ភ្នំពេញ៖ កីឡាករជម្រើសជាតិកម្ពុជាទាំង ៦ នាក់ ដែលទើបបានជាសះស្បើយពីជំងឺកូវីដ ១៩ នៅប្រទេសបារ៉ែន ហើយបានធ្វើដំណើរមកដល់មាតុប្រទេសវិញ កាលពីយប់ម្សិលមិញ រួមមាន ចាន់ វឌ្ឍនាកា, គួច សុកុម្ភៈ, កែវ សុខសិលា, សឿយ វិសាល, សារ៉េត គ្រីយ៉ា និង អ៊ាន ពិសី នឹងត្រូវដាក់ឱ្យធ្វើចត្តាឡីស័ក មួយរយៈពេលទៀត មុនពួកគេត្រូវអនុញ្ញាតឱ្យធ្វើដំណើរទៅកាន់គេហដ្ឋានរៀងៗខ្លួន។
ខ្សែប្រយុទ្ធ ចាន់ វឌ្ឍនាកា, គួច សុកុម្ភៈ, កែវ សុខសិលា, សឿយ វិសាល, សារ៉េត គ្រីយ៉ា និង អ៊ាន ពិសី នឹងត្រូវបញ្ជូនឱ្យទៅធ្វើចត្តាឡីស័កនៅមជ្ឈមណ្ឌល និងសាលាបាល់ទាត់ជាតិបាទី ជាទីកន្លែង ដែលកីឡាករក្រុមធំជម្រើសជាតិកម្ពុជា ចំនួន ១០ នាក់ផ្សេងទៀត (បានធ្វើចត្តាឡីស័ក ដែរ បន្ទាប់ពីពួកគេ បានវិលត្រឡប់មកពីប្រទេសកម្ពុជាមុន កាលពីថ្ងៃទី ១៥ ខែតុលា។
យ៉ាងណាក៏ដោយកីឡាករចំនួន ១០ នាក់ ដែលមិនបានឆ្លងជំងឺកូវីដទាំងនោះ ត្រូវបានអនុញ្ញាតឱ្យវិលត្រឡប់ទៅកាន់គេហដ្ឋានរៀងៗខ្លួនអស់ហើយ បន្ទាប់ពីពួកគេ បានបញ្ចប់ការធ្វើចត្តាឡីស័ក ទៅតាមគោលការណ៍របស់ក្រសួងសុខាភិបាលរួចរាល់កាលពីថ្ងៃទី ២១ ខែតុលា កន្លងមកនេះ គឺមានន័យថា ពួកគេត្រូវបានដាក់ឱ្យធ្វើចត្តាឡីស័កចំនួន ១ សប្តាហ៍។
យ៉ាងណាមិញ សម្រាប់អ្នកទាំង ៦ ដែលទើបវិលត្រឡប់មកពីប្រទេសបារ៉ែន ក្រោយគេនេះ ត្រូវបានសហព័ន្ធកីឡាបាល់ទាត់កម្ពុជា ប្រាប់ដល់មហាជន តាមរយៈការសរសេរបង្ហោះលើហ្វេសប៊ុកផ្លូវការរបស់ខ្លួនថា៖ «កីឡាករជម្រើសជាតិកម្ពុជាយើងទាំង ៦ នាក់ បានធ្វើដំណើរមកដល់ព្រះរាជាណាចក្រកម្ពុជាវិញហើយ ដោយសុខសុវត្ថិភាព។ ពួកគាត់ធ្វើតេស្តនៅព្រលានជាមួយលទ្ធផលអវិជ្ជមាន នឹងត្រូវបន្តធ្វើចត្តាឡីស័កបន្តទៀត នៅមជ្ឈមណ្ឌល និងសាលាបាល់ទាត់ជាតិបាទី មុនអាចត្រឡប់ទៅគេហដ្ឋានវិញបាន»។
ជាមួយគ្នានេះ ចាន់ វឌ្ឍនាកា បានសរសេរបង្ហោះ នៅលើហ្វេសប៊ុករបស់ខ្លួនដែរថា៖ «ពួកយើងបានមកដល់ប្រទេសកម្ពុជាវិញហើយ ដោយសុវត្ថិភាព ដើម្បីឱ្យសុវត្ថិភាពខ្លួនឯង និងមនុស្សជុំវិញខ្លួន ពួកយើងត្រូវដាក់ដាច់ដោយឡែក ដើម្បីសុវត្ថិភាពគ្រប់គ្នា នឹងធ្វើតាមវិធានការណ៍របស់ក្រសួងសុខាភិបាល។ អរគុណដល់រាជរដ្ធាភិបាល សហព័ន្ធកីឡាបាល់ទាត់កម្ពុជា ក្រសួងសុខាភិបាលបារ៉ែន ដែលបានមើលថែព្យាបាលពួកយើងយ៉ាងយកចិត្តទុកដាក់ កុំភ្លេចគោរពតាមវិធានការណ៍របស់ក្រសួងសុខាភិបាល ៣ កុំ ៣ ការពារ»។
គួររំឭកថា ចាន់ វឌ្ឍនាកា, គួច សុកុម្ភៈ, កែវ សុខសិលា, សឿយ វិសាល និង អ៊ាន ពិសី ត្រូវបានធ្វើតេស្តរកឃើញវិជ្ជមានកូវីដ ១៩ នៅមុនពេលក្រុមជម្រើសជាតិកម្ពុជា ត្រូវប្រកួតជើងទី២ វគ្គជម្រុះពានរង្វាន់ AFC Asian Cup 2023 នៅប្រទេសបារ៉ែន ចំណែកខ្សែការពារ សារ៉េត គ្រីយ៉ា បានរកឃើញវិជ្ជមានកូវីដ តាំងពីមុនពេលកម្ពុជា ត្រូវប្រកួតជើងទី១ ជាមួយក្រុមជម្រើសជាតិហ្គាម។
ជាមួយការឆ្លងជំងឺកូវីដ ១៩ នេះ ខ្សែការពារដ៏រឹងមាំ សារ៉េត គ្រីយ៉ា និងកីឡាករវ័យក្មេង អ៊ាន ពិសី សុទ្ធតែមិនបានចូលលេងសូម្បី ១ នាទី ចំណែក ចាន់ វឌ្ឍនាកា, គួច សុកុម្ភៈ, កែវ សុខសិលា និង សឿយ វិសាល សុទ្ធតែបានចូលលេងជម្រើស ១១ នាក់ដំបូង ពេលកម្ពុជា ឈ្នះក្រុមហ្គាម ១-០ ដែលរកបានដោយ ចាន់ វឌ្ឍនាកា នៅជើងទី១ តែពួគេត្រូវអវត្តមានពេលកម្ពុជា បន្តឈ្នះ ហ្គាម ២-១ នៅជើងទី២៕