាំងដឹកនាំក្រុមនេះ ឱ្យឈ្នះពានរង្វាន់សម្តេច ហ៊ុន សែន កាលពីឆ្នាំ២០១៣ និងឈ្នះជើងឯករង ចំនួន៦លើក៕