ភ្នំពេញៈ អ្នកប្រដាល់ចិត្តស្លូត រិន សារ័ត្ន មកពីក្លិបបញ្ជាការដ្ឋានទ័ពជើងទឹក ត្រូវទទួលស្វាគមន៍អ្នកប្រដាល់ចិត្តធំ ជាសិស្សប្អូនជំនាន់ក្រោយ នូវ ដារ៉ូ របស់ក្លិបប្រដាល់គជសារសមានរិទ្ធិ ក្នុងប្រភេទទម្ងន់ ៦០ គីឡូក្រាម នៅសង្វៀន PNN ថ្ងៃអាទិត្យ ហើយជំនួបនេះ ត្រូវបានគេមើលឃើញថា សមត្ថភាពទំនងដូចជាឃ្លាតពីគ្នាឆ្ងាយ ព្រោះ រិន សារ័ត្ន មានប្រៀបជាងចាស់វស្សាជាង និងធ្លាប់ឈ្នះខ្សែក្រវាត់ទៀតផង។
ប្រភពពីអ្នកតាមដានការប្រដាល់ភាគច្រើនលាន់មាត់ថា សមត្ថភាពរបស់កីឡាករ នូវ ដារ៉ូ ប្រសិនបើទប់ទល់នឹង រិន សារ័ត្ន កុំឱ្យតែសន្លប់ ចាត់ទុកថាប្រសើរ និងគ្រាន់បើទៅហើយ ពោលគឺពួកគាត់ចង់និយាយថា ភាគរយដែល នូវ ដារ៉ូ ឈ្នះមានតិច។
តែទោះយ៉ាងណា លោក ធី ណារិទ្ធ គ្រូបង្វឹក នូវ ដារ៉ូ បាននិយាយថា៖ «កម្រិតវិជ្ជាគុនវាល្អគួរសម ប៉ុន្តែវានៅខ្ចីជាងគេបន្តិច ហើយសម្រាប់ការប្រកួតនេះ វាត្រៀមបានល្អ តែមិនហ៊ាននិយាយមុនទេ ចំណែកពាក្យគេថា នូវ ដារ៉ូ អាចចាញ់ដោយសន្លប់នោះ គឺនិយាយបែបនោះ មិនប្រាកដទេ ព្រោះវាមានកណ្តាប់ដៃ និងជង្គង់ចេញល្អដែរ»។
ចំណែកកីឡាករ អ៊ូច ធារិទ្ធ ជាសិស្សច្បងរួមក្លិបជាមួយ នូវ ដារ៉ូ បាននិយាយថា៖ «ដារ៉ូ វាមានបទពិសោធខ្ចីជាងគេបន្តិច ប៉ុន្តែចាញ់គេសន្លប់នោះ វាជារឿងកម្រណាស់ ព្រោះក្បាច់ចេញ និងចិត្តរបស់ ដារ៉ូ មិនងាយចុះញ៉មដៃគូទេ ហើយតាមខ្ញុំចាំ ៣ ប្រកួតចុងក្រោយនេះ នូវ ដារ៉ូ បានចាញ់ គង់ សំបូរ ចាញ់ ចាន់ សំអាត និងស្មើ ១ លើក តែមិនចាំឈ្មោះកីឡាករ»។
ជាមួយគ្នានេះ លោកស្រី សុខ សុខុម អ្នកមើលថែ រិន សារ័ត្ន បាននិយាយថា៖ «រិន សារ័ត្ន ហាត់បានល្អ ជាប្រចាំហើយ៣ប្រកួតចុងក្រោយនេះ វាវ៉ៃល្អ គឺចាញ់តែ គង់ សំបូរ ១ ទេ និងបានឈ្នះ ផាន់ គ្រាន់ និងឈ្នះ ឌុម កែវដា ដែលជាជើងខ្លាំង។ ចំណែកការប្រកួតលើកនេះ ខ្ញុំមិនហ៊ានរំពឹងឈ្នះច្រើនទេ ព្រោះការប្រកួត ពេលខ្លះសុខភាពវាមិនល្អ អាចចាញ់ក៏មានដែរ»។
តាមក្រុមគណៈកម្មការផ្គូផ្គងប្រចាំសង្វៀន PNN បានឱ្យដឹងថា រិន សារ័ត្ន ប្រកួតបាន ៧៥ ដង ឈ្នះ ៥០ ចាញ់ ២៣ ស្មើ ២ ក្នុងនោះផ្តួលដៃគូឱ្យសន្លប់បានដង ១០ ដង ហើយធ្លាប់ឈ្នះខ្សែក្រវាត់ ១ លើក។ រីឯ នូវ ដារ៉ូ ប្រកួតបាន ៥៩ ដង ឈ្នះ ៤៣ ចាញ់ ១៤ ស្មើ ២ ក្នុងនោះវ៉ៃគេឱ្យសន្លប់បាន ១៩ ដង។
ចំពោះលោក តាំង លីហួរ អ្នកសម្របសម្រួលការផ្គូផ្គងប្រចាំសង្វៀន PNN និយាយថា៖ «សម្រាប់គូនេះ មិនទាន់អាចទស្សន៍ទាយពីលទ្ធផលមុនបានទេ ព្រោះកម្រិត និងប្រវត្តិរបស់ពួកគេមិនដាច់ឆ្ងាយពីគ្នាប៉ុន្មានទេ ហើយលទ្ធផល អាចអាស្រ័យទៅលើការហាត់ និងប្រកួតជាក់ស្តែង»៕