ភ្នំពេញ: ការប្រកួតប្រដាល់គុនខ្មែរអលស្តារ (Kun Khmer All Star) វគ្គ ២ នៅថ្ងៃពុធនេះ ត្រូវបានរៀបចំឡើងក្នុងលក្ខណៈប្លែកជាងមុន ដោយមានការប្រកួតច្រើនទម្រង់ ជាមួយវត្តមានកីឡាករខ្លាំងៗលំដាប់ ជួរមុខប្រចាំនៅកម្ពុជា ហើយមិនតែប៉ុណ្ណោះ ក៏មានបន្ថែមការប្រកួតគូពិសេសៗ ល្អៗ និងគូខ្សែក្រវាត់ វគ្គផ្ដាច់ព្រ័ត្រទម្ងន់ ៤៥ គីឡូក្រាម ដែលគេបានឱ្យរហស្សនាមថា «ពន្លកគុនខ្មែរ» រវាងកីឡាករ ឆូយ សុថាត់ និង អេលីត សំណាង ផងដែរ។
លោក ស៊ន អេលីត ម្ចាស់សង្វៀននាយកដ្ឋានអង្គរក្ស និងជាស្ថាបនិកកម្មវិធី Kun Khmer All Star នេះ បានប្រាប់ថា៖ «ការប្រកួតថ្ងៃទី ២៧ ខែតុលានេះ យើងដាក់ឱ្យមានការប្រកួតចម្រុះ ក្នុងនោះមានប្រដាល់គុនខ្មែរ ប្រដាល់ឃីក បុកស៊ីង ប្រដាល់បុរាណខ្មែរលក្ខណៈរុំអំបោះឆៅគ្មានពាក់ហ្គង់ ប្រដាល់សកលអាជីព និងបន្ថែមគូដណ្តើមខ្សែក្រវាត់វគ្គផ្តាច់ព្រ័ត្រទម្ងន់ ៤៥គីឡូក្រាម នៃកម្មវិធីពន្លកគុនខ្មែរ សរុបចំនួន ១០ គូ ដែលសុទ្ធតែជាកំពូលកីឡាករឆ្នើមៗបំផុត គឺនេះជាព្រឹត្តិការណ៍ធំ ដែលទាក់ទាញបំផុត ហើយសមត្ថភាពកីឡាករទាំង ១០ គូ គឺមហាជន មិនអាចអូសរំលងបានទេ»។
ចំពោះបេក្ខភាពសំខាន់ៗ និងមានសមត្ថភាពឆ្នើមៗ ដែលត្រូវបានផ្គូផ្គងរួចរាល់ សម្រាប់ការប្រកួតគុនខ្មែរអលស្តារ នៅថ្ងៃពុធនេះ រួមមានជំនួបសងសឹកដ៏ក្តៅគគុករវាងជើងខ្លាំង ឃីម បូរ៉ា ទៅលើ អេលីត ចំរើន ដែលការប្រកួតវគ្គ ១ បូរ៉ា បានភ្លាត់សន្លប់ធំ ក្រោមក្បាច់ពិសេសរបស់ ចំរើន ចំណែកជើងខ្លាំង ឡៅ ចិត្រា ត្រូវដាក់ឱ្យជួបគូសត្រូវចាស់ ផល សោភ័ណ្ឌ ដែលអ្នកទាំងនេះ សុទ្ធតែមានសមត្ថភាពខ្លាំងលំដាប់ជួរមុខ។
ទន្ទឹមនឹងនេះ ជើងខ្លាំង លន បញ្ញា ត្រូវដាក់ឱ្យប្រកួតជាមួយអ្នកប្រដាល់ជំនាញទាំងប្រដាល់សកល និង សេរី វី សម្ភស្ស ហើយ អេលីត សាន់ ត្រូវប៉ះ វ៉ាន់ វឿន ស្របពេល គង់ សំបូរ ត្រូវជួប សោម ពិសិដ្ឋ រីឯ ខាំ ខ្លានាង ប្រឈម កាន់ ម៉េងហុង ខណៈ នៅ សុខទី ប៉ះ សៅ រង្សី និង អេលីត រស្មី ជួប ឡុង ពិសិទ្ធ។
ជាមួយគ្នានេះ ការប្រកួតផ្តាច់ព្រ័ត្រ ដណ្តើមខ្សែក្រវាត់ ទម្ងន់ ៤៥ គីឡូក្រាម រវាង ឆូយ សុថាត់ និង អេលីត សំណាង ពិតជាមានភាពទាក់ទាញខ្លាំង។ កីឡាករវ័យ ១៦ ឆ្នាំ ឆូយ សុថាត់ មានស្រុកកំណើត នៅភូមិក្រមល់ ឃុំរហាត់ទឹក ស្រុកមង្គលបុរី ខេត្តបន្ទាយមានជ័យ ដោយធ្លាប់ប្រកួតបាន ២០ ដង ឈ្នះ ១៦ ចាញ់៣ និងស្មើ ១ ដង ចំណែក អេលីត សំណាង អាយុ ១៦ ជាអ្នកនៅភ្នំពេញ ក្នុងសង្កាត់ឫស្សីកែវ ខណ្ឌឫស្សីកែវ ហើយ កីឡាកររូបនេះធ្លាប់ប្រកួតបាន ១៥ ដង ឈ្នះ ១០ និងស្មើ ៥ ដង។
ទាក់ទងទៅនឹងការប្រកួតនេះ លោក សាន សៅយ៉ាន់ គ្រូបង្វឹកកីឡាករ ឆូយ សុថាត់ និងលោក ស៊ន អេលីត ជាគ្រូបង្វឹក អេលីត សំណាង សុទ្ធតែមិនហ៊ានអះអាងពីលទ្ធផលទុកមុនព្រោះកីឡាករវ័យក្មេងបែបនេះ វ៉ៃសម្រុក គ្មានគិតបច្ចេកទេស ឬយុទ្ធសាស្ត្រច្រើននោះទេ អ៊ីចឹងអ្នកណា កម្លាំងនៅថេរ និងរឹងមាំ អាចឈានទៅគ្រប់គ្រងខ្សែក្រវាត់បានមិនខាន ពោលគឺសុទ្ធតែសង្ឃឹម ៥០ ភាគរយដូចគ្នា។
សម្រាប់ការប្រកួតផ្ដាច់ព្រ័ត្រ ដណ្តើមខ្សែក្រវាត់នេះ ម្ចាស់ជើងឯកនឹងទទួលបានខ្សែក្រវាត់ ដែលផលិតនៅប្រទេសថៃ អមដោយប្រាក់រង្វាន់ចំនួន៣លានរៀល ចំណែកជើងឯករងបាន ១លានរៀល។ ជាមួយគ្នានេះលោកស្រី ទ្រី ដាណា ក៏បានចូលរួមឧបត្ថម្ភដល់ការប្រកួតគុនខ្មែរអលស្តារនេះ ចំនួន ៥ ពាន់ដុល្លារ ព្រមទាំងផ្តល់ជូនកីឡាករ ដែលប្រកួតឈ្នះ ១ លានរៀល និងអ្នកចាញ់ចំនួន ៥០ ម៉ឺនរៀលផងដែរ៕